Ñahendu Jesús Ñe’ẽ. Domingo 3º Adviento

Escucha el evangelio y la reflexión en: https://youtu.be/VXEEMxIhvy4

Domingo 3º de Adviento Ciclo C

Lucas 3, 2b-3. 10-18

Umíva umi árape, Ñandejára oñe’ẽ Juánpe, Zacarías ra’ýpe, oikóva hína umi desiértore. He’i chupe oguejy haguã rrío Jordánpe. Ha Juan oñepyrũ oñemoñe’ẽ opavavépe. He’i chupekuéra ojevy va’erãha Ñandejárape, oñemongarai va’erãha, Ñandejára oheja rei haguã chupe kuéra iñangaipa.

Upépe umi ojapysakáva oporandu chupe: — Mba’éiko reipota rojapo.

Juan he’i chupekuéra: — Umi ijao mokõiva, tome’ẽ peteĩ pe oguereko’ỹvape. Pe oguerekóva ho’u va’erã, tomboja’o oguereko’ỹva ndive.

Umi impuésto kovraha oñemboja avei oñemongarai haguã. Ha oporandu hikuái Juánpe:— Mbo’ehára, mba’éiko rojapo va’erã rojesalva haguã.

Juan he’i chupekuéra: — Anive hendape’ỹ pe kovra jo’a-jo’a pende rapichápe.

Oĩ avei soldádo upe rupi. Oporandu ave hikuái Juánpe: — Ha oréiko mba’e rojapo kuaa.

Juan he’i chupekuéra: — Anive pejopy pende rapichápe peipe’a haguã chugui kuéra pláta. Peñekontenta pe oñeme’ẽva peẽme reheve.

Umi ohendúva hína opondera joaite, ha oikuaase hikuái ndaha’éipa Juan upe Mesías. Juan katu osẽ he’i chupekuéra: — Che niko pomongarai ýpente.

Oime katu peteĩ oútava ha pene mongaraítava Espíritu Santo ha tatápe. Ha’e imbareteve chehegui, ha nda’ijáiva chéve ajora chupe ipy rehegua sãnte jepe. Ku yrupẽ ipópeicha, oipe’áta ojuehegui umi heko porãva, heko vaívagui. Osalváta umi heko porãvape, umi heko vaívape katu oitýta tata ogue’ỹvape.

Opáicha Juan oñemoñe’ẽ oikóvo opavavépe, ha ohenduka chupekuéra marandu porã.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

“Mba’e piko jajapóta”. Ja’e ningo ñande jahecháramo ivai etereíva ha ndaikatúiva ñarremedia. Ha añete hápe niko heta mba’e jahecha ha jaikuaáva ñambyasy ramo jepe ñande rasapa, ajépa. Ha mba’étepa jajapóta. Pevaite avei oñeporandu Juan Bautista pe, upe rrío Jordán rembe’ýpe oñemoñe’ẽva ha oporomongaraíva.

Peheja penerembiapo vaikue, he’i ichupekuéra Juan. Pejapo tape Ñandejárape guarã pende rekovépe. Ha Juan nde’íri peñembo’eve, nde’íri pehove tupaópe, nde’íri peleeve Bíblia. Nahániri. Pe oguerekovéva ao térã tembi’u tomboja’o ndorekóiva ndive, oñemúva ani okovrá rasapa, soldádo ani ojopy hapicha. Ani pende taryrýi ha peñekontenta upe pe rekóva reheve.

Mba’épa reñandu che irũ ha nde che reindy rehendúvo ko Juan Bautista pe. Mba’éichapa nde ikatúne ejapo tape emoguahẽ haguã Ñandejárape nde rekovépe ha nde rogapýpe ko Navidápe.

ÑAÑEMBO’E OÑONDIVE

Ñandejára ore ru, eipe’a ore resa ha ore korasõ, rohecha ha roñandu haguã ore rapicha oikotevẽva, romboja’o haguã rorekóvagui ikatumi háicha. Upéicha rojapo haguã tape nde ra’y Hesúpe. Amén.

Pa’i Jasy.