Ñahendu Hesu. Domingo 1°Adviento Ciclo B

Escucha el evangelio y la reflexión en: https://youtu.be/8IsQOcQXNhQ

Domingo 1°Adviento Ciclo B Marcos 13, 33 – 37

Upérõ Jesús he’i idisípulokuérape: “Peikóke pe payhápe porã, ha peñangarekóke pende jehe.
Ndapeikuaái hína araka’épa oguahẽta upe ára. Pejapóke peteĩ kuimba’e mombyry ohótava ojapo haguéicha, he’i vaekue hembiguáikuérape oñangareko haguã hógare.

Peteĩ-teĩme oheja hembiaporã, ha okẽ ñangarekohápe he’i oma’ẽ porã haguã óga rokẽre.
Pejesarekóke aipo ramo, ndapeikuaái hína araka’etépa oúta pe óga jára, ka’aru pytũvo, térã
pyharepytévo, térã gállo osapukáivo, térã ko’ẽmbávo. Ani ou mba’e peimo’ã’ỹ jave, ha pende juhu peke peína. Ko ha’éva peẽme, ha’e opavavépe: Peikóke pe payhápe porã!”

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Ndajaikuái ñande raperã. He’i ningo ñe’ẽ. Ha ñaha’ãro’ỹve jave ikatu ho’a ñande rehe pytũ. Ha
upévare Hesu he’i ñandéve: Aníke peke ha peimo’ã opa ára peimetaha pe dispone pende gústope opa mba’égui. Ha ombojoja Ñandejárape peteĩ karai guasu imba’e porãvare, ojeroviágui hembiguáikuéra rehe, oenkargáva ichupekuéra hóga ha hógagua. Ha upéi oje’ói mombyry omombe’u’ỹre araka’etépa ojevýta. Ñandejára aipóramo hína ñane patrón guasu imba’e porãva ha ñande rejáva ñandéve ikapata ramo.

Ñadispone haguã upe imba’évagui ha’e oipota háicha. Amo hapópe niko pe tuichave mba’e Hesu ñane mbo’éva hína Ñandejára ojerovia itereiha ñande rehe. Opa mba’e ojapóva ha imba’éva oheja rupi ñande kargoitépe. Ñande apo tuicha mba’e ramo ha ome’ẽ ñandéve ñane mba’e ramo guáicha opa mba’e.

Anínte upévare jaju ñaimo’ã ñande ha’eha óga jára, yvy jára, tekove jára, ñande rapicha jára. Umíva ko ha’e oiporukánte ñandéve. Ha oguahẽ vove itiémpo ñaentrega mante vaerã ijára teépe.

Upe otokáva ñandéve niko jajesareko ñane rembiaporãre. Ñañangareko ñande rogaygua, ñande komunida, ñande barrio ha ñande rekoháre. Ha upe korrídape jaiko vaerã japáy hápe.

Oĩ rupi heta ñanemongeséva jaiko haguã ñembotavy ha vyroreípe, akã kuchu ha tarovápe. Umi makanáda apógui ñande rari vaerã. Upéi ikatu ñambyasy tembiapo vaikue, térã ñane ate’ỹ hague jajapo haguã iporãvéva.

Ema’ẽ aipo ramo che irũ, che reindy, mba’épa Ñandejára oenkarga va’ekue ndéve ha oheja nde pópe reñangareko haguã. Ha mávapa opyta nde kárgope, eiko haguã heseve kuéra. Ha mba’épa hína umi ne mongeséva oipe’a haguã nde hegui rerekomíva. Epáyke ani rejejuhu vai ou vove nde recha nde patrón guasu. Tandejuhu porã uvei, vy’apópe emoguahẽ haguã ichupe ou ha óra.

ÑAÑEMBO’E OÑONDIVE

Ñandejára ore ru, nde niko ore rayhu etereígui eheja ore kárgope ko múndo ha’éva nde róga ha opa mba’e nde rejapo va’ekue, ore pópe, roñangareko porã haguã. Ore mombáy ha ore resape’akena roikokuaa haguã yvy apére mbohupáicha, roñeha’ãvo rojapo opa mba’e nde, ore patrón, reipota háicha. Amén.

Pa’i Jasy.