Ñahendu Hesu. Domingo 29º Durante el Año

Escucha el evangelio y la reflexión en: https://youtu.be/5VfpYtMIqfg

Domingo 29º Durante el Año Ciclo B

Marcos 10, 35 – 45

Upérõ Santiágo ha Juan, Zebedeo ra’y mokõivéva, oñemboja Jesús rendápe, ha he’i chupe: — Mbo’ehára, romba’ejerurese niko ndéve.
Jesús oporandu chupe kuéra: — Mba’éiko peipota.

He’i hikuái chupe: — Ágã reguapývo ne rréinope, na eheja oréve toroguapy mokõive nde ykére.

Jesús he’i chupekuéra: — Ndapeikuaái ete mba’épa pejerure hína. Peime nga’u piko pehasa asy haguãicha, che ahasa asytaháicha.

Ha’ekuéra he’i: — Héẽ, roime.

Jesús he’i chupekuéra: — Añete ha’e peẽme, peẽ pehasa asy vaivéta hína che hegui.Peguapy haguã che ykére katu, nda’ijái chéve ame’ẽ avavépe. Che ru upéva ome’ẽta umi ha’e oiporavo va’ekuépe.

Umi 10 idisípulo ohendúvo upéva, ipochypa Santiágo ha Juan ndive. Ha Jesús ohenói chupekuéra ha he’i: — Peẽ niko peikuaa umi rrománokuéra, he’íva ijehe ñande ruvichaha, mba’éichapa ipo pohýi ñane ndive. Peikuaa avei mba’éichapa poguasukuéra ojopy umi ipo guýpe oĩva ndive. Pende apytépe katu ndaupéichai va’erã.

Upéva rangue, pe tuichaséva pende apytépe toiko pene rembijokuái ramo. Ha pe itenondeséva pendeapytépe, toiko opavave rembiguáirõ. Che niko ndajúi tembiguái rekávo. Aju aiko haguã tembiguáirõ ha ame’ẽ haguã che rekove ojesalva haguã heta.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE

“Polítika ro’ópe” he’i ningo lo mitã. Omandáva omohendapa ramo ihéntekuéra, ta’ýra, tajýra, sobríno, ere eréa. Amo ipahápe imandu’áne ambue remikotevẽre, hembýramo. “Péva ningo la polítika” he’i ojekóva umi kaudíllo poguasúre, umi ikavaju pya’evévare, ogana haguã ipuésto, isuéldo ha oñemohenda porã haguã.

Jahecha avei ko’ápe mba’éichapa upe “politikería” upéva oike raka’e apóstolkuéra apytépe. Ha oúma katu Santiago ha Juan oñemboja Hesúre oñekuã oliga haguã ipuéstorã ágã Hesu omanda guasu vove. Opytase voi ijykerete. Yvate voi oinupã hikuái.

Péva ombopochypa iñirũnguérape. Pépe jahecháma politikería ñanemoingo vai ha ñande pe’a ojuehegui. Ha pya’e osẽ Hesu he’i: Pende apytépe ndaupéichai va’erã. Ñandejára polítika ndaha’éi jaheka haguã ventáha ñande jupe, ñande korreli ha ñane héntekuéra peguarãnte. Ahániri. Pe mburuvicha oñemoĩ vaerã hapichakuéra rembijokuái ramo, pe omandaséva oñemoĩ va’erã opavavete rembiguái ramo.

ÑAÑEMBO’E OÑONDIVE

Ñandejára Hesukrísto, nde niko nderejúi va’ekue eñemoĩvo kaudilloicha avave akã ári. Ore pytyvõmíkena roiko haguã opavave rembijokuái ramo, ore rógape, ore komunidápe, instituciónkuérape, Iglésia ha ore retãme; nde rejapo haguéicha. Amén.

Pa’i Jasy.