MARTES SEGUNDO DE ADVIENTO

MARTES SEGUNDO DE ADVIENTO

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha 40, 1-11

Tupã Ñandejára he’i: “Pembovy’a, pembovy’a che retã guápe. Pe ñe’ẽ pende py’aite guive Jerusalénpe ha peje ichupe opamaha itembiguái reko, omyengoviapa maha hembiapo vaikuére, ohupitýma hague Tupã Ñandejáragui ñenupã jo’a opa iñangaipáre.”

Oĩ peteĩ osapukáiva: “Pembosako’i Tupä Ñandejárape haperã yvy ojeiko’ỹháme, pejapo yvy perõme tape po’i ñane Tupã Ñandejárape guarã. Pemoenyhẽ umi ipyko’ẽha, pemboguejy yvyty ha yvy pu’ã. Pejapo yvyty pa’ũgui ñu ojojapaitéva.

Upérõ Tupã Ñandejára ohechaukáta heko mimbipa ha upéva ohecháta opa yvypóra oñondive. Tupã Ñandejára voi upéicha he’i.”

Oĩ he’íva: “Ere hatã”, ha che ha’e: “Mba’e piko ha’e va’erã?”

“Opa yvypóra kapi’ícha, ha yvoty ñúicha hekove. Pe kapi’i ipiru, haviru pe yvoty Tupã Ñandejára oipeju ramo hi’ári. Yvypóra niko añete ku kapi’ícha. Pe kapi’i ipiru, haviru pe yvoty, Tupã Ñandejára ñe’ẽ katu opyta opa árape guarã.”

Ejupi yvyty yvatépe, nde, reraháva Siónpe marandu porã. Hatã esapukái, nde, reraháva marandu porã Jerusalénpe.
Esapukái kyhyje’ỹre, ere Judá pegua táva kuérape: “Péina upépe ne Tupã!”

Oguahẽma Ñandejára ipokatu reheve ha pyapy mbaretépe opa mba’e ipo guýpe omoĩ. Ogueru hendive hetãgua oguenohẽ va’ekue jejopy vaígui. Ovecha rerekuáicha ogueraha ijovecha kuéra omongarúvo, ohupi umi ovecha ra’y, ogueraha ijyva ári ha oñangareko ovecha imemby ramóvare.

Tupã Ñandejára Ñe’ẽ.

SALMO ÑEMBOHOVÁI 95, 1-3. 10ac. 11-13

Opavave: Pepurahéi Tupä Ñandejárape purahéi pyahu.

Pepurahéi Tupã Ñandejárape purahéi pyahu.
To purahéi Tupã Ñandejárape opa ko yvy.
Pepurahéi Tupã Ñandejárape,
héra pemomba’e. O.

Opa rupi pemombe’u ha’e oporoguenohẽha jejopy vaígui.
To je’e opa tetã rupi imba’e poräha:
“Tupã Ñandejára ñande ruvicha guasu hína”.
Ha’e oisãmbyhy teko jojápe tetã nguéra. O.

To vy’a yvága ha yvy.
To sununu pe yguasu ha opa ipype oĩva.
To vy’a umi ñu ha opa mba’e ipype oĩva.
Vy’águi to sapukái umi yvyra ka’aguy pegua. O.

To jepurahéi Tupã Ñandejára renondépe,
ha’e ou ko yvy oisãmbyhy haguã.
Teko jojápe ko yvy oisãmbyhýta,
ha añetépe tetã nguéra. O.

ALELUIA

Aleluia.
Tupã Ñandejára hi’aguïma: Ha’e ou ñane pysyrövo.
Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Mateo omombe’u háicha 18, 12-14

Upe ramo Jesús he’i hemimbo’ekuérape: Mba’épa peẽ peimo’ã ojapotaha peteĩ kuimba’e oguerekóva 100 ovecha, ha okañy ramo ichugui peteĩ?

Ohejáne ñúme umi 99, oho haguã oheka pe okañy va’ekue. Ha ojuhúvo, ovy’a iteve va’erã ko peteĩ ovecha reheve, umi 99 okañy’ỹ va’ekue reheve guágui. Péicha avei, pende Túva oĩva yvágape ndoipotái oñehundi peteĩnte jepe ko’ãvagui, mitãicha che rehe ojeroviáva.

Ñandejára Jesucristo Ñe’ẽ.