MIÉRCOLES NOVENA SEMANA

MIÉRCOLES NOVENA SEMANA

Ñahendúta Tupã Ñandejára Ñe’ẽ San Pablo ohai va’ekue Timotéope                  1, 1-3. 6-12

Che Pablo, Cristo Jesús apóstol, Tupã Ñandejára che mboúva amoherakuã haguã pe jeikovete ikatúva ñaha’arõ Cristo Jesús rupi, amomaitei Timotéope, che ra’y ahayhu etéva. Tupã ñande Ru ha Ñandejára Jesucristo to ñohẽ nde ári imba’e porãngue, ta nde poriahuvereko ha to me’ẽ ndéve py’a guapy.

Ára ha pyhare, nde rehe añembo’évo, amoguahẽ che aguyje  Tupã Ñandejárape. Che ypykuéra oiko haguéicha ha py’a potĩme, che aiko hembijokuái ramo.

Upévare ha’e ndéve, remombáy jevy haguã pe ne rembiaporã Tupã Ñandejára ome’ẽ va’ekue ndéve che rupi, amoĩ ramo guare che po nde rehe. Pe Espíritu Tupã Ñandejára ome’ẽva ñandéve niko ndaha’éi jakyhyje haguã avavégui, ñande py’a ñamombarete haguã katu, ha japorohayhu ha ñane akã guapy haguã.

Ani retĩ reñe’ẽ haguã Ñandejára Jesucristo rehe, ha ani che rerotĩ añemoakãsã haguére Cristo rehehápe. Nde aveíkena ehasa asy remoherakuã haguére pe marandu porã. Tupã Ñandejára ne mombaretéta upéva reropu’aka haguã.

Tupã Ñandejára niko ñane pysyrõ va’ekue, ha ñande poravo imba’erã. Péicha ojapo, ndaha’éi omoengovia haguã ñandéve mba’eve ñande japo va’ekue. Ha’e ojaposéguinte péicha ojapo, ha imba’e porãgui.

Tupã niko, Cristo Jesús rupi, imba’e porã ñane ndive opa mba’e oñepyrũ mboyve guive. Ha mba’éicha ite pevépa ha’e imba’e porã, ko’ágä  ojehechauka ñandéve Cristo Jesús rupi, pe ñane pysyrõva. Ha’e upe ohundi va’ekue ñemano ha marandu porã rupi ohechauka pe jeikove opa’ỹva.

Tupã Ñandejára che moĩ va’ekue chéve amoherakuã haguã ko marandu porã, ha che mondo apóstol ha mbo’ehára ramo. Upévare ahasa opa ko’ã mba’e hína, ha péicharõ jepe, natĩri. Che aikuaa porã mávarepa ajerovia, ha aikuaa porã ha’e oñangarekotaha pe che pópe omoĩ va’ekuére, ñembojovakeha ára peve.

Tupã Ñandejára Ñe’ẽ

SALMO ÑEMBOHOVÁI     122, 1-2

R. Tupã Ñandejára rehénte ore romaña.

Nde rehe ajesaupi, ndéve, reguapýva yvágape.

Ku tembiguái ijára rehe omaña háicha

oma’ë porä ijára po rehe. R.

Ku mitãkuña imongakuaaharére

omaña háicha ijára po rehe, upéicha ore romaña Tupã, ore Járare,

ha’e ore poriahuvereko peve. R.

ALELUIA Jn 11, 25a. 26

Aleluia.

Ñandejára Jesucristo he’i:

“Che hína Jeikove jevy ha Tekove.

Pe che reroviáva nomano mo’äi araka’eve”.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       12, 18-27

Upe ramo Jesús rendápe oho umi saduséo kuéra, ha’e kuéra niko ndogueroviái omanóva oikove jevyha, upévare he’i Jesúspe: Mbo’ehára, Moisés niko he’i va’ekue, peteĩ kuimba’e omendáva omano ramo hembireko imemby’ỹre ichugui, tyvýra omenda va’erã hembirekorére omoñemoñare haguã tyke’ýra omano va’ekuépe.

Oiko va’ekue niko 7 kuimba’e ojoryvýva. Ha pe ijypykue omenda ha omano oheja’ỹre ñemoñare. Upe marõ pe mokõiha omenda hembirekorére, ha’e omano avei oheja’ỹre ñemoñare. Upéicha avei ojehu pe mbohapyhápe, ha opavavépe ipahague peve, avave oheja’ỹre ñemoñare. Amo ipahápe omano avei pe kuña. Ha néi, ágã ojeikove jevy vove, ko’ã 7 apytégui, máva rembirekótapa hína pe kuña?

Jesús he’i ichupe kuéra: Pejavy ndapeikuaáigui Ñandejára Ñe’ẽ térã Tupã pokatu. Ágä jeikove jevy vove, kuimba’e ha kuña nomenda mo’ã véima ojuehe. Oikóta ichugui kuéra, Tupã Ñandejára remimbou yvágape guáicha.

Ha nda peroviaséi ramo omanóva oikove jevyha, piko nda pehechái mba’épa he’i Moisés kuatia ñe’ẽme, oñe’ẽhápe pe jukeri hendy ramo guare? Tupã Ñandejára he’i Moiséspe upérõ: ‘Che hína Abraham, Isaac ha Jacob Tupã’. Ha’e niko ndaha’éi omanóva Tupã. Oikovéva Tupã katu. Tuicha eterei pejavy.

Ñandejára Jesucristo Ñe’ẽ