LECTURAS MIÉRCOLES 8º TIEMPO DURANTE EL AÑO

LECTURAS MIÉRCOLES 8º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pedro ohai va’ekue    1, 18-25

Che pehẽnguekuéra:

Tupã Ñandejára niko pende pe’a va’ekue pe jeikove reígui pende ypy kuerakue oheja va’ekue peẽme. Ha peẽ peikuaa porã, upévare ojehepyme’ẽ hague ndaha’éi mba’e itujúvape, óro térã plátaicha, upéva ojehepyme’ẽ hepy etéva Cristo ruguýpe, oñekuave’ẽ va’ekue ojejuka haguã peteĩ ovecha ra’ýicha, oĩmba porãva ha iky’a’ỹva.

Cristo niko upevarã voi oñemoĩ va’ekue opa mba’e ojejapo ypy mboyve, ha ko’ã ára pahápe katu ojechauka peẽme ou porã haguã. Cristo rupi peẽ perovia Tupã Ñandejárape, ha’e niko omoingove jevy ha oguerohory va’ekue ichupe. Ha upéicha, peẽ pemoĩ Tupã Ñandejárare pende jerovia ha opa peha’arõva.

Ko’ágä  peẽ, pehendúvo pe añetegua ñemomarandu, pene potĩ pehayhu porã haguã ñane pehẽngue  kuérape. Aipórõ, pejoayhu va’erã py’a potĩme, ha pene mbarete ome’ẽ háicha. Peẽ niko peikove jevy, ha ko’ágä   ndaha’éi pende ru ha pende sýgui yvypóra omano va’erãva, peikove jevy Tupã Ñandejára oikovéva ha opa’ỹva ñe’ẽ rupi. Tupä Ñandejára ñe’ẽ he’i voi:

“Opa yvypóra niko kapi’ícha, ha yvoty ka’aguýicha iporã.

Ha upe kapi’i ipiru ha pe yvoty okúi. Tupä Ñandejára ñe’ẽ katu opa ára guarã opyta.” Kóva ko ñe’ẽ hína pe marandu pyahu oñemoguahẽ va’ekue peẽme.

Ñandejára Jesucristo Ñe’ẽ.

SALMO ÑEMBOHOVÁI   147, 12-15. 19-20

Opavave: Jerusalén, erohory Tupã Ñandejárape.

Jerusalén, erohory Tupä Ñandejárape,

Sión emomba’e guasu Tupãme.

Ha’e omboty hatã ne rokẽnguéra ha ohovasa nde ra’y

ha nde rajy kuéra nde pype. O.

Ha’e ogueru py’aguapy nde yvýpe,

ha nemohyvatã trígo iporãvévape.

Ha’e ombou iñe’ẽ ko yvýpeha upe he’íva py’a oguahẽ. O.

Jacóbpe ha’e oikuaauka hembipota.

Israélpe ha’e ome’ẽ hembiapoukapy.

Ambue tetã ndive ha’e upéicha ndojapói,

ndoikuaaukái ichupe kuéra hembiapoukapy. O.

ALELUIA Mc 10, 45

Aleluia.

Che, yvypóraicha aju va’ekue aikóvo tembiguáirõ katu ha ame’ẽvo che rekove anohẽ haguã hetápe ivaívagui.

Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha  10, 32-45

Upe ramo oho hikuái Jerusalénpe, ha Jesús oho tenonde. Ha’e kuéra ohecha ramo upéva, ha umi ohóva hapykuéri okyhyje. Jesús ohenói jevy ha’eño háme umi 12 hemimbo’e ha he’i ichupekuéra upe ojehútava ichupe: Jaha niko ñaína Jerusalénpe.

Upépe, che, yvypóraicha aju va’ekue, oĩta che moĩva pa’ikuéra ruvicha ha Moisés rembiapoukapy mbo’eha pópe, ha ha’ekuéra ojeruréta ajejuka haguã, ha che me’ẽta ambue tetãgua pópe. Oñembohory ha ondyvúta che rehe hikuái, che nupã ha che jukáta hikuái. Mbohapy ára haguépe katu aikove jevýta .

Zebedeo ra’ykuéra Santiago ha Juan oñemboja Jesús rendápe ha he’i ichupe: Mbo’ehára, roipota rejapo rojerurétava ndéve.

Ha’e oporandu ichupe kuéra: Mba’épa peipota ajapo pende rehe?

He’i hikuái ichupe: Nde reguapývo reisãmbyhy mburuvicha guasu mimbipápe, roipota ore mboguapy peteĩme nde akatu gotyo ha ambue nde asu gotyo.

Jesús he’i ichupekuéra: Peẽ niko nda peikuaái mba’épa pejerure. Peẽ nga’u piko peime pehasa asy haguãicha, che ahasa asýta háicha? Ikatútapa pemboy’u pe iróva che amboy’útava?

Ha’e kuéra he’i: Roime rohasa haguã.

Jesús he’i ichupe kuéra: Peẽ añetehápe pemboy’úta pe iróva ha pehasa asýta che ahasa asýta háicha. Peguapy haguã che ykére katu ndaijái chéve ame’ẽ. Che Ru upéva ome’ẽta umi ha’e ombosako’i va’ekuépe.

Umi 10 hemimbo’e ohendúvo upéva, ipochy Santiago ha Juan ndive. Ha Jesús ohenói ichupekuéra ha he’i: Peẽ niko peikuaa mba’éichapa mburuvicha kuéra po pohýipe oisãmbyhy umi hetã, ha mba’éichapa poguasukuéra ave ‘oguereko vai ichupekuéra. Pende apytépe katu nda upéichai va’erã. Pe mba’e guasuséva oiko va’erã uvei tembiguáirõ. Ha pe itenondeséva pende apytépe, toiko opavave rembiguái ramo.

Che, yvypóraicha aju va’ekue, niko ndajúi che rembiguairã rekávo, aikóvo tembiguáirõ katu ha ame’ẽvo che rekove anohẽ haguã hetápe ivaívagui.

Ñandejára Jesucristo Ñe’ẽ