LUNES XVII DEL TIEMPO ORDINARIO

LUNES XVII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha

24, 18bc; 31, 18; 32, 15-24. 30-34

Moisés oike arai pa’ũme ha ojupi yvytýpe. Opyta upépe 40 ára ha 40 pyhare pukukue. Moisés oguejy yvytýgui ha ogueraha ipópe mokõive ita pehẽngue tembiapoukapy rechaukaha jehaíva mokõive hováguio. Mokõive ita pehẽngue, Tupã Ñandejára rembiapokue ha tembiapoukapy ojehaíva ipype kuéra, ha’e voi ohai va’ekue ipo teépe.

Josué ohendúvo sapukái oikóva he’i Moiséspe: Sapukái ñorairõha megua hi’ã chéve upe ahendúva.

He’i ichupe Moisés: Ndaha’éi sapukái rory ñorairõha megua, ndaha’éi avei guahu oikóva osẽ vai ramo, purahéi hína upe ahendúva.

Oguahẽ Moisés tekoha ypýpe ha ohechávo tóro ra’y ha jeroky, hova rendypa pochýgui, omombo moikõive ita pehẽngue oguerúva ipópe ha ojoka yvyty mátare.

Upérõ ojapyhy tóro ra’y ha omombo tatápe, upéi omongu’i tumi upe tóro ra’y, iku’ikue oity ýpe ha ho’uka Israelguápe. Ha he’i Aarónpe: Mba’épa ojapo hikuái nde rehe, rejapouka haguã ichupe kuéra ko angaipa péicha ite ivaíva?

Aarón he’i ichupe: Anína nde pochy che ndive. Reikuaa porã ha’e kuéra oguerohoryha ivaívante voi. Ha’ekuéra he’i chéve: “Ejapóke oréve peteĩ tupã, toho ore renonderã. Upe Moisés ore renohẽ va’ekue Egíptogui ndo roikuaái mba’épa oiko ichugui .”

Upérõ ha’e ichupekuéra: “Oguerekóva óro to gueru.” Ha’e kuéra ogueru, aity tatápe ha osẽ ichugui ko tóro ra’y.

Upe ára ambuépe Moisés he’i Israel guápe: Ivai eterei pene angaipa. Ajupíta ko’ágä Tupä Ñandejára rendápe, jahecha ndoheja reíripa peẽme.

Moisés oho jevy Tupä Ñandejára rendápe ha he’i ichupe: Angaipa nde vaipa jepéva niko upe ojapóva Israelgua omomba’e guasúvo tupã gua’u óro guigua Ajerure ndéve reheja rei haguã ichupe kuéra. Nde rejaposéi ramo katu eipe’a che réra nde líbrogui.

Tupã Ñandejára he’i Moiséspe: Iñangaipáva réra aipe’áta che kuatiágui. Nde katu tereho eraha ichupe kuéra ha’e haguépe ndéve. Che remimbou ohóta ne renonderã, ha che ainupãta ichupe kuéra hi’árape iñangaipáre.

Tupã Ñandejára Ñe’ẽ.

SALMO ÑEMBOHOVÁI 105, 19-23

Opavave: Pe aguyje me’ẽ Ñandejárape, Ha’e imba’e porã itéva.

Yvyty Horébpe ojapouka hikuái tóro ra’ãnga,
ha pe ta’ãnga órogui ijejapo pyre omomba’e hikuái.
Upéicha omoengovia hikuái Tupãme, heko mimbipávape, tóro kapi’i ho’úva ra’ãngáre. O.

Hesarái Tupã Ñandejáragui, oguenohẽ va’ekue ichupekuéra
jejopy vaígui, tuicha ite mba’e ojapo va’ekue Egíptope,
mba’e hechapyrãva ojapo va’ekue Canaánpe
ha mba’e ojehecha’ỹva Mar Rójope. O.

Tupã Ñandejára ohundi mo’ã ichupekuéra,
hembiporavo Moisés katu oñemoĩ haperãme
ha upéicha ojoko, Tupã Ñandejára pochy. O.

ALELUIA Sant 1, 18

Aleluia.
Ñande Ru niko ñane moingove pyahuse jevy Ñe’ë añetéva rupi, oiko hagua ñande hegui opa mba’e ojejapo ypýva.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 13, 31-35

Upe ramo Jesús omombe’u opavavépe ambue ñe’ẽ mbojoja. He’i ichupekuéra: “Tupã Ñandejára sãmbyhy yvágagui oúva niko ojogua ku mostása ra’ỹime ojereraháva oñeñotỹ kokuépe. Mostása ra’ỹigui michĩvéva niko ndaipóri, ha okakuaa rire ijyvateve opa mba’e kokuépe opu’ãvagui. Yvyra mátaicha ijyvate ha guyra kuéra ou ojaitypo hakãre.”

Jesús omombe’u opavavépe mbuja mbovuha rehegua ñe’ẽ mbojoja. He’i ichupekuéra: “Tupã Ñandejára sãmbyhy yvágagui oúva niko ojogua ku mbuja mbovu háicha peteĩ kuñakarai ombojehe’áva 25 kílo rupi hu’itĩ, ipahápe ombovupáva.”

Jesús oiporu ñe’ẽ mbojoja omombe’u haguã opavavépe ko’ã mba’e. Ha mba’eve nde’íri ichupekuéra oiporu’ỹre ñe’ẽ mbojoja. Péicha ojapo oiko haguã heko itépe maranduhára he’i va’ekue ojehutaha he’i ramo: Añe’ẽta ichupekuéra ñe’ẽ mbojoja rupi amombe’úta ichupekuéra oĩva iñemimby Tupã Ñandejára ojapo ypy guive ko yvy.

Ñandejára Jesucristo Ñe’ẽ.