Ñahendu Hesu. Domingo 18º Durante el Año

Escucha el evangelio y la reflexión en: https://youtu.be/0yIads_MrYE

Domingo 18º Durante el Año Ciclo B

Juan 6, 24-35

Upe jave umi hénte ohechávo ndaiporiha upépe Jesús térã idisípulo kuéra, ojupipa jey
hikuái ikanóape ha oho Cafarnaúmpe Jesús rekávo. Ha oguãhẽvo hikuái pe lágo mboypýri, ojuhu hikuái Jesúspe ha oporandu chupe:— Mbo’ehára, araka’éiko reju ra’e ápe.

Jesús he’i chupe kuéra:— Chéverõ guarã, peẽ chereka peikóvo pekaru haguére pene ryvãtã meve, ha ndaha’éi peikuaágui mba’épa he’ise umi milágro ajapo va’ekue.

Ani pejepy’apýtei tembi’u oñehundi vaerãre. Pejepy’apy uvei tembi’u oñehundi’ỹ va’erãre ha ome’ẽ va’erãva peẽme jeikove opave’ỹva. Upéva pe tembi’u che ikatu ame’ẽ peẽme, Ñandejára che Ru omoĩgui che pópe.

Oporandu hikuái Jesúspe: — Mba’éiko upe Ñandejára oipotáva ore rojapo.

Jesús he’i chupekuéra: — Ñandejára niko che mbou chéve, ha oipota pejerovia che rehe.

Upépe osẽ oporandu ichupe hikuái: — Mba’e milágro piko rejapóta roguerovia haguã umi mba’e eréva. Ehechauka oréve. Ore ru kuéra ypykue niko ho’u va’ekue mana desiértope.

Ñandejára Ñe’ẽme niko he’i: “Yvágagui omboguejy chupe kuéra pan ho’u haguã”.

Jesús katu he’i chupekuéra: — Ha’éta peẽme peteĩ mba’e. Ndaha’éi Moisés upe ome’ẽ va’ekue peẽme pan yvagapegua. Che Ru hína upe ome’ẽva peẽme pan yvagapegua. Upe pan che Ru ome’ẽva niko hína pe oguejýva yvágagui ha omoingove opavavépe.

Ha’ekuéra he’i chupe: — Karai, eme’ẽmona oréve upéva upe pan ára ko’ẽre. Jesús he’i chupekuéra: — Che niko hína upe pan oporomoingovéva. Upe che rendápe oúva naiñembyahýi chéne araka’eve. Ha upe che rehe ojeroviáva, nda’ijyuhéi mo’ãi araka’eve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Kampáña política aja niko oñeme’ẽ jepi provísta, ha oiko la asádo, musikapu, karu guasu hykuemíva. Upéicha mante, he’i hikuái, ika’avóta la omandaséva py.

Jahecha Hesu omongaru rire 5 mil héntepe, ou joa hapykuéri ojaposéva ichugui huvicha. Hesu niko oikuaa porã ndaha’eiha tembi’u sapy’ami ñanemoyguatãvante upe ñaikotevẽva. Upévare he’i umi héntepe ojerovia haguã hese ha ohendu haguã iñe’ẽ.

Péva hína pe tembi’u yvágagui oúva, opytáva ñande pype ha ome’ẽva tekove añete.

ÑAÑEMBO’E OÑONDIVE

Ñandejára Hesukrísto, nde emongarúva ore korasõ vy’a ha py’aguapy añetépe, ore niko rojerovia nde rehe ha roikose ndéicha, romoirũ ore rapicha oikotevẽva, jerovia ha ñembo’épe, ha upe jave roipytyvõ avei ichupe kuéra hemikotevẽme. Amén.

Pa’i Alberto Luna.