LUNES QUINTO DE PASCUA

LUNES QUINTO DE PASCUA

Primera lectura:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha   14, 5-18

Israelgua ha Israelgua’ỹva oñemoĩ peteĩ ñe’ẽme mburuvichakuéra ndive, oñemboharái haguã ha ombo’íta haguã Pablo ha Bernabépe. Pablo ha Bernabé oikuaávo upéva, okañy ha oho hikuái Listra ha Dérbepe, táva kuéra Licaonia pegua, ha ijerekuévo rupi, ha omoerakuã avei umi rupi upe marandu porã.

Lístrape oĩ peteĩ kuimba’e ikatu’ỹva oguata. Ndoguatái va’ekue araka’eve, ijapapágui oikove ypy guive. Ko kuimba’e oguapy hína, ohendúvo pe Pablo he’íva. Pablo oma’ẽ hese ha ohecha ogueroviaha ikatu haguã okuera. Upérõ he’i hatã ichupe: ¡Epu’ã ha eñembo’y!

Pe kuimba’e opo opu’ã ha
oñepyrũ oguata. Ohechávo upe Pablo ojapo va’ekue,
opavave oñepyrũ osapukái Licaonia Ñe’ẽme: ¡Tupã nguéra oguejy
ñane rendápe kuimba’érõ!

Ha oguereko Bernabépe tupã Zeus ramo ha Páblope Hermes ramo, ha’égui upe oñe’ẽva. Zeus pa’i, oguerekóva itupao táva reiképe, ogueru toro kuéra ha yvoty ombojegua haguã ichupe kuéra, ha opavave oikuave’ẽse ichupekuéra mymbajuka. Bernabé ha Pablo ohecha kuaávo upéva, omondoro ijaokuéra ha oike ijapytepe kuéra osapukáivo: Peẽ kuimba’e, mba’ére piko pejapo péicha?

Oréko yvypóra peẽichaguánte avei. Roju kuri pomomarandúvo pe marandu porã, pejehejáma haguã ko’ã výro reígui, ha pejevy Tupã Ñandejára oikovévare ojapo va’ekue yvága, yvy, yguasu ha opa ipype oĩva. Jepe yma Tupã Ñandejára oheja va’ekue peteĩ teĩ oho hapére, araka’eve ndohejái va’ekue ohechauka’ỹre, mávapa ha’e umi mba’e porã ojapóva rupi.

Ha’e niko upe omboúva peẽme ama, kóga mono’õ iporãva, ha upe ome’ẽva peẽme heta pe’u haguã ha pevy’a haguã.

Ha he’ivérõ jepe ichupekuéra, ndaikatúi ojoko ani haguã oikuave’ẽ mymbajuka.

Tupã Ñandejára Ñe’ẽ.

SALMO ÑEMBOHOVÁI   113 B, 1-4. 15-16

Opavave: Tupã, ore Jára, ne añónte reñe momba’e va’erã

O bien:

Aleluia.

Ore Jára, ani ore momba’e, nde Réra añónte oñemomba’e va’erã,

ne mborayhu ha nde reko jeroviaha rupi;

mba’ére piko tetã nguéra he’i: “Itupã piko moõ oime?”. O.

Tupã ore Jára oĩ yvága ha yvýpe, ha’e ojapo ojaposéva.

Umi ta’ãnga katu pláta ha óro, yvypóra rembiapokue. O.

Ta pende rovasa Tupä Ñandejára, yvága ha yvy apohare.

Yvága niko Tupã Ñandejára mba’e, yvy katu ome’ẽ yvypórape. O.

ALELUIA Jn 14, 26

Aleluia.

Espíritu Santo pene mbo’epáta opa
mba’e

pene momandu’áta opa mba’e Che ha’e va’ekue peẽme rehe.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Juan omombe’u háicha     14, 21-26 

Upe ramo guare ohasa mboyvemi Tupã
Ñandejára ykére, Jesús he’i hemimbo’e kuérape: Upe
ohendu ha ojapóva che Ñe’ẽ, ohechauka che rayhuha
añete. Che Ru ohayhúta upe che rayhúvape, ha che avei ahayhúta ichupe ha
ajechaukáta ichupe.

Judas, ndaha’éi Judas
Iscariote, oporandu ichupe: Ore Jára, mba’ére piko orévente rejechaukáta, ha
nderejechauka mo’ãi opa yvypórape?

Jesús he’i ichupe: Pe
che rayhúva ojapo che ha’éva ha che Ru ohayhúta ichupe. Ha che Ru ndive rojúne
roiko hendive. Pe che rayhu’ỹva ndojapói che ha’éva. Ko’ã mba’e ha’éva peẽme
ndaha’éi che jeheguínte ha’éva peẽme. Che Ru, che mbou
va’ekue ñe’ẽ hína umíva.

Ha’e peẽme
ko’ã mba’e aime aja pene ndive. Espíritu Santo katu, che Ru omboútava che
rérape pene pytyvõ haguã, ha’e pene mbo’éta opa mba’e ha pene momandu’áta opa
mba’e ha’e va’ekue peẽme.

Ñandejára Jesucristo Ñe’ẽ.