MARTES SEXTO DE PASCUA

MARTES SEXTO DE PASCUA

LECTURA PETEÏHA:

Ko’ágä   ñahendúta Tupã Ñandejára ñe’ẽ Apóstol kuéra rembiapokuépe oĩ háicha    

                            16, 22-34

Filipospe opavave opu’ã Silas ha Páblore, ha mbojovakehára kuéra he’i oñemboi haguã ijaógui ha oñenupã yvyrápe. Oinupã heta rire omoinge ichupe kuéra koty ypytũme ha he’i herekuápe oñangareko mbarete haguã hese kuéra. Ha’e aipórõ ogueraha ichupe kuéra upe koty ruguaitépe ha omoinge ipy yvyra kuápe.

Pyhare pyte rupi katu, Pablo ha Silas oñembo’e ha opurahéi Tupã Ñandejárape, ha umi oĩva avei koty ypytũme ohendu hína, péichahágui ou sapy’a peteĩ yvy ryrýi ne ratãva, omongu’epáva pe óga pyenda. Upe vove ojepe’apa okẽ nguéra, ha osopa umi upépe oĩva sã nguéra. Pe herekua opáy, ha ohechávo okẽ nguéra ojepe’apáva ohekýi ikyse puku ojejuka haguã, oimo’ãgui opavave okañy hague. Pablo katu osapukái ichupe:

Ani rejapo nde jehe mba’eve ivaíva, roimembáko hína ápe.

Upérõ pe herekua ojerure mba’e rendy, oike pya’e, ha oryryipávo kyhyjégui oñesũ Pablo ha Silas renondépe. Upéi oguenohẽ ichupe kuéra ha oporandu: Karái kuéra, mba’épa ajapo va’erã añepysyrõ haguã?

Ha’e kuéra he’i ichupe: Ejerovia Ñandejára Jesús rehe ha reñepysyrõta nde ha nde rogagua.

Ha oñe’ẽ hikuái Ñandejára Ñe’ẽre ichupe ha opa hógape oĩvape. Upe pyharépe voi upe herekua oipohano ichupe kuéra iñenupãngue, ha upéi ha’e ha hogagua oñemongaraiuka. Upe rire ogueraha hógape ha omongaru. Ha’e ha hogagua kuéra ovy’a eterei oguerovia haguére Tupãme.

Tupã Ñandejára Ñe’ẽ.

SALMO ÑEMBOHOVÁI        137, 1-3. 7c-8

R. Che py’a ite guive romomba’e guasúta Tupä ore Jára.

O bien:

Aleluia.

Che py’a ite guive romomba’e guasúta Tupä ore Jára,

tupã nguéra renondépe rogueropurahéita.

Nde tupao renondépe añesũne, nde réra amomba’e guasúne. R.

Nde niko mborayhu ha añete, ha nde réra

ha ne Ñe’ẽ remoĩ opa mba’e ári.

Ndéve añembo’e ha nde che rendu, che py’a remombarete,

ha nde pyapýpe che renohẽ jejopy vaígui. R.

Nde akatúa che pysyrö.

Tupä Ñandejára ojapóta opa mba’e che rehehápe.

Ore Jára, ne mborayhu niko ndopái araka’eve.

Ani reheja rei upe ne rembiapokue remoñepyrũ va’ekue. R.

ALELUIA Jn 16, 7. 13

Aleluia.

Ñandejára Jesucristo he’i:

“Amboúta peëme Espíritu Añete orekóva;

oikuaaukáta peëme Ha’e opa mba’e añetegua”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Juan omombe’u háicha. Pejapysaka porãtapa hese?                                                       16, 5-11

Upe ramo ohasa mboyvemi Tupã Ñandejára ykére, Jesús he’i hemimbo’e kuérape: Ko’ágã katu niko aháta aime haguã upe che mbouhare ndive, ha peẽ napeporandúi chéve moõpa aháta.

Upéva rangue, ha’e haguére peẽme ko’ã mba’e peñembyasy. Añetéko ha’e peẽme: Iporãvéta niko peẽme che aha ramo. Ndahái ramo, pene Pytyvõhára ndou mo’ãi oĩ haguã pene ndive.

Che aha ramo katu, che amboúta ichupe peẽme. Ágã ha’e ou vove, ohechauka porãta Opavavépe mávapa umi iñangaipáva, máva áripa ndo’ái mba’eve ivaíva, ha mávapepa Tupã Ñandejára ohundíta. Mávapa umi iñangaipáva? Umi che rehe ojerovia’ỹva. Máva áripa ndo’ái mba’eve ivaíva?

Che ári, che ahátáva che Ru rendápe, ha nda che recha mo’ãvéi. Mávapepa Tupã Ñandejára ohundíta? Upe oguerekóva ipo guýpe ko yvy, ha Tupã he’ímava oñehundi haguã.

Ñandejára Jesucristo Ñe’ẽ.