LECTURAS VIERNES CUARTO DE PASCUA

LECTURAS VIERNES CUARTO DE PASCUA

LECTURA PETEÎHA:

Ko’ágã ñahendúta Tupã Ñandejára ñe’ẽ Apóstolkuéra rembiapokuépe oĩ háicha  13, 26-33

Che pehẽnguekuéra:

Abraham ñemoñare, ha peẽ mombyrygua pemboajéva Tupã Ñandejárape, ko ñepysyrõ omombe’úva, ñandéve guarã hína.

Umi Jerusalénpe oikóva ha huvichakuéra niko ndoikuaái Jesúspe, ha ndoikuaái maranduhára ñe’ẽ oñehendukáva, judíokuéra tupaópe pytu’uha árape. Upéicha ha’ekuéra voi, ojerurévo Jesús ojejuka haguã, ojapo umi maranduhára he’i va’ekue. Ha ndojuhúi ramo jepe hese, mba’érepa ojukáta, ojerure Pilátope ojukauka haguã.

Upéi, ojapopa rire opa mba’e oje’éva hese Tupã Ñandejára kuatia Ñe’ẽme, omboguejy kurusúgui ha oñotỹ. Tupã Ñandejára katu omoingove jevy ichupe. Ha heta ára aja Jesús ojekuaauka, umi omoirũ va’ekuépe ichupe Galiléagui Jerusalénpe. Ha ko’ágã ha’ekuéra umi Jesús rechahare tetãgua renondépe.

Aipórõ ore romoerakuã hína peẽme ko marandu porã. Upe ñe’ẽ Tupã Ñandejára ome’ë va’ekue ñande rukuéra ypykuépe, péicha Tupã Ñandejára omoañete ñande ita’ýrape omoingove jeývo Jesúspe, oĩ háicha salmo mokõiháme: ‘Nde hína che Ra’y, che romoñemuña ko árape.

Tupã Ñandejára Ñe’ẽ.

SALMO ÑEMBOHOVÁI 2, 6-12a.

Opavave: ¡Nde hína che ra’y, Che romoñemoña ko árape!

O bien:

Aleluia.

“Amboguapýma Sión, che yvyty marangatúpe,

mburuvicha guasúpe che aiporavo va’ekue.”

Ahendukáta Ñandejára Ñe’ẽ. Ha’e he’i chéve:

“Nde hína che ra’y, Che romoñemoña ko árape. O.

Ejerure chéve ha ame’ẽta ndéve,

tetã nguéra ne mba’e teerã, ha yvy oĩ haguéicha.

Fiérro nde pópe ichupe kuéra reñakã jokáta,

 ha kambuchícha remoangu’íta.” O.

Upévare, peikuaa porãke mburuvicha guasukuéra!

Pehendu porãke tetã sãmbyhyharakuéra!

Pemomba’éke Tupã Ñandejárape.

Peñesũke henondépe, ani ágã péichahágui ipochy. O.

ALELUIA Jn 14, 6

Aleluia.

“Che hína pe Tape, pe Añetegua, ha pe Tekove.

Avave ndohói che Ru reendápe, ndaha’éi ramo che rehe ae”

He’i Ñandejára Jesucristo.

Aleluia.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha Jn 14, 1-6

Upe ramo guare ohasa mboyvemi Tupã Ñandejára ykére, Jesús he’i hemimbo’ekuérape:

“Ani pejepy’apy. Pejerovia Tupãre ha pejerovia avei che rehe. Heta rendaguã che Ru rógape oĩ, ha che aha ambosako’i peẽme pene rendaguã. Ndaupéichai rire, namombe’úi va’erã mo’ã peẽme. Ha aha ha ambosako’i rire peẽme pene rendaguã, aju jevýta pogueraha che ndive.

Péicharõ peẽme peiméta pe che ahatahápe. Peẽ peikuaa pe tape ogueraháva che ahatahápe”.

Tomás he’i ichupe: “Ore Jára, ndoroikuaái niko moõpa reho, mba’éicha piko aipo ramo roikuaáta pe tape”

Jesús he’i ichupe: “Che hína upe tape, upe añete ha upe tekovete. Che rupi mante ikatu oñeguahẽ che Ru rendápe”.

Ñandejára Jesucristo Ñe’ẽ.