LECTURAS MARTES VIGÉSIMO NOVENO DURANTE EL AÑO

LECTURAS MARTES VIGÉSIMO NOVENO DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Roma guápe 5, 12. 15b. 17-21

Che pehẽnguekuéra: Peteĩ kuimba’e año rupi, niko oike pe angaipa apo ko yvy ári. Ha upe angaipa apo rape rupi, oike pe mano. Ha upéicha, mano ohasa opavavépe, opavave iñangaipa rupi.

Pe Adán rembiapo vaikue ndaikatúi ñambo joja, pe jopói Tupã Ñandejára ome’ë va’ekuére ñandéve. Peteĩva angaipáre año heta omano va’ekue, ha pe mba’e Tupã Ñandejára ome’ẽ va’ekue ñandéve rei ete katu, peteĩ año rupi, Jesucristo, upéva tuichave mba’e ha iporã opavavépe.

Ñemano oike peteĩva rembiapo vaikue año rupi. Ha tuichave mba’e pe peteĩ, Jesucristo, ojapo va’ekue. Opa umi ohupity va’ekue Tupã Ñandejára mba’e porãngue rei ete, umíva ohupitýta jeikove opa’ỹva Jesucristo rupi.

Ha pe Adán rembiapo vaikue omoĩ haguéicha yvypórape oñehundi haguã, upéicha avei Jesucristo rembiapokue hekopegua, omboheko joja opa yvypórape oikove haguã. He’ise, peteĩ ete iñe’ẽ rendu’ỹ haguére, maymáva iñangaipa. Ha upéicha avei, peteĩ ete iñe’ẽ rendu haguére, maymáva oñemboheko jojáta.

Tembiapoukapy oñemoĩ hetave haguã iñangaipáva, ha heta hetavévo, Tupã Ñandejára ipy’a porãve. Ha pe angaipa ipu’aka haguéicha ha ogueru ñemano, upéicha avei Tupã Ñandejára py’a porãngue ñane sãmbyhy, ñane mboheko jojávo ha ome’ẽvo ñandéve jeikove opa’ỹva, Ñandejára Jesucristo rupi.

Tupã Ñandejára Ñe’ẽ.

SALMO ÑEMBOHOVÁI 39, 7-10. 17

Opavave: Tupã Ñandejára, ápe aime ajapo haguã ne rembipota.

Rejerure rangue mymba juka ha mba’e kuave’ë
térã mymba hapy tembiapo vai jeheja reirã,
hendaguépe reju che resape’a.
Upévare ha’e ndéve: “Nde pópe añemoĩ.” O.

Nde apoukapýpe ojehai
opa mba’e ajesareko ha ajapo va’erã.
Tupã Ñandejára, nde reikuaa akirirĩ rangue,
opavavépe aikuaauka hague nde reko joja. O.

Vya’apópe amomarandu nde reko joja.
Umi ne momba’éva katu tovy’a,
akóinte te’i umi nde rehe ojekóva:
“Ajépa imba’e porãite Tupã Ñandejára”. O.

ALELUIA Lc 21, 36

Aleluia.
Peiko jesarekopýpe ha opa ára peñembo’e.
Péicha peñe mbojovakéta pekyhyje’ÿre Ñandejára Jesucristo rovake.
Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 12, 35-38

Upe ramo Jesús he’i hemimbo’ekuérape:
“Peime va’erã umi tembiguáicha, oha’arõva ijárape ou jevy pe karu guasu menda rehe guápe oho haguégui, tataindy rendy reheve, okẽ oipe’a haguã ichupe ombota vove oguahévo.

Ovy’aite va’erã niko umi tembiguái, ojevývo ijára ojuhúva opáy. Ha’e peẽme, pe ijára voi omboguapytaha ichupe kuéra mesápe ha oñemoĩta ome’ẽ peteĩ teĩme pe tembi’u. Ovy’a iténe ha’e kuéra ojejuhúrõ opáy, ijára oguahẽrõ jepe pyhare pyte térã ko’ẽ mbota.

Ñandejára Jesucristo Ñe’ẽ