MIÉRCOLES VIGÉSIMO NOVENO DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Roma guápe 6, 12-18

Che pehẽnguekuéra: Ani peheja pe angaipa ipu’aka pende rete omano va’erãre, ha ojapouka peẽme pende rete rembipota. Ani peheja angaipa oiporu pende rete mba’e vairãme.

Upéva rangue, peñe me’ẽ Tupã Ñandejárape, yvypóra omano ha oikove jevy va’ekuéicha. Ha peme’ẽ ichupe pende rete ojapo haguã heseve upe heko jojáva ichupe guarã. Upéicharõ, pe angaipa ndaipu’akavéi chéne pende rehe, napeñeñapytĩ mo’ãi tembiapoukapýpe, peiméta uvei Tupã Ñandejára mba’e porãre.

Mba’e piko aipórõ? Ñane angaipáta piko nañaiméi haguére tembiapoukapýre, ha ñaime Tupã Ñandejára mba’e porãre? Nahániri upéva! Peẽ peikuaa porã, peñe me’ẽ ramo tembiguáirõ peteĩ mba’e járape pene ñe’ẽ rendu haguã ichupe, upéicharõ peẽ upe pene ñe’ẽ renduha rembiguái.

Ha upéva péicha, pene ñe’ẽ rendu ramo Angaipápe pe manóta, térã pene ñe’ẽ rendu ramo Tupã Ñandejárape peikovéta. Ha Tupã Ñandejára rehe ae, peẽ yma peiko va’ekue angaipa poguýpe, pene ñe’ẽ rendúma pende py’aite guive, opa umi peñe mbo’e haguépe. Pejei vove angaipa poguýgui, peẽ peike pemba’apo teko jojáre.

Tupã Ñandejára Ñe’ẽ.

SALMO ÑEMBOHOVÁI 123, 1-8

Opavave: Tupã Ñandejára hína ñane pytyvõhára

Ñandejára noñemoĩri rire ñande ykére,
yvypórakuéra opu’ã ramo guare ondyry ñande rehe,
ipochy hendy haguére ñane ndive hikuái,
ñande pýra ite ñane mokõ va’erã mo’ã
pe ipochy eterei jave ñande rehe. O.

Y ñande aho’ipa va’erã mo’ã,
ysyry ñande reraha va’erã mo’ã,
y pochy ñane moñapymi va’erã mo’ã.
To ñemomba’e guasu Tupã Ñandejára
ndohejáigui ja’a hãinguápe. O.

Ku guyráicha ojehekýiva ñuhãgui,
upéicha avei niko ñande.
Upe ñuhã opẽ ha ñande ñasẽ javeve jaha.
Upe ñane pytyvõva niko
Tupã Ñandejára, yvága ha yvy apohare.” O.

ALELUIA Mt 24, 42a.44

Aleluia.
Peikóke pejesarekohápe ha peñe mbosako’ihápe
Ñandejára Jesucristo ou jevýta pe oñeimo’ä’ÿha jave.
Aleluia.

EVANGELIO

Ñandejára Jesucristo rekove ha hemimbo’e San Lucas omombe’u háicha 12, 39-48

Upe ramo Jesús he’i hemimbo’ekuérape: Perekóke kóva pene akãme: Peteĩ óga jára oikuaa ramo araka’etépa oikéta hógape mondaha, ha’e ndoke mo’ãi ha ndoheja mo’ãi avavépe oike hógape omonda haguã ichupe. Peẽ avei pejesareko va’erã. Peimo’ã’ỹve jave niko che, yvypóraicha aju va’ekue, ajúta.”

Pedro oporandu Jesúspe: Che Jára, ere piko ra’e ko ñe’ẽ mbojoja oréve guarãnte, térãpa opavavépe guarã?

Jesús he’i: Mávapa hína pe tembiguái ijeroviaháva ha imba’e recha kuaáva? Upéva hína pe ijára omoĩva ipo guýpe ambue hembiguáikuéra omongaru haguã oikotevẽ jave. Ovy’a ite va’erãnepa pe tembiguái, ijára oguahẽ vove ojuhúva ojapopaha hekópe hembiapo.

Añetete ha’e peẽme, pe óga jára omoĩne ipo guýpe opa oguerekóva. Pe tembiguái oimo’ã ramo ijára hi’aretaha ha oñepyrũ oñemboharái hapicháre, ha osẽ okaru ha omboy’u umi tekove ka’u ndive. Ha ijára ou jevýne ha’e oimo’ã’ỹve ha oha’arõ’ỹve jave, ha omoangu’íne ichupe teju ruguáipe, oñemboepoti háicha hova mokõivape.

“Pe tembiguái oikuaáva ijára rembipota, ha noñembosako’iri ha naiñe’ẽ rendúi ichupe, oñenupã hetáne. Ha pe tembiguái, oikuaa’ỹre ojapóva ojapo’ỹ va’erã, oñenupã’ivéne. Pe oñeme’ẽ hetávape, heta avei ojejeruréne. Ha pe ojejeroviaveha ndive ojejopyvéne.”

Ñandejára Jesucristo Ñe’ẽ.