MIÉRCOLES VIGÉSIMO QUINTO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Esdras arandukápe oĩ háicha 9, 5-9

Che, Esdras, apu’ã, ha che ao sorokue che jehe, añesũ ha ahupi che po yvágare, añembo’évo Tupã che Járape. Ha’e ichupe: “Tupã che Jára, atĩ eterei ningo ne rendápe añemboja haguã. Ha ndaikuaái mba’épa ajapóta. Rasa itereíma ore rembiapo vai.

Yvága pevéma niko oguahẽ. Yma ite guive, ore rukuéra ypykue oikove ramo guare guive, ko’agãite peve ningo roja’yvere ne ndive. Ha upévare voi ore moĩ va’ekue oréve, ore ruvicha ha ore pa’ikuérape ambue tetãgua pópe. Hetáma rojeporu vai. Rojereraha águio pégotyo.

Roñemonda ha maymávante ore apo’i. Ha péicha ko’ágã roju rojejuhu. Ko’ágã katu Tupã ore Jára, ne mba’e porã rupi ore gueru oréve, tembiguái ramo roikohágui ha ore mohenda ko nde yvy marangatúpe. Nde rupi Tupã Ñandejára, ha’ete ku rohecha pyahu jevýva. Ha jepe roime ambue tetã po guýpe, nde rembovevýi oréve pe ore jopýva. Tembiguái ramo roiko ramo jepe, nde Tupã Ñandejára nda ore rejái ore año. Mburuvicha guasukuéra tetã Persia pegua ndive ore moĩ porã. Nde ore mokyre’ỹ romopu’ã jevy haguã nde tupao, ojeity ha isarambipáva. Ha ko’ápe, Judá ha Jerusalénpe, nde reñangareko ore rehe.

Tupã Ñandejára Ñe’ẽ.

SALMO ÑEMBOHOVÁI Tob 13, 2-4d. 5. 8cd

Opavave: Ñamomba’e guasu Tupä Ñandejárape, Ha’e Tupã oikovéva opa ára.

Ha’e ñane nupã ha ñande poriahuvereko,
ñane mboguejy omanóva ohohápe,
ha ñande pe’a ñañe hundi haguãgui.
Ndaipóri avave okañýva ichugui . O.

Pemomba’e guasu ichupe,
Israel ñemoñare, opa tetã renondépe.
Ha’e pene mosarambi va’ekue opa rupi,
ha ojechauka peë me mba’éichapa tuicha ha’e. O.

Pemomba’e guasu ichupe maymáva renondépe.
Ha’e Tupã Ñandejára ha ñande ru oikovéva opa ára.
Pemomba’e guasu Ñandejárape hekojojágui, peropurahéi
pe mburuvicha guasu opa ára oikovévape. O.

Peẽ pene rembiapo vaíva, pejeheja pende reko vaígui
ha peiko tekojojápe hesa renondépe.
Ikatu mba’e niko pe’a porã ichupe
ha pende poriahuvereko. O.

ALELUIA Mt 1, 15

Aleluia.
Tupä Ñandejára Sambyhy hi’aguïma.
Pejevy pende rembiapo vaikuégui ha peguerovia Marandu Porä.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 9, 1-6

Upe ramo Jesús omboaty umi 12 hemimbo’e ha ome’ë ichupe kuéra pokatu ha pu’aka omosẽ haguã opaichagua mba’epochy, ha omonguera haguã opaichagua mba’asy.

Omondo ichupe kuéra oporomomarandu haguã Tupã Ñandejára sãmbyhýre, ha omonguera haguã hasývape. He’i ichupekuéra: Ani peraha mba’eve tapére guarã, yvyra pende po pegua, vosa, mbujape, viru ha ao jopyru.

Oimeraẽva óga peguahẽhápe, upépe pepyta pesétaha árape peve. Ha oimérõ táva pene moguahẽse’ỹha, tapeho upégui. Peityvyro yvytĩmbo pende pýgui, ohecha kuaa haguã hikuái upéva maranduha Tupã Ñandejára oinupãtaha ichupekuéra. Aipórõ osẽ hikuái ha oho umi táva’i rupi, omoasãi marandu porã ha omonguera hasývape.

Ñandejára Jesucristo Ñe’ẽ