MARTES 8º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 35, 1-12

Tupã Ñandejára rembiapoukapy apo ha’ete heta mba’e kuave’ẽ, hembiapoukapy ñemboaje ha’ete mymbajuka joajurã.

Jehepyme’ẽ iporãvare ha’ete trígo iporãvéva kuave’ẽ, ha Tupã Ñanadejáara mba’e me’ẽ, ha’ete mymbajuka hyakuã asýva Tupã Ñandejárape.

Ivaívagui jajeírõ ñambovy’a Tupã Ñandejárape, teko joja’ỹgui japoírõ ha’ete mymbajuka ojeheja rei haguã ñane angaipa. Ani reñemboja po nandi Tupä Ñandejára renondépe, péicha niko he’i Tupä Ñandejára rembiapoukapy.

Imarangatúva mymbajuka omongyrárõ upe altar, hyakuã porãngue ojupi upe Yvatetegua rendápe. Imarangatúva mymbajuka ojererohory, ha tesaráipe ndopyta mo’ãi imba’e kuave’ẽ.

Nde po jeráke remomba’e guasúvo Tupä Ñandejárape, ha ani ne rakate’ỹ reikuave’ẽvo ichupe nde koga’a tenondere.

Opa mba’e reikuave’ẽvape ta nde rova rory, ha vy’apópe eme’ẽ upe 10gui peteĩ. Eme’ẽ upe Yvatete guápe ha’e ome’ẽ haguéicha ndéve, eme’ẽ heta porã ndéve ikatu háicha.

Tupã Ñandejára niko ohepyme’ẽ kuaa ha hetavépe omoengoviáta ndéve. Ani rembopopeguase ichupe, cháke ha’e upéva ndoguerohorýi, ha ani rejerovia mymbajuka hekopegua’ỹre.

Tupã Ñandejára ko hína mbojovakeha heko jojáva ha avavépe nombojeroviái hekope’ỹ.

Tupã Ñandejára Ñe’ẽ

SALMO ÑEMBOHOVÁI 49, 5-8. 14. 23

Opavave: Yvága omombe’u Tupä Ñandejára heko jojaha.

Upe ohóva tape porãre ohechaukáta ichupe che pysyrö.
Tupã Ñandejára, tupä gua’u Jára, oñe’ẽ omboatypa haguã yvypórape apo ite hendágui. O.

“Pemboatypa umi che momba’évape, umi imba’e kuave’ẽ rupi iñe’ẽ ome’ẽ va’ekue chéve.”
Tupã Ñandejára upe oporombojovakéva.
Yvága omombe’u ha’e heko jojaha. O.

Israel che retã! Ehendu ko ha’étava ndéve!
Che ahechaukáta ndéve mba’éichapa reime.
Che niko Tupã nde Jára. Mba’eve ndarekói ha’e va’erã
mymbahapy ha mymba juka rehe pejapóva chéve. O.

Umíva niko opa árape che renondépe pemoguahẽ.
Emomba’e guasu Tupã Ñandejárape
nde py’a ite guive, ha eikuave’ẽ ichupe upéva. O.

ALELUIA Cf. Mt 11, 25

Aleluia.
Nde niko hovaspyre, ore Ru, Tupä yvy ha yvága Jára,
hehechauka va’ekue mba’e guasu ete Sambyhy rehegua
umi imichïvévape.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha

10, 28-31

Upe ramo Pedro he’i Ñandejárape: Ore niko roheja opa mba’e ndéve romoirũ haguã.
Jesús he’i ichupe kuéra:

“Añetehápe ha’e peẽme, oimeraẽva oheja va’ekue che rehehápe hóga térã ityvýra, térã iteindýra, térã itúva, térã isy, térã hembireko, térã ita’ýra, térã ijyvy, pe ohejáva rendaguépe ohupytýta 100, ko yvy árima voi, taha’e óga, tyke’ýra, tyvýra, teindýra, tykéra, kypy’y, kyvy, sy, túva, ta’ýra, tajýra, mitã kuimba’e, mitãkuña ha yvy, jehasa asy reheve ramo jepe. Ha omano rire katu, jeikove opa’ỹva. Ha heta umi ko’ágã itenondéva, itapykuéta. Ha heta umi ko’ágã itapykuéva, itenondéta”.

Ñandejára Jesucristo Ñe’ẽ.