MIÉRCOLES XVI DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 16, 1-5. 9-15

Oho hikuái Elímgui ha oguahẽ yvy ojeiko’ỹháme upe héravape Sin, opytáva Elim rire ojehóvo Sinaí gotyo, ára 15, mes mokõiháme osẽ rire Egíptogui.

Opa Israelgua oñe’ẽ vai upépe Moisés ha Aarón rehe. He’i joa hikuái: Romano nga’u ra’e Tupã Ñandejára po rupi Egíptope! Upépe roguapy jepi ore ólla jerére, ro’u so’o ha mbuja ore ryvatã meve.

Peẽ katu ore reru ko yvy ojeiko’ỹháme ore jukapa haguã ñembyahýigui. Tupã Ñandejára he’i Moiséspe: Amondóta peẽme mbuja yvágagui.

Peteĩ teĩ tosẽ to mboaty ára ko’ẽre hembi’u upe árape guarã. Upéicha aikuaáta ha’e kuérapa oikóta che aipota háicha. Ára 6 hápe katu to mboaty mokõi árape guarã.

Upérõ Moisés he’i Aarónpe: Ere Israelguápe to ñemboja Tupä Ñandejára rendápe, ha’e niko ohendúma iñe’ẽ.

Aarón oñe’ẽ aja Israel guápe, ha’ekuéra oma’ẽ yvy ojeiko’ỹha gotyo ha ohecha hikuái Tupä Ñandejára omimbipa ramo peteĩ araípe.

Tupã Ñandejára he’i Moiséspe: Ahendu Israelgua oñe’ẽ vai ramo. Ere ichupekuéra: “Ka’aru vove pe’úta so’o ha pyhareve pene ryvatãta mbujágui. Ha upéicha peikuaáta cheha Tupã pende Jára”.

Upe ka’aru voi ou guyra kuéra ynambu joguaha ha omoenyhẽmba upe ha’e kuéra oikoha. Ha pyhareve ojejaho’ipa ysapýpe upe ha’e kuéra oikoha, opa ijerekuévo.

Ysapy ikã rire, ojekuaa yvy perõ ári akytã mimi mba’e ra’ỹicha, ysapy rypy’a joguaha. Israelgua ohechávo upéva he’i joa ojupe: “Mba’éiko kóva?” ndoikuaáigui mba’épa. Moisés katu he’i ichupekuéra: Kóva hína mbuja ome’ẽva peẽme Tupã Ñandejára.

Tupã Ñandejára Ñe’ẽ.

SALMO ÑEMBOHOVÁI 77, 18-19. 23-28

Opavave: Tupã Ñandejára ome’ẽ ichupe kuéra tembi’u yvágapegua.

Oipy’a ra’ã hikuái Tupã Ñandejárape,
ojerurepa rei ichupe hembi’urã.
Oñe’ẽ Tupã Ñandejára rehe he’ívo:
“Ikatunga’u piko Tupã ñane mongaru yvy ojeiko’ỹháme?” O.

Tupã Ñandejára katu oñe’ẽ araípe amo yvate
ha oipe’a yvága rokẽ.
Omongy hi’árikuéra maná hembi’urã,
tembi’u yvága guápe ichupe kuéra omongaru.O.

Ho’u hikuái mbuja Tupã remimbou rembiapokuéva,
hyvatã meve okaru hikuái.
Kuarahy resẽguio ombou yvytu,
ha Yvy gotyoguio avei oipejuka. O.

Ombou ichupekuéra so’o yvy timbóicha,
ha yvyku’i y rembe’ýpe guáicha guyrakuéra.
Ijapytépekuéra oity umíva,
hóga jere kuéra rupi oity. O.

ALELUIA

Aleluia.
Pe mba’e ra’ÿi Tupã Ñandejára ñe’ẽ hína, pe oñotÿva Jesucristo; pe ojuhúva oikove opa ára guarã.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

13, 1-9

Upe ramo Jesús osẽ hógagui ha oho yguasu Galiléa rembe’ýpe. Upépe oguapy oñe’ẽ haguã. Ha hetágui umi oñemboatýva Jesús jerére, ojupi ha’e ha oguapy peteĩ kanóape, ha opavave opyta pe y rembe’ýpe.

Upe guive ha’e oñe’ẽ ichupe kuéra heta mba’ére, ha oiporu ñe’ẽ mbojoja omoesakã haguã ichupekuéra pe he’iséva.

He’i ichupekuéra: “Oĩ va’ekue peteĩ osẽva oñemitỹ haguã. Ha omosarambívo pe oñotỹséva ra’ỹi, oĩ ho’áva umi tape ojeguataha rupi ha ou guyrakuéra ha ho’upa.

Oĩ avei ho’áva itatýpe, yvy ipokãháme. Umíva voi heñói, ipererĩgui pe yvy. Kuarahy ojopévo katu ohapypa, ha ndahapo pypukúigui ipirupa. Oĩ avei ho’áva ñuatĩndýpe, ha umi ñana okakuaávo ojaho’ipa ha ojuka. Oĩ katu avei ho’áva yvy iporãháme ha upépe hi’a heta. Oĩ hi’áva 100, oĩ hi’áva 60 ha oĩ hi’áva 30.”

Jesús upéi he’i ichupe kuéra: “Ohendúvake to japysaka porã.”

Ñandejára Jesucristo Ñe’ẽ