Ñahendu Jesús Ñe’ẽ. 31 de mayo: Visitación ára

Escucha el evangelio y la reflexión en: https://youtu.be/DtMO7_Pe-_U?si=wndiGCX-w04COBoJ

31 de mayo: Visitación ára

Lucas 1, 39-56

Umíva umi árape, pya’ete María osẽ oho peteĩ puéblope opytáva sérro pa’ũme Judápe. Oikévo Zacarías rógape, omomaitei Isabélpe. Ha ohendúvo María maitei, Isabel oñandu mba’éichapa pe mitã omýi hyépe. Upépe, Isabel henyhẽ Espíritu Sántogui.

Ha osẽ he’i Maríape: — Ñandejára niko nde rovasave ndéve opa kuña apytégui. Ha ohovasa ne memby ave. Máva piko che, nde Ñandejára sy, reju haguã che rendápe. Ahendúvo nde che momaiteívo, che memby omýi vy’águi che ryépe. Ñandejára nde rovasa rerovia haguére oikotaha umi mba’e ha’e he’i vaekue ndéve.

Ha María he’i: — Che py’aite guive amomba’eguasu Ñandejárape. Che ánga rugua guive aguerohory Tupã, che salvadórpe. Ñandejára omoĩ hesa che rehe, che niko hembiguaimínte.

Águi rire opavave he’íne chéve: “María, Ñandejára nde rovasa”. Ñandejára Ipu’akapáva niko mba’e guasuete ojapo che pype. Ha’e niko imarangatu.

Ñandejára oiporiahuvereko opa ára umi chupe omomba’e guasúvape. Ha ipyapy mbarete rupive ohundi umi ojejapóvape. Poguasúpe oity iguapyhágui ha heko mirĩvape katu ohupi.

Umi iñembyahýivape omyenyhẽ mba’e porãgui, ha po nandi orrepunta umi imba’e retávape. Oipytyvõ hetã Israélpe. Oiporiahuvereko chupe ha ndahesaráiri chugui. Péicha voi he’i vaekue ojapotaha ñande ru kuéra ypykuépe, Abraham ha iñemoñarépe.

María opyta oiko Isabel ndive mbohapy mése rupi. Upéi katu oho jey hógape.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oiméne che irũ ha nde che reindy eñotýma semílla nde korapy, huérta pe térã katu nde kokuépe, aje. Ha eikuaa hína pe semílla eñotỹva iporã ramo, ha yvy porãme jey eñoty ramo, katuete heñói ha opu’ã porãtaha. Ha upéi oguahẽ voveitiémpo hi’a porãne avei ñandéve, ajépa.

Ñahendu angete mokõi kuñakarai ojotopáva. Peteĩ ipyahúva ha pe ambue ijedavémava. Mokõivéva hye guasúva. Orekóva ipype pe semílla porã oúva mborayhúgui ha Ñandejára Espíritugui, okakuaáva hína yvy porãme, María ha Isabel ryépe. Upégui upéi hi’a porãite haguã Juan Bautista ha Jesús, ñandéve ha hetaite ñande rapicha ko yvy apére ñaiméva peguarã.

Mokõi kuña imba’e porãva ha ojeroviáva, ojotopáva vy’apópe ha omombe’úva ojupe Ñandejára ojapóva hekovépe, oñembo’éva oñondive, oñopytyvõva ha oñangarekóva ojuehe. Ohechauka ñandéve Ñandejára ojevaleha kuñáre omoguahẽ haguã ñandéve salvación ha jehovasa guasu.

Tekotevẽ avei anivéma ñambotapykue kuña nguéra ñande Iglésiape. Ani kuimba’énte odesidi ha omanda. Ani ñande ñambotapykue upe Ñandejára oiporavo ha ombojerovia vaekue kuimba’e javeve. Mba’épa nde reñandu che reindy, ha mba’épa nde ere ichupe che irũ.

Pa’i Alberto Luna.