Ñahendu Jesús Ñe’ẽ. Lunes 12º Durante el Año

Escucha el evangelio y la reflexión en: https://www.youtube.com/watch?v=vqxie0LpFKU

Lunes 12º Durante el Año Mateo 7, 1 – 5

Upéro Jesús he’i idisípulo kuérape: Ani pemoĩ vai pende rapichápe, ndapeipotái ramo Ñandejára pene moĩ vai peẽme. Upe peẽ pejapoháicha pende rapicháre, peichaite Ñandejára ojapóta avei pende rehe.

Nde niko rehecha pe yvyra ku’i ra’ỹi nde ryvy resápe oĩva. Ha pe yvyrakue tuja nde resápe oĩva katu nderehechái. Mba’éicha piko aipo eréta nde ryvýpe, “Eheja taipe’a ndéve pe yvyra ku’i nde reságui”, nde nderehecháirõ pe yvyra poguasu nde resápe rerekóva. Nde tekove rova mokõi. Eipe’a raẽna pe yvyra poguasu nde reságui rehecha porã haguã. Ágã upéi reipe’áne pe yvyra ku’i nde ryvy reságui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pyaete niko jahecha ñande rapicha rembiapo vaikue. Ha ágãitéma katu ja’éne voi chupe jajere’ỹre ojavy ha omondoro hague. Ha ñande jajavy ramo katu, ñarokirirĩnte ha ñambohasa. Ñañembotavy ha ñamo’ã mo’ã ani haguã avave ñande pilla. Ha oime ramo ohecha ha he’íva ñandéve katu mbykyete ñande pochy haguã. Térã katu pya’e ha porã ñamohendápa.

Jesús he’i ñande raẽ jahechakuaa va’erã oime ramo jajavyha. Ñande raẽ ñañeha’ã va’erã ñande jehe jaipe’a ñande jehegui umi mba’e vai, ikatu haguãicha jaha ñaipytyvõ ñande rapichápe ha’e ave oipe’a hagua avei pe ilaja vai. Ajépa ningo ñande jajavy ramo ndajaipotái upe haguére avave ou ñande ári, ñanemotĩ, ha ñanembohova pytã opavave renondépe.

Sapy’ánteko ñande ñañeha’ã jaipe’a haguã ñande laja vai ha nañande pu’akái ñande jehe. Ha upéicha avei oiméne ñande rapicha ndaikatúiva oipe’a ijehegui pe ivísio. Ha upéicha jajeity rangue hi’ári ikatu ñane pasiénsia ojuehe ha ñañomboguata. He’i háicha ñe’ẽ: ñañoaguantáta mante he’i ikatĩ jováiva.

Ñandejára niko nañanekondenái, ome’ẽ ñandéve changui, jahechápa tapére nañañekomponéi. Upévare Jesús ñanekonvida jajesareko haguã ñande líñore, jakopi ha jaka’api umi ñuatĩ ha ñana vai opu’ãva. Ha upéichape ikatúta upe ojavývape ñaipytyvõ, ha pe ho’áva ñamopu’ã oguata jey haguã.

Anínte ho’a haguére ñapyrũ iñakãre ha ñambochipe yvýre opu’ã ve’ỹ haguãicha. Ja’éramo ñande rapichápe upe hembiapo vai ja’e va’erã ñaipytyvõ haguã, osẽ haguã tapépe ha ojesape’a haguã, ndaha’éi ñahundi haguã. Cháke ágã upéi oikóne ñande rehe, che reindy ha nde che irũ, pe Jesús he’íva: Ñande jajapo háicha ñande rapicháre oikóta hína avei ñande rehe upéi.

Pa’i Alberto Luna.