LECTURAS MARTES VIGÉSIMO QUINTO DURANTE EL AÑO

LECTURAS MARTES VIGÉSIMO QUINTO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Esdras arandukápe oĩ háicha 6, 7-8. 12b. 14-20

Darío, mburuvucha guasu Persiapegua ohai marandu ambue mburuvichakuérape: Peheja ichupekuéra, huvichakuérape ha umi ichupekuéra omoakãvape to mba’apo ha to mopu’ã Tupã tupao pe opu’ã ypy haguépe. Kóicha aipota peipytyvõ umi judíokuérape omoakãvape omopu’ã haguã Tupã Ñandejára tupao: opa impuésto oñemoguahẽva ndéve, umívagui to ñeme’ẽ ichupekuéra ojogua haguã hemikotevẽ. Che, Darío kóicha ha’e ha aipota kóicha ojejapo.”

Umi judíope omoakãva katu, omba’apo meme tupao rehe he’i haguéicha ichupe kuéra Ageo ha Ído ra’y, Zacarías, maranduhára mokõi. Pe jasyho hérava Adárpe, mbohapy arahápe ojapopa hikuái pe tupao, 6 áño Darío ojupi haguépe mburuvicha guasúrõ tetã Pérsiape.

Israel guáva guive, pa’i ha lévitakuéra ha opa umi ou jevy va’ekue hetãme Babilóniagui, tuicha vy’ápe oiporu ñepyrũ Tupã Ñandejára tupao.

Oikuave’ẽ hikuái Tupã Ñandejárape mymbahapy ramo: 100 tóro, 200 ovecha ha 400 ovecha ra’y. Ha Israelguakuéra angaipáre, oikuave’ẽ hikuái 12 kavara mácho umi 12 Israel ñemoñare rérape. Ha Moisés oheja haguéicha kuatiápe, péicha omoĩ hikuái hendápe opa pa’i ha lévita kuérape hembiapo ojapo haguã Tupã Ñandejára tupaópe Jerusalénpe.

Mayma oho jevy va’ekue hetãme Babilóniagui, ombyarete hikuái Páskua pe mes peteĩme 14 arahápe. Pa’i ha levita kuéra oñemopotĩmba rire, ojuka hikuái mymbakuéra. Ko’ãva oñekuave’ẽ Tupã Ñandejárape pe Páskuape, opa ou jevy va’ekue Babilóniagui rérape.

Tupã Ñandejára Ñe’ẽ.

SALMO ÑEMBOHOVÁI 121, 1-5

Opavave: Vy’ape jaha Tupaópe

Avy’a ite chéve oje’e ramo:
“Jaha Tupã Ñandejára tupaópe”.
Ore py romboguapy ha ropyrüma
Ne rokẽmema roñembo’y Jerusalén!. O.

Jerusalén niko táva neporãva,
oñemopu’ã pyenda porãme.
Upépe ojupi Israel ñemoñareguakuéra,
Tupä Ñandejára réra omomba’e guasúvo. O.

Ñandejára réra omomba’e guasúvo,
ojeheja haguéicha ichupekuéra tembiapoukapy ramo.
Upépe oguapy mburuvicha guasu David rogagua,
tekojojápe oporombojovake haguã. O.

ALELUIA Lc 11, 28
Aleluia.
Ovy’aite umi ohendúva ha ojapóva Tupä Ñandejára Ñe’ë.
Aleluia.

EVANGELIO

Marandu porã Ñandejára Jesucristo rekove ha hemimbo’e San Lucas omombe’u háicha 8, 19-21

Upe ramo Jesús sy ha ityvýra kuéra oho pe ha’e oĩháme, ha ndaikatúi oñemboja hese, heta itereígui umi oĩva upépe. Ha he’i hikuái Jesúspe: Nde sy ha nde ryvy kuéra na’ápe okápe hína, ha nde rechase.

Jesús katu he’i: Umi ohendu ha ojapóva Tupã Ñandejára marandu porã, umíva hína che sy ha che ryvy.

Ñandejára Jesucristo Ñe’ẽ