LECTURAS DOMINGO QUINTO DE PASCUA

LECTURAS DOMINGO QUINTO DE PASCUA

Primera lectura:

Ko’ágã ñahendúta Tupä Ñandejára ñe’ẽ Apóstolkuéra rembiapokuépe oĩ háicha 6, 1-7

Umi árape heta etereíma umi ogueroviáva. Umi Grecia ñe’ẽmegua hetave ohóvo ha oñepyrũ oñe’ẽsuguy umi hebréo ñe’ẽmeguáre, he’ívo noñeñangarekoiha hekópe kuña imenave’ỹva hesegua kuérava rehe, oñeme’ẽ jave ichupekuéra hembi’urã. Umi 12 apóstol omboaty pa ogueroviávape, ha he’i ichupekuéra:

Naiporãi ore roheja Tupã Ñandejára Ñe’ẽ moerakuã, roñangareko haguã umi okaru va’erã rehe. Upéva rehe, ore pehẽngue, peiporavo pende apytégui 7 kuimba’e ikatupyrýva ha henyhẽva Espíritu Sántogui, roheja haguã ipópekuéra ko’ã tembiapo.

Ore katu toroñembo’e ha toromoherakuã meme Tupä Ñandejára Ñe’ẽ.

Opavavépe iporã upéva, ha oiporavo hikuái Esteban, kuimba’e henyhẽva jeroviágui ha Espíritu Sántogui, avei Felipe, Prócoro, Nicanor, Timón, Pármenas, ha Nicolás, Antioquiagua ojeroviáva Tupä Ñandejára rehe judíokuéraicha. Umívape ogueru hikuái apóstolkuéra rendápe, ha ha’ekuéra oñembo’e ha omoĩ ipo hesekuéra.

Tupã Ñandejára Ñe’ẽ iñasãive ohóvo ha umi ogueroviáva oñemboheta Jerusalénpe. Pa’ikuérava jepe oĩ ogueroviáva.

Tupã Ñandejára Ñe’ẽ.

Todos: Romomba’e guasu ndéve, Ñandejára

SALMO ÑEMBOHOVÁI 33, 1-2. 4-5. 18-19

R. Tupã Ñandejára, ne mborayhu ta ore añuãmba.

Mayma imarangatúva tomomba’e Tupä Ñandejárape.
Omomba’e guasu va’erã voínte ichupe, opa imarangatúva.
Pemomba’e guasu Tupä Ñandejárape mbaraka púpe, árpa púpe, pepurahéi ichupe. R.

Upe Tupã Ñandejára he’íva niko añete, ha opa mba’e ojapo teko jeroviápe.
Ha’e ohecha ramo teko joja ha opa mba’e hendápe ojejapóva.
Yvy niko henyhẽ chovi imborayhúgui. R.

Tupã Ñandejára katu oñangareko umi ichupe omomba’évape
ha imborayhu rehe ojeroviávape.

Umívape ha’e ndo hejái omano.
Omoingove katu ichupekuéra ñembyahýi guasu ou jave. R.

SEGUNDA LECTURA:
Ñahendúta Tupã Ñandejára Ñe’ẽ San Pedro aranduka peteï hápe oĩ háicha 2, 4-10

Peñemboja aipo ramo Ñandejára Jesucrísto rehe, pe ita oikovéva ojahéi hague yvypóra, ha Tupã Ñandejárape guarãva ita iporavo pyre ha hepýva. Ha péicha, Tupã Ñandejára ojapóta pende hegui, ita oikovéva ramo guáicha, peteï tupao espíritu reheguáva, ha pa’i reko marangatu, Jesucrísto rupi oikuave’ẽva espíritu guiguáva kuave’ẽmby, Tupä Ñandejárape ombohorýva.

Upéva rehe avei Tupä Ñandejára Ñe’ẽ he’i: “Che amoĩ peteï ita Siónpe, ita tenondeguáva ojeporavo pyre ha hepýva, umi ojeroviáva hese ndopyta rei va’erãi”.

Peë ogueroviávape guarã, upe ita hepy, ha umi oguerovia’ỹvape guarã katu, oiko pe Tupã Ñandejára Ñe’ẽ he’íva:

“Pe ita umi óga apoha omboyke va’ekue, oiko pe ita tenondegua”.

Ha avei: “Peteï ita guasu, peteï ita ha’e kuéra oñepysãngatahápe”.

Ha’ekuéra niko oñepysãnga nohendúigui pe marandu: ha upéva voi hína pe
ohekáva.

Peë niko ñemoñare ojeporavo pyre, mburuvicha guasúpe guarã pa’i añetetéva, peteï tetã imarangatúva, Tupã Ñandejára ojogua va’ekue imba’erã. Ha upéva péicha, pemombe’u haguã mba’e hechapyrãva Tupã Ñandejára rembiapokue, pene renói va’ekue pesẽ haguã pytũhágui ha peike imba’e rendy hechapyrãvape.

Peë niko yma, nda ha’éi va’ekue Tupã Ñandejára reheguáva, ko’ágã katu peë Tupä Ñandejára rehegua. Yma, Tupã Ñandejára na pende poriahuverekói va’ekue, ko’ágã pende poriahuvereko.

Tupã Ñandejára Ñe’ẽ

Todos: Romomba’e guasu ndéve, Ñandejára.

ALELUIA Jn 14, 6

Aleluia.
Che hína upe tape, upe añete ha upe tekovete. Che rupi mante ikatu oñeguahẽ che Ru rendápe, he’i Tupä Ñandejára.
Aleluia.

EVANGELIO
Marandu porã Ñandejára Hesukrísto rehegua San Juan omombe’u háicha 14, 1-12

El pueblo aclama: Romomba’e guasu ndéve, Ñandejára.

Upe ramo pyhare osena aja, Jesús he’i hemimbo’ekuérape: Ani pejepy’apy. Pejerovia Tupä Ñandejára rehe ha pejerovia avei che rehe.

Heta rendaguã che Ru rógape oĩ, ha che aha ambosako’i peëme pene rendaguã. Nda upéichai rire, namombe’úi va’erã mo’ã peëme. Ha aha ha ambosako’i rire peëme pene rendaguã, aju jevýta pogueraha che ndive. Péicha ramo peëme peiméta pe che ahatahápe. Peë peikuaa pe tape oguerahava che ahatahápe.

Tomás he’i ichupe: Ore Jára, ndo roikuaái niko mamópa reho, mba’éicha piko aipo ramo
roikuaáta pe tape?

Jesús he’i ichupe: Che hína upe tape, upe añete ha upe tekovete. Che rupi mante ikatu
oñeguahẽ che Ru rendápe. Peë che kuaa ramo, che Rúpe avei peikuaáta. Ha

ko’agã ite guivéma voi peikuaa ichupe, pehechágui ichupe peikóvo.

Upépe he’i ichupe Felipe: Ore Jára, ehechauka oréve nde Ru, upéva iporãma oréve.

Jesús he’i ichupe:
Felipe, aréma niko aiko hague pene ndive, ha piko ne’ĩra che kuaa? Upe chéve che
recháva, ohecháma che Rúpe. Mba’éicha piko péicha ramo ejerure chéve ahechauka
haguã peëme che Ru? Ndereroviái piko che peteïnteha che Ru ndive, ha che Ru
peteïnteha che ndive? Umi mba’e ha’éva peëme, nda’éi che jehegui reínte.

Che Ru oĩva che pype, ha’e upe ojapóva opa mba’e. Perovia ha’e ramo peëme che peteïnteha che Ru ndive, ha che Ru peteïnteha che ndive.

Che ha’éva rupi ndaperoviaséi ramo, perovia umi mba’e ajapóva rupi. Añetehápe ha’e peëme: Pe che rehe ojeroviáva ojapóne avei umi mba’e che ajapóva. Ha tuichave mba’e katu ojapóne, che ahátagui che Ru rendápe.

Ñandejára Jesucrísto Ñe’ẽ.

Todos responden: Romomba’e guasu ndéve, Ñandejára Jesukrísto.