Ñahendu Jesús Ñe’ẽ. Domingo 12ª Tiempo Durante el Año

Escucha el evangelio y la reflexión en: https://youtu.be/pSqRUXRCaXg

Domingo 12º Durante el Año Ciclo A Mateo 10, 26 – 33

Upérõ Jesús he’i idisípulo kuérape: Ani pekyhyje avavégui. Opa mba’e oñemívako ojekuaapa va’erã ágã. Ha opa mba’e okañýva ojehecha vaerã ágã. Ko’ã mba’e ha’éva peẽme pytũmbýpe, pehenduka peẽ araitépe. Ha umi mba’e ha’éva peẽme pende apysápe, perosapukái opa rupi. Ani pekyhyje umi ikatúvagui ohundi pende rete, ha ikatu’ỹva ohundi pene ánga. Pekyhyje Ñandejáragui, ikatúva pene rundi Aña retãme.

Mokõi guyra’i niko mba’eve ndovaléi. Péicharõ jepe nomanói Ñandejára ndoipotái ramo. Pene akãrague peteĩ-teĩ jepe niko ha’e oikuaapa. Aníke aipo ramo pekyhyje, peẽ niko mba’e guasueteve hína heta guyra’ígui.

Peẽ pemombe’u ramo peẽ che disípuloha, che ave amombe’úne che Rúpe peẽ che mba’eha. Peje ramo pende jehe ndaha’eiha katu, che ha’éne che Rúpe ndapoikuaaiha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Hénte kuéra atýpe ñanemandu’áramo Ñandejára ñe’ẽre, ñakonvidáramo ñembo’erã hamba’e, sapy’ánte ñane py’amirĩ ha ñatĩ oñembohorýramo guarã ñande rehe mba’e. Ja’éramo ñande ruvichápe umi hendape’ỹ ojapóva, umi ndajahechaporãiva, jakyhyje upévare ñañemboyke, ñande reko asy haguã ñandéve térã ñane héntepe mba’e. Ha umícha heta vése ñande ñakirirĩnte, ñañembotavy, ñambohasánte, ndaja’epái, ñañemolénte hũ, ndajahechái gua’u.

Jesús he’i ñandéve: ani pekyhyje, ndaipóri oñemíva ojekuaapa’ỹ va’erã ágã amo ipahápe, ha umi hendape’ỹva oñemyesakãmba va’erã ágã. Péicha oñandu vaekue umi proféta kuéra ymaguare he’íva opavavépe ha kyhyje’ỹre pe Ñandejára oñandukáva ichupekuéra ipy’ápe, ha he’i avei hovaitépe hembiapo vaikue mburuvicha kuérape. Ipy’aguasu voi raka’e hikuái. San Pablo niko he’i Timotéope (2Tim4) omombe’u haguã hapichápe pe Ñandejára Jesucristo ñe’ẽ oti’ỹre, ija porã vove ichupe ha ija’ỹ vove, tomombe’únte avei, noñehenduséiramo jepe.

Ñande niko che reindy ha nde che irũ ñande karaíramo guare oiko avei ñande hegui proféta. Oike ñande pype pe Ñandejára Jesucristo Espíritu, omoĩva ha oñandukáva ñandéve ñande py’ápe mba’épa Ñandejára oipota jajapo ha ja’e ñande rapichápe, térã opavave rovake.

He’i háicha Jesús: Pe ha’éva peẽme pende apysápe peguerosapukái opavave renondépe. Jajerure aipóramo ani haguã kyhyje ñane
apytĩ, ñande joko, ñanemokirirĩ ha ñanembojapu.

ÑAÑEMBO’E OÑONDIVE

Ñandejára Jesucristo, nde niko mborayhu ha py’aguasu pópe nerembyasýi va’ekue nde rekove jepe ejapóvo Tupã rembipota. Rojerure ndéve toimeve ore Iglésia apytépe, kuña ha kuimba’e ojerovia mbarete ha ipy’aguasúva, ohechauka ha ohenonde’áva umi hendape’ỹva, umi ojavývape, ha ñanembo’éva hembiapo ha iñe’ẽ rupive pe tape añeteguáva.

Pa’i Alberto Luna.