Ñahendu Hesu. Domingo 12a Semana TO

Escucha el evangelio y la reflexión en: https://youtu.be/f6VBCgYDrts

Domingo 12^a TO Ciclo A   

                                                                                                                        Mateo 10, 26 – 33

Upérõ Jesús
he’i idisípulokuérape: Ani
pekyhyje avavégui. Opa mba’e oñemívako ojekuaapa vaerã ágã. Ha opa mba’e
okañýva ojehecha vaerã ágã.  Ko’ã mba’e ha’éva peẽme pytũmbýpe,
pehenduka peẽ araitépe. Ha umi mba’e ha’éva peẽme pende apysápe, perosapukái
opa rupi.  Ani
pekyhyje umi ikatúvagui ohundi pende rete, ha ikatu’ỹva ohundi pene ánga.
Pekyhyje Ñandejáragui, ikatúva pene rundi Aña retãme.

 Mokõi
guyra’i niko mba’eve ndovaléi. Péicharõ jepe nomanói Ñandejára ndoipotái ramo.  Pene akãrague
peteĩ-teĩ jepe niko ha’e oikuaapa.  Aníke aipo ramo pekyhyje, peẽ niko
mba’e guasueteve hína heta guyra’ígui.

 Peẽ pemombe’u ramo peẽ che disípuloha,
che ave amombe’úne che Rúpe peẽ che mba’eha.  Peje ramo pende jehe ndaha’eiha katu,
che ha’éne che Rúpe ndapoikuaaiha.

Ñandejára
Jesucristo ñe’ẽ

ÑAMBOGUEJY ÑANDE REKOVÉPE

            Hénte kuéra
atýpe ñanemandu’áramo Ñandejára ñe’ẽre,
ñakonvidáramo ñembo’erã, hamba’e,
sapy’ánte ñane py’amirĩ ha ñatĩ oñembohorýramo guarã ñande rehe mba’e. Umi hasývare
ñañembojáramo niko jakyhyje ñanembohasýramo guarã ñandéve avei. Ñame’ẽ tereíramo ñande rapicha ndorekóivape
katu jakyhyjéma jasóramo guarã ñande
mba’e. Ñamoirũramo ñande rapicha
ojekausa reíva oñembojáva hese, ojeapresáva katu, jakyhyje jaikéramo guarã javoráipe hendive. Ja’éramo ñande
ruvichápe umi hendape’ỹ ojapóva, umi
ndajahechaporãiva, jakyhyje upévare
ñañemboyke, ñande reko asy haguã
ñandéve térã ñane héntepe mba’e.  Ha umícha heta vése ñande ñakirirĩnte, ñañembotavy, ñambohasánte,
ndaja’epái, ñañemolénte hũ,
ndajahechái gua’u.

            Hesu he’i
ñandéve: ani pekyhyje, ndaipóri oñemíva ojekuaapa’ỹ vaerã ágã amo ipahápe ha umi hendape’ỹva oñemyesakãmba vaerã ágã. Péicha oñandu vaekue umi proféta
kuéra ymaguare he’íva opavavépe ha kyhyje’ỹre
pe Ñandejára oñandukáva ichupe kuéra ipy’ápe, ha he’i avei hovaitépe hembiapo
vaikue mburuvicha kuérape. Háime oguerosapukái voi ichupe kuéra. Ipy’aguasu voi
raka’e hikuái. San Pablo niko he’i Timotéope (2Tim4) omombe’u haguã hapichápe pe Ñandejára Hesukrísto ñe’ẽ oti’ỹre, ija porã vove ichupe ha ija’ỹ vove, tomombe’únte avei,
noñehenduséiramo jepe.

            Ñande niko
che reindy ha nde che irũ ñande karaíramo guare oiko avei ñande hegui proféta.
Oike ñande pype pe Ñandejára Hesukrísto Espíritu, omoĩva ha oñandukáva ñandéve ñande py’ápe
mba’épa Ñandejára oipota jajapo ha ja’e ñande rapichápe, térã opavave rovake. He’i háicha Hesu: Pe
ha’éva peẽme pende apysápe
peguerosapukái opavave renondépe. Jajerure aipóramo ani haguã kyhyje ñane apytĩ, ñande joko, ñanemokirirĩ ha ñanembojapu. 

ÑAÑEMBO’E OÑONDIVE

Ñandejára Hesukrísto, nde niko mborayhu ha py’aguasu pópe
nerembyasýi vaekue nde rekove jepe ejapóvo Tupã rembipota. Rojerure ndéve toimeve ore
Iglésia apytépe, kuña ha kuimba’e ojerovia mbarete ha ipy’aguasúva, ohechauka
ha ohenonde’áva umi hendape’ỹva,
umi ojavývape, ha ñanembo’éva hembiapo ha iñe’ẽ rupive pe tape añeteguáva.

Pa’i Alberto
Luna.