MARTES SEGUNDO DE PASCUA

MARTES SEGUNDO DE PASCUA

Primera lectura:

Ko’ágä   ñahendúta Tupã Ñandejára ñe’ẽ Apóstolkuéra rembiapokuépe oĩ háicha    

                            4, 32-37

Heta eterei umi ogueroviáva ha oiko oñondive peteĩ py’ápe ha peteĩ ñe’ẽme. Avave nde’íri imba’énteha upe oguerekóva, oñomba’epa ramo guáicha uvei oguereko. Apostol kuéra katu omombe’u meme tuicha pokatu reheve Ñandejára Jesús oikove jevy hague, ha Tupã oipytyvõ mbarete opavavépe.

Ndaipóri ijapytépe kuéra oikotevẽva, umi oguerekóva yvy térã óga niko ome’ẽ hepýre, ha omoĩ hepykue apóstol kuéra pópe, omboja’o haguã opavavépe, peteĩ teĩ oikotevẽ háicha. Upéicha ojapo va’ekue peteĩ levita hérava José Chipregua, apóstol kuéra ombohera va’ekue Bernabé, (he’iséva pe oporombovy’áva). Kóva oguereko ijyvy, ome’ẽ hepýre ha omoĩ hepykue apóstol kuéra pópe.

Tupã Ñandejára Ñe’ẽ.

SALMO ÑEMBOHOVÁI                 92, 1-2. 5

R. Mburuvicha guasu hína Tupä Ñandejára.

O bien:

Aleluia.

Mburuvicha guasu hína Tupä Ñandejára.

Ñandejára oñeñuã mimbipápe ha ojeku’akua pokatúpe.

Hatã yvy omohenda, ndoku’éi chéne araka’eve.

Nde guapyha oĩ yma ite guive ha nde katu opa ára reikove. R.

Ore Jára, umi ne rembiapoukapy niko mba’e ijeroviapyva hína.

Teko marangatu ombojegua nde tupao opa ára. R.

ALELUIA Jn. 3, 7b-15

Aleluia.

Oñeikotevë yvypóraicha ou va’ekue oñemopu’ä yvate,

ikatu haguä maymave ogueroviáva ichupe oreko Tekove ijapyra’ÿva.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                            

  3, 7b-15

Upe ramo guare Jesús he’i Nicodémope: Ani reñemondýi ha’e haguére ndéve opavave oikotevẽha oikove pyahu jevy. Yvytu niko oipeju, oipejuseha gotyo. Ha rehendu ramo jepe hyapu, nderehechái moõguipa ou térã moõpa oho. Péicha hína umi oikove pyahu jevýva Tupã Espíritu rupi.

Nicodemo he’i jevy ichupe: Mba’éichata piko upéva?

Ha Jesús he’i ichupe: Nde niko mbo’ehára guasu Israelgua apytépe. Mba’éicha piko ndereikuaái ko’ã mba’e? Añetehápe ha’e ndéve. Ore roñe’ẽ umi mba’e roikuaávare, ha romombe’u umi mba’e rohecha va’ekue. Peẽ katu ndaperoviái umi mba’e ro’éva peẽme. Peẽ niko nda che reroviái añe’ẽ ramo peëme umi mba’e ko yvy ári ojehúvare. Mba’éicha piko aipo ramo che reroviáta añe’ẽ ramo peẽme umi mba’e yvágape ojehúvare?

Avave gueteri ndohói yvágape, pe yvágagui oguejy va’ekuénte. Upéva che hína, yvypóraicha aju va’ekue yvy ári.Ha Moisés, yvy ojeiko’ỹháme, omopu’ã haguéicha yvate pe mbói ra’ãnga, upéicha avei che, yvypóraicha aju va’ekue ko yvy ári, añemopu’ã va’erã, ha opavave che rehe ojeroviáva, oikovéne opa ára.

Ñandejára Jesucristo Ñe’ẽ.