JUEVES XVI DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 19, 1-2. 9-11. 16-20b

Upe ára osẽ hague Egíptogui, ohasa rire mbohapyha mes, Israelgua oguahẽ yvy ojeiko’ỹháme Sinaí pegua. Osẽ hikuái Refidímgui ha oguahẽvo Sinaípe opyta upépe yvyty rovái.

Tupã Ñandejára he’i Moiséspe: Ajúta ne rendápe peteĩ arai anambusúpe, Israelgua ohendu haguã añe’ẽ ramo ndéve. Upéicha ha’e kuéra ojeroviáta opa ára nde rehe.

Moisés omombe’u jevy Ñandejárape Israelgua ñe’ẽ. Tupã Ñandejára he’i Moiséspe: Tereho ha emopotï ichupe kuéra ko árape ha ko’ẽrõ, ha ejoheiuka ichupekuéra ijao, to ñembosako’i ára mbohapyhápe guarã. Upérõ aguejýta maymáva rovake yvyty Sinaí ru’ãme.

Ára mbohapyhápe ko’ẽtĩ jave, oiko ára sunu ha ára tiri ha arai anambusu ojaho’ipa yvyty ru’ã. Trompéta pu mbarete oñehenduha maymáva oñepyrũ oryrýi.

Moisés he’i ichupekuéra osẽ haguã hekohágui Tupã Ñandejára ruguãitĩvo. Oho opyta hikuái yvyty rembe’ýpe. Yvyty Sinaí otĩmbopa, Tupä Ñandejára oguejy haguére hi’ári tatáicha.

Upe yvyty ojogua tatakua guasu hatatĩmbáva ha oryrýi mbarete eterei. Trompéta pu hyapu mbareteve ohóvo. Moisés oñe’ẽ Tupãme ha Tupã oñe’ẽ ichupe ára sunúicha. Tupä Ñandejára oguejy Sinaí ru’ãme, ohenói Moiséspe ha ha’e ojupi hendápe.

Tupã Ñandejára Ñe’ẽ.

SALMO ÑEMBOHOVÁI Dn 3, 52a. 52b. 53-56

Opavave: Ñandejára, ndéve guarãnte jererohory ha ñemomarangatu.

Ndéve roguerohory, Tupã, oreru kuéra ypykue Jára.
Ndéve romomba’e guasu opa ára.
Roguerohory nde réra marangatu tuichaite,
ha romomba’e guasu opa ára. O.

Ndé rejererohory nde Tupao marangatu mimbipápe,
reñemomba’e guasu ha reñemomorã opa ára.
Ndé rejererohory mburuvicha guasúicha reguapýva,
reñemomba’e guasu ha reñemomorã opa ára. O.

Ndé rejerohory rehechágui umi ipypukuvehápe,
ha reguapy umi tekove ipepóva ári,
nde reñemomba’e guasu ha reñemomorã opa ára.
Ndé rejererohory yvága ha arapýre, reñemomorã opa ára. O.

ALELUIA Cf. Mt 11, 25

Aleluia.
Jehovasapyre nde che Ru, Tupã yvy ha yvága Jára, rehechaukáre mba’e guasu ete Sambyhy rehegua umi michïvévape.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha

13, 10-17

Upe ramo Ñandejára remimbo’e kuéra oñemboja hendápe ha oporandu ichupe: Mba’ére piko opavavépe reñe’ẽ jave, reiporu ñe’ẽ mbojoja ichupe kuéra rembo’e haguã?

Jesús he’i ichupe kuéra: Tupã Ñandjára niko oikuaauka peẽmente umi mba’e ñemimby Tupã Ñandejára sãmbyhy yvága peguáre. Ichupe kuéra katu nahániri.

Upe oguerekóvape oñeme’ẽvéta oguerekove haguã, ha upéva ári oñeme’ẽvéta ichupe. Upe oguereko’ỹvagui katu, pe michĩmi oguerekóva jepe ojepe’áta, ha mba’evete ndopyta mo’ãi ichupe.

Ko’ãva niko omaña ramo jepe ndohechái hína, ha ohendu ramo jepe ndoikéi iñakãme. Upévare añe’ẽ ichupekuéra ñe’ẽ mbojoja rupi. Ha péicha, ojehu ichupekuéra upe maranduhára Isaías he’i haguéicha:

“Ko’ãva ohenduve ramo jepe ndoikuaa mo’ãi, omañave ramo jepe ndohecha mo’ãi.

‘Ko’ãva akãme ndoike véima mba’eve, omboty ijapysa ha hesa. Péicha’ỹrõ, ikatúne ohecha ha ohendu, térã ojecha kuaa ha ojere ou che rendápe ha aipohano ichupekuéra”.

Pevy’aite va’erã katu peẽ, ikatúgui peche recha pende resa rupi, ha ikatúgui peche rendu pende apysa rupi.

Añetehápe ha’e peẽme, heta maranduhára ha heta imarangatúva ohechase va’ekue ko peẽ pehecháva, ha ndo hechái, ha ohenduse va’ekue ko peẽ pehendúva, ha nohendúi.

Ñandejára Jesucristo Ñe’ẽ