Ñahendu Jesús Ñe’ẽ. Domingo 31º Durante el Año

Escucha el evangelio y la reflexión en: https://youtu.be/FUsb3ZOUCjU

Domingo 31º Durante el Año Ciclo B

Marcos 12, 28b – 34

Upérõ peteĩ Moises léi ombo’éva ojapysaka hína ra’e umi mba’e saduséokuéra he’ívare Jesúspe. Upéi ha’e oñemboja

Jesús rendápe ha oporandu chupe: — Mavaite piko hína pe mandamiénto tuichavéva opavavégui.

Jesús he’i chupe: — Pe mandamiénto tuichavéva niko he’i, “Ehendúke, Israel, Tupã Ñandejára niko peteĩnte. Ehayhu Ñandejárape nde py’aite guive, ne ánga rugua guive, ne ñe’ã guive, ha ne mbaretekue reheve.” Ha upéva riregua he’i kóicha, “Ehayhu nde rapichápe nde rejehayhuháicha”. Ndaipóri mandamiénto tuichavéva ko’ãvagui.

Upe Moises léi ombo’éva he’i chupe: — Oĩ porã mbo’ehára. Añetéko upe eréva. Ñandejára niko peteĩnte, ndaipóri ambue. Ha jahayhu vaerã Ñandejárape ñande py’aite guive, ñane ñe’ã guive, ñane mbaretekue reheve, ha jahayhu vaerã ñande rapichápe ñande jupéicha.

Umíva umi mandamiénto niko tuichave opa sacrifício jajapóva ha ofrénda ñame’ẽvagui.

Jesús, ohechávo pe Moises léi ombo’éva ombohovái porã hague chupe, he’i:— Namombyrýi reime Ñandejára Rréinogui.

Upe rire avavéma noporandusevéi chupe mba’eve.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Oporandu ndaje peteĩ gua’i: Moõ rupi ñañepyrũ va’erã ja’u la chipa argólla. Ha upe otoka hárupinte, osẽ he’i chupe peteĩ. Péicha avei che reindy ha che irũ, ikatu ñaporandu Hesúpe: Mávape jahayhuve térã jahayhu raẽ va’erã. Ñandejárapepa terãpa ñande rapichápe.

Jesús he’i ñandéve pe Ñandejára rayhu añete ha tapicha rayhu oikeha ojokuápe. Amo hapópe ndaikatúi oiko ojuehe’ỹ. He’i voi ningo San Juan ikuatiañe’ẽme: Oĩrõ he’iva ‘che ahayhu Tupãme’, ha upekúevo ndohayhúi hapichápe, ijapu.

Pe ohayhu’ỹva hapicha ohechávape, piko mba’éicha ohayhúta Tupã ohecha’ỹvape. (1Jn.4,20). Aipóramo pe jerovia ha ñembo’e ndojekuaáiva tapicha rayhúpe, iguéro ha nosẽi ichugui mba’eve. Ojajái ha overapáramo jepe mombyry oime upe Jesús ñanembo’e va’ekuégui. Ku chipa argóllaicha avei, marãve ndoikói moõpa ñañepyrũ.

Jahayhu raẽramo Ñandejárape, upéva ñanemoguahẽta ñande rapichápe jahayhu haguã avei. Ha jahayhu ha ñaipytyvõ raẽramo ñande rapichápe, upéva ñanemoguahẽtante avei Ñandejára rendápe.

ÑAÑEMBO’E OÑONDIVE

Ñandejára Jesukrísto, nde niko ehayhu etereígui nde Ru yvagapegua ore rayhu eterei avei oréve. Emyendymína ore korasõme pe mbohayhu ndehegui osẽva, ha toñehẽ upégui py’a porã ha mborayhu ore rapichakuéra ndive guarã. Amén.

Pa’i Jasy.