LUNES XVI DEL TIEMPO ORDINARIO

LUNES XVI DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 14, 5-18

Oñemombe’u rireEgipto ruvicha guasúpe Israelgua oho hague, ha’e ha hembiguáikuéra he’i hikuái: Ma’erã piko jaheja Israelgua osẽ ñande poguýgui? Faraón oguenohẽuka ikárro ñorairõrã ha ogueraha iñorairõhakuéra yvy rupigua ha kavaju arigua.

Oiporavo 600 kárro iporãvéva ha opaichagua kárro Egipto pegua, huvichakuéra reheve. Tupã Ñandejára oheja Egipto ruvicha guasu Faraón oñembopy’a hatã ha omuña Israelguápe, ha’ekuéra osẽ aja ojerovia itévo ijehe.

Egiptogua omuña ichupekuéra kavaju arigua, Faraón kárro arigua ha iñorairõhakuéra yvy rupigua reheve. Ohupity hikuái Israelguápe opytu’u aja yguasu ypýpe, Pi-Hahirot renondépe, Baal-Sefón rovái.

Oñembojávo Faraón, Israelgua ohecha Egiptogua omuñaha ichupe kuéra, tuicha okyhyje ha osapukái Tupã Ñandejárape. He’i hikuái Moiséspe: Ndaipóri piko Egíptope yvy roñeñotỹ haguã, ajeve ore reru romano haguã yvy ojeiko’ỹháme?

Ma’erã voi piko ore renohẽ Egíptogui? Ro’e voi ndéve kuri: “Ore rejápe to roiko Egiptogua rembiguái ramo. Iporãve roiko upéicha ha ani romano yvy ojeiko’ỹháme!”

Moisés he’i ichupekuéra: Ani pekyhyje térã pejepy’apy mba’evére! Pehecháta hína ko árape upe Tupã Ñandejára ojapótava. Umi Egiptogua pehecháva ágã, ndapehecha mo’ãvéi águive. Tupã Ñandejárante voi oñorairõta pende rehe ha natekotevẽi pejepy’apy mba’evére.

Tupã Ñandejára he’i Moiséspe: Ma’erãpa resapukái rei chéve? Ere Israel guápe toho hapére. Nde katu ehupi yvyra jekoha, eipyso nde po Mar Rojo ári ha emboja’o hi’ykuéra ojuehegui ikatu haguã Israelgua ohasa yvy rupi.

Che ahejáta Egiptogua oñembopy’a hatã ha ojepoi Israelgua rapykuéri, ajechaukáta che mimbipápe Faraón, ikárro ha ñorairõhára kárro arigua, kavaju arigua ha yvy rupigua renondépe.

Oikuaáta umi Egiptogua cheha opa mba’e Jára, ajechauka ramo che mimbipápe che yvytúvo Faraón, ikárrokuéra ha umi ñorairõha kárro arigua, kavaju arigua ha yvy rupiguáre.

Tupã Ñandejára Ñe’ẽ.

SALMO ÑEMBOHOVÁI Ex 15, 1b-6

Opavave: Ta ropurahéi Tupã Ñandejárape, ojajaipáva imbaretetégui.

Ha’e oity upe y guasúpe kavaju ha hi’ári guápe.
Tupã Ñandejára, nde che mombarete ha che mbovy’a.
Nde che Tupã, rogueropurahéi,
che rukuéra Tupã, romomorã! O.

Che Jára, nde hína ñorairõhára,
Che Jára, nde réra tee!
Faraón kárro ha iñorairõhára
yguasu ruguápe remombopa ite. O.

Y eta apytépe ho’yguy, ita pohýicha y ruguaitépe ojejakutu.
Tupã Ñandejára, nde po akatúa imbaretetéva, omimbipaite!
Tupã, nde po akatúape remyangu’ipa nde rehe opu’ãvape! O.

ALELUIA Cf. Sal 94, 8a.7d

Aleluia.
Ani pemohatã pene korasö,
pehendu uvei Tupã Ñandejára ñe’ẽ.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 12, 38-42

Upe ramo guare fariséokuéra ha umi Moisés rembiapoukapy mbo’eha he’i Jesúspe:- Mbo’ehára, rohechase niko rejapórõ mba’e hechapyrãva.

Jesús katu he’i ichupekuéra: Tekove ahẽ Tupã Ñandejárare ojerovia’ỹva ñemoñarénte ojerure ohecha haguã mba’e hechapyrãva. Ndo jehechauka mo’ãi peẽme mba’eveichagua mba’e hechapyrãva.

Tupã Ñandejára ohechaukáta peẽme maranduhára Jonás rehe ojapo haguéicha. Ha Jonás oĩ haguéicha mbohapy ára ha pyhare pe pira guasu ryépe, péicha avei che, yvypóraicha aju va’ekue, apyta va’erã mbohapy ára ha pyhare yvy guýpe.

Ágã Tupã Ñandejára ombojovakévo opavavépe, umi Ninivegua pene moĩ vaíta Tupã Ñandejára renondépe pene rembiapo vai haguére. Ha’ekuéra niko oheja va’ekue iñangaipa Jonás oñemoñe’ẽ ramo ichupekuéra. Ha che ha’e peẽme, peteĩ mba’e guasuvéva Jonásgui oĩhína ko’ápe Ko’ágã.

Pe mburuvicha guasu kuñáva tetã Sebá pegua, opu’ã va’erã avei mbojovakeha árape, ha pene moĩ vaíta Tupã Ñandejára renondépe pene rembiapo vai haguére. Ha’e niko mombyryvégui oú va’ekue ohendu haguã Salomón ñe’ẽ arandu. Ha che ha’e peẽme, peteĩ mba’e guasuvéva Salomóngui oĩhína ko’ápe ko’ágä .

Ñandejára Jesucristo Ñe’ẽ