Miércoles Epifanía rire

Escucha el evangelio y la reflexión en: https://youtu.be/3EpwYW0E_SA

Miércoles Epifanía rire

San Marcos 6, 45-52

Omongaru rire cinco mil kuimba’épe hyguatã meve hikuái, Jesús he’i idisípulokuérape ojupi haguã peteĩ kanóape ha ohasa haguã henonderã lágo mboypýri, Betsai gotyo. Upe aja ha’e he’íta opavavépe oho haguã hógape. Omondopa rire opavavépe hógape, Jesús ojupi peteĩ sérrope oñembo’e haguã. Pyhare oguahẽvo, pe kanóa ohupytýma pe lágo mbyte rupi.

Pe y pochy katu oñenupã pe kanóa tĩre, ohuguãitĩgui ohóvo hikuái yvytu atã, ha ohecha umi kanóa pegua oho mbegueha, yvytu ojokógui chupekuéra. Ko’ẽ mbotávo, Jesús oñemboja hendápekuéra oguatahápe pe y apére. Ha oñemotenondese hesekuéra.

Umi disípulo ohechávo oguataha pe y apére, oimo’ã hikuái póra, ha osapukái, opavave
ohechágui chupe ha oñemondýi. Jesús katu pya’e oñe’ẽ chupekuéra he’ívo: Chénteko, ani
pekyhyje!

Ojupi kanóape ha opi pe yvytu, ha ha’ekuéra ijurujái opytávo, ndoikéigui iñakãme
pe milagro pankuéra rehegua, iñypytũ ichuguikuéra ipy’a.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

“Ndaikuáai ojehúva chéve che ko’ẽnte sapy’a che ygue ygue rei, imposible ndavy’aí”. He’i ningo Emiliano-re purahéi. Ha ou sapy’ánte añete ho’a ñande rehe pytũ. Ñakañy vaicha ha mba’eve nde’iséi ñandéve. Nañanderetia’éi mba’everã ha ñande aho’i vy’a’ỹ. Mombyry vaicha oĩ ñande hegui Ñandejára upéicha jave.

Jahecha pytũ riréma apóstol kuéra opyta y mbytépe ha’eño. Hesu ndaipori hendivekuéra. Ha ou peteĩ yvytu ne ratãva háime ombojeréva pe kanóa ouha hikuái. Hendy kavaju resa. Ha mba’érepa upéicha ou ñandéve umi ára pohýi. Mokõi mba’ére e’i San Ignacio:

Tenonderã ñande voi ikatu ñambohape pe ára pohýi ñande fayuto-gui. Ndajajapóigui hekópe upe Ñandejára omoĩva ñande pópe, ha ñañeñandu’ívo jahechápa nañamyatyrõi ñande rekove. Ha upéi, he’i San Ignacio, ikatu Ñandejára voi oheja ñandéve umi jehasa asy, jahechakuaa haguã ñande ndaikatuiha ñamoĩ térã jaipe’a vy’a térã vy’a’ỹ ñande py’águi.

Upéva Ñandejára mante ikatu ojapo.
Ipahápe Hesu ou oipytyvõ iñirũ nguérape. Oipe’a apóstolkuérape ojejopyhágui ha ombopy’aguapy ichupe kuéra. Mba’épepa rehecha che reindy ha nde che irũ tekotevẽha
eñeha’ã ha ani eñeme’ẽ py’a kangýpe. Eho rei haguã hese ne rembiapópe, hasýramo jepe,
ejerovia pype Hesu outaha hína ne pytyvõ ha nembopy’aguapy ágãite agãvépe.

Pa’i Jasy.