LECTURAS MARTES QUINTO DE PASCUA

LECTURAS MARTES QUINTO DE PASCUA

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha 14, 19-28

Oguahẽ Israel guáva Antioquía ha Iconiogua, ombopochýva hese kuéra opavavépe. Upérõ ombo’íta hikuái Páblope ha oimo’ãvo ojuka hague oguerotyryry táva rokápe. Umi Jesús reroviaha oñembyatývo Pablo jerére, ha’e opu’ã ha oike jevy upe távape. Upe ára ambuépe osẽ Bernabé ndive Derbe gotyo.

Omoerakuã rire marandu porã Dérbepe, oĩ rire heta Jesús reroviaha, ojevy Listra, Iconio ha Antioquíape. Ko’ã henda rupi omokyre’ỹ Jesús reroviahápe, oñemoñe’ẽvo ichupe kuéra oñemohatã haguã ijeroviápe, he’ívo, jaike haguã Tupã Ñandejára remisãmbyhýpe jahasa asy heta va’erãha. Omoingo avei hikuái moakãhára kuéra peteĩ teĩ iglésiape, ha ojapo rire ñembo’e ha karu’ỹ, oheja ichupe kuéra Tupä Ñandejára, ha’e kuéra ojerovia hague pópe.

Ohasávo Pisidia rupi oguahẽ hikuái Panfíliape. Omoerakuã upe Ñe’ẽ Pérgepe ha upéi oho Atalíape. Upépe ojupi ygápe Antioquía gotyo, upégui oñemondo va’ekue tembiapo aporã ha oñemoĩ va’ekue ichupekuéra Tupã Ñandejára po guýpe. Oguahẽvo Antioquíape omboaty upe iglésia ha omombe’u ichupekuéra opa mba’e Tupã Ñandejára ojapo va’ekue hendivekuéra, ha mba’éichapa Ñandejára oipe’a ra’e hokẽ Israelgua’ỹvape, ikatu haguã ha’ekuéra avei oguerovia. Pablo ha Bernabé opyta are upépe umi Jesús reroviaha ndive.

Tupã Ñandejára Ñe’ẽ.

SALMO ÑEMBOHOVÁI 144, 10-13ab. 21

Opavave: Opa ne rembiapokue ta ne momba’e guasu, Ñandejára.

O bien:

Aleluia.

Opa ne rembiapokue ta ne momba’e guasu, Ñandejára,

opa nde rehe ojeroviáva ta ne momba’e guasu.

Ha’e kuéra to moerakuã tuichaha upe ne retã,

ha’e kuéra toikuaauka nde ne mbareteha. O.

Upéicha ramo maymáva oikuaáne ne mbareteha, ha upe ne retã tuichaha.

Ne retã niko mba’e opa’ỹva, ha nde reporosãmbyhýta opa árape. O.

Amomba’e guasúta Tupã Ñandejárape.

Opa oikovéva to momba’e guasu héra marangatu,

ne irünguéra tomombe’u ne sambyhy herakuã porãha

ko’ágã guive ára paha peve. O.

ALELUIA Lc 24, 46. 26

Aleluia.

“Pe Mesia ohasa asy va’erã voínte, ha oikove jevy omanóva apytégui oike haguã isambyhýpe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha 14, 27-31a                      

Upe ramo ohasa mboyvemi Tupã Ñandejára ykére, Jesús he’i hemimbo’ekuérape:Py’aguapy aheja peẽme. Py’aguapy che arekóva ame’ẽ peẽme, ha name’ẽi oimeraẽva ome’ẽ háicha. Ani pekyhyje térã pejepy’apy.

Pehendúma ha’e hague peẽme ahataha, ha upéi aju jevytaha aime haguã pene ndive. Che rayhu ramo añete, pevy’a va’erã peikuaávo ahataha che Ru rendápe. Ha’e niko tuichave che hegui. Amombe’u hína peẽme ko’ã mba’e, ojehu mboyve. Péicharõ ojehu vove, perovia haguã ha’éva.

Nañe’ẽ puku mo’ã véima pene ndive, oúgui pe oguerekóva ipo guýpe ko yvy. Ha’e ndaikatúi ramo jepe ojapo che rehe mba’eve, péichante voi ojehu va’erã, opavave oikuaa haguã che ahayhuha che Rúpe.

Ñandejára Jesucristo Ñe’ẽ.