Ñahendu Hesu. 30 noviembre: San Andrés apóstol ára
29 noviembre, 2023Ñahendu Hesu. Domingo 1°Adviento Ciclo B
2 diciembre, 2023
Escucha el evangelio y la reflexión en: https://youtu.be/VcNqB07yyIQ
Viernes 34º Durante el Año Lucas 21, 29 – 33.
Upérõ Jesús he’i idisípulokuérape mba’éichatapa upe ára ha’e ou jeytaha ha omombe’u chupe kuéra ko káso. Pema’ẽna pe ígo mátare térã oimeraẽva yvyra mátare. Pehechárõ hokyha, peikuaa hína og̃uahẽmaha ára haku. Péicha avei, pehecha vove ko’ã mba’e ojehuha.
Upévo peikuaáta Ñandejára Rréino hi’aguĩmaha. Añetéko ha’e peẽme. Ko’ã mba’e ojehúta omanomba mboyve umi ko’ág̃a oikovéva. Yvága ha yvy ikatúne opa, ko’ã mba’e che ha’éva peẽme katu nahániri.
Ñandejára Hesukrísto ñe’ẽ.
ÑAMBOGUEJY ÑANDE REKOVÉPE…
Ñama’ẽmi ñande parral mátare, terã katu ñane mángo máta kuéra rehe. Heta yva ñande korapýpe oiméma hi’aju pota ko ára hakúpe. Ha umíva omombe’u ñandéve hi’aguĩmaha Níño ára, Navida. Ñama’ẽ avei mba’épa ojehu ñande jerekuévo. Mba’épa oĩ ñande siuda ha ñane retãme ha mba’épa he’ise umi mba’e oikóva.
Peteĩ árape niko ou vaekue umi Juan Bautista disípulokuéra oporandu Hesúpe, ha’épa añete upe Ñandejára remimbou térãpa oha’arõ va’erã hikuái ambuépe. Uperõ Hesu he’i va’ekue chupekuéra: “Tapeho peje Juan Bautístape, ohechave’ỹva ohecha jeyha, ikarẽva oguata porã jeyha, ha mboriahúpe oñemombe’uha Ñandejára ohayhuha chupekuéra”.
Ko’ãga katu Hesu disípulo kuérama oporandu chupe: Mba’éichapa jaikuaáta oguahẽmaha Ñandejára rréino ñande apytépe, térã mombyry oimeha ñande hegui.
Jahápa hína iláo jepe térãpa tuicha oime ñañedesatina ha okañy ñande hegui. Ñama’ẽ va’erã niko, he’i Hesu, mba’épa ojehu ñande jerekuévo jaikuaa haguã ñane mombyrýpa Ñandejára rréinogui.
Ñama’ẽ vaerã niko oimépa ñapena mboriahukuéra rehe, mitã, hasýva, ñande agüelokuéra, ikangyvéva, ñande rapicha indígena, campesino, Bañadogua rehe. Ñandejára Rréino ou vove umíva oñemotenondéta hína. Ha umi ipy’a ratãgui hesekuéra nopenáiva
ha oreko asývape katu, pe Ñandejára Rréino oguahẽvo ho’a vaíta. Hendýta ha omoingéta ichupekuéra aña retãme. Tuicha pekádo hína jareko vai ñande rapicha mboriahu.
“Yvy ha yvága ohasapa va’erã, che ha’éva katu ndohasa mo’ãi araka’eve”. He’i ningo Kirito. Ha iporã avei ñapensami che reindy ha nde che irũ ha ñañemongeta oñondive.
Ko jaguata lája ñande rógape, ñande Iglésiape, ha ñane retãme pa mba’épe tekotevẽ oñemyesakã ha oñemohenda porãve. Pe Ñandejára Rréino ou vove ikatu haguãicha ñamopu’ã ñane akã Kirito renondépe.
Pa’i Jasy.