Ñahendu Jesús Ñe’ẽ. Domingo 32º Durante el Año

Escucha el evangelio y la reflexión en: https://youtu.be/WYmX-ASt-ec

Domingo 32º Durante el Año

Marcos 12, 38 – 44

Upe ramo Jesús ombo’évo he’i: Peñeñangarekóke umi Moisés léi ombo’évagui. Ha’ekuéra niko oñemonde ao porã-porãme. Ha mamo oikoha rupi oipota ñamomaitei chupekuéra ku karai guasúrõ guáicha hikuái. Tupaópe térã karu guasuhápe katu, oĩ porãvetahápe voi oguapy hikuái. Umi kuña imenave’ỹva róga omonandipa, ha upéi katu oñembo’e puku-puku gua’u hikuái. Umíva ojekastiga rasyve vaerã ágã opavavégui.

Upéi Jesús oguapy tupaópe upe ofrénda ryru rovái. Omaña hína mba’éichapa ojeju joa, ha ojeity pype pláta. Umi irríkova oheja heta-heta. Upéi katu oguãhẽ sapy’a peteĩ kuña mboriahumi imenave’ỹva. Ha oheja avei ha’e mokõi níkelmi.

Upévo, Jesús ohenói idisípulokuérape, ha he’i chupekuéra:— Ko kuña mboriahumi niko hetaiteve ome’ẽ opavavégui. Umi ome’ẽva niko ome’ẽ chupekuéra hembývagui.

Ha’e katu imboriahu pa’ũme, ome’ẽmba oguerekóva, hembi’u repy rangue jepeve.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

“Iporãnguete, he’i kururu vendeha”. Upéicha ningo he’i lo mitã oiméramo omoherakuãva ovende haguã hembýva ichupe, avave ndoipotái va’ekue. Ha upéicha vaicha avei Jesús ombojoja umi rríko oúva oheja iñofrénda Ñandejárape guarã. Heta gua’u ome’ẽ tupaópe guarã, pláta saguasu, iporãnguete ramo guáicha gua’u ome’ẽ. Ha añetehápe tembyrénte upe ome’ẽva, ndoforsái ete ichupe kuéra. Sonséraite.

Ha upéva rovái Hesu oguerohory pe kuñakarai mboriahumi oúva oheja paite oguerekomíva okaru haguã jepe upe ára. Ijurúgui oipe’áramo guáicha hembi’u omomba’e guasúgui Ñandejárape ha ojeroviágui hese. Ha Hesu he’i pe kuñakarai viúda poriahu hetaiteve rasa ome’ẽ hague umi rríko partídagui, noñandúiva upe ome’ẽva, omyenyhẽramo jepe pe tupao alkansía ipláta itágui.

Ko’ápe ikatu ñande avei ñapensami mba’épa ñame’ẽ ñande rapichápe, mba’e ñame’ẽ oikotevẽvape, mba’e ñame’ẽ ñande tupaópe. He’i ningo San Alberto Hurtado, pa’i jesuita Chilegua: “Ñame’ẽ vaerã ñande jehegui hasy peve ñandéve”. Ikatúko hína che reindy ha nde che irũ upéicha oiméne jaikuaáta pe ñame’ẽva ovaleha añete ha ndaha’eiha vyrésa ha tembyrénte.

ÑAÑEMBO’E OÑONDIVE

Ñandejára Jesukrísto, ore rayhúgui nanerakate’ỹi va’ekue eme’ẽ haguã erekóva guive ha embo’e haguã eikuaáva guive opavavépe. Ha ipahápe eme’ẽ va’ekue nde rekove. Orepytyvõmíkena orepojera ha rome’ẽ haguã ore rapichápe nde rejapo haguéicha. Amén.

Pa’i Jasy.