MIÉRCOLES SEMANA XXX TO

Ñahendúta Tupã Ñandejára Ñe’ẽ San Pablo ohai va’ekue Éfeso guápe                           6, 1-9

Peẽ ta’ýra ha tajýra kuéra, pemomba’éke pende ru ha pende sýpe, pejeroviáre Crístore. Upéva niko hekopeguánte voi. Tupã Ñandejára rembiapoukapy tenondegua niko he’i: “Emomba’e nde ru ha nde sýpe”, ha upéva jajapo ramo he’i: “Reikove puku haguã ha revy’a haguã ko yvy ári.”

Ha peẽ túva kuéra, ani pembopochy rei pende ra’y kuérape. Pemongakuaa ha peheko mbo’e uvei Tupä Ñandejára oipota háicha.

Peẽ tembiguái, pejapóke he’íva peẽme umi oĩva pende járarõ ko yvy ári. Pemomba’e ichupe kuéra ha pende py’a ite guive pejapo he’íva peẽme, ku Crístope guarã pejapórõ guáicha. Ani omaña aja pende rehénte pejapo umi mba’e he’íva peẽme, pepyta porã haguã hendivekuéra.

Peiko uvei Cristo rembiguáicha ha pejapo umi mba’e Tupã Ñandejára oipotáva. Kyre’ỹmeke pemba’apo, ku Tupä Ñandejárape guarã pemba’apo ramo guáicha, ha ndaha’éi karái kuérape guarã. Pene mandu’áke Tupä Ñandejára ohupitykataha peteĩ teĩme hembiapo porãngue reko itépe, taha’e tembiguái térã tembiguai’ỹvape.

Ha peẽ tembiguái járakuéra, péicha aveíke peiko pene rembiguái ndive, ha anive pemongyhyje ichupe kuéra peinupãtaha. Pene mandu’áke peẽ avei, ha’e kuéraicha, peimeha Tupä Ñandejára yvagapegua po guýpe, ha ichupe guarã peteĩchante opavave.

Tupã Ñandejára Ñe’ẽ.

SALMO ÑEMBOHOVÁI       144, 10-14

R. Ñandejára nopyrũiva iñe’ẽre, ha’e ipy’a porã opa mba’épe.

Opa ne rembiapokue ta ne momba’e guasu, Ñandejára,

opa nde rehe ojeroviáva ta ne momba’e guasu.

Ha’e kuéra to moerakuã tuichaha upe ne retã,

ha’ekuéra toikuaauka nde ne mbareteha. R.

Upéicha ramo maymáva oikuaáne ne mbareteha, ha upe ne retã tuichaha.

Ne retã niko mba’e opa’ỹva, ha nde reporo sãmbyhýta opa árape. R.

Tupä Ñandejára nopyrũiva iñe’ẽre, ha’e ipy’a porã opa mba’épe.

Tupä Ñandejára ojoko umi ho’ávape, ikangývape omopu’ã jevy. R.

ALELUIA Cf. 2Tes 2, 14

Aleluia.

Tupä Ñandejára ñane renói Marandu porä rehe ae,

jaguereko haguä Ñandejára Jesucristo Sambyhy.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                    13, 22-30

Upe ramo Jerusalén rapére ohóvo, Jesús oporombo’e umi táva ha tava’i ohasaha rupi. Peteĩ osẽ oporandu ichupe: Che Jára, ndaheta mo’ãi piko umi oñepysyrõtava? Ha’e katu he’i ichupe: Peñeha’ã peike pe okẽ po’i rupi.

Che ha’e peẽme hetataha umi oikeséva, ndaikatu mo’ãi ramo jepe oike. Óga jára opu’ã ha omboty rire okẽ, peẽ, okápe peiméva, pesapukáita pejévo: ‘Karai, eipe’ána oréve pe okẽ.’ Ha’e katu he’íta peẽme: ‘Che ndaikuaái mamoguápa peẽ.’

Upépe peñe pyrũta peje: ‘Rokaru ha romboy’u va’ekue  niko ne ndive, ha nde ore mbo’émi ore táva roka rupi.’ Ha’e katu he’íta peẽ: ‘Che ndaikuaái mamoguápa peẽ pe che reja, peẽ tekove ahẽ ha upépe ojahe’o soróta ha hãi mante omopururũa, ojehechávo Abraham, Isaac, Jacob ha opa maranduhára oĩva Tupã Ñandejára oisãmbyhyhápe, ha peẽ peñe mosẽta okápe.

Oúta yvypóra yvatevegua, yvy gotyogua, kuarahy resẽogua ha kuarahy reikevogua, oguapy haguã okaru Tupã Ñandejára sãmbyhýpe. Upévo, umi ko’ágä  itapykuéva, itenondéta. Ha umi ko’ágä  itenondéva, itapykuéta.

Ñandejára Jesucristo Ñe’ẽ.