Ñahendu Hesu. Domingo III Adviento

Escucha el evangelio y la reflexión en: https://youtu.be/kge4Hm0exek

Domingo 3° Adviento Ciclo B

Juan 1, 6-8. 19-28

Upe ramo Ñandejára omondo hembiguái peteĩme, hérava Juan Bautista. Omondo chupe omombe’u haguã opavavépe mávapa pe ohesapéva, ha opa ohendúva chupe oguerovia haguã upe he’íva. Juan ndoúi va’ekue ha’e ñande resape haguã. Oñembou vaekue katu, oñe’ẽ haguã mávapa upe ñande resapéva.

Umi poguasu judío kuéra apytepegua omondo pa’i ha Ñandejára mandamiénto hamba’e ombo’éva Juan rendápe. Oho porandu chupe mávapa ha’e.

Juan he’i porã chupekuéra: — Che ndaha’éi pe Mesías.

Oporandu jey chupe hikuái: —Mávaiko nde péicharõ. Ndéiko ndaha’éi proféta Elías mba’e.
Juan he’i: — Nahániri.

He’i chupe upémarõ hikuái: — Nde piko hína ku proféta ou va’erãva.
Juan he’i chupe kuéra: — Nahániri.
He’i chupe hikuái: — Emombe’úpy oréve mávapa nde. Umi ore mbou vaekue niko oikuaase mávapa nde.

Juan he’i chupekuéra: — Che niko hína ku osapukáiva desiértore ha he’íva: “Pembosako’i
Ñandejárape haperã”, he’i haguéicha yma proféta Isaías.

Umi ou vaekue Juan rendápe oporandu chupe upémarõ: — Ndaha’éirõ nde pe Mesías, ha ndaha’éirõ proféta Elías térã ku ou vaerãva, piko mba’eichakue reporomongarai reikóvo.

Ha Juan he’i chupe kuéra: — Che niko ýpente amongarai héntekuérape. Pende apytépe katu oĩ hína peteĩ peẽ peikuaa’ỹva, oútava che rire. Chéve nda’ijáiva ajora chupe isapatu sãnte jepe.
Opa ko’ã mba’e ojehu Betánia puéblope, opytáva rrío Jordán ári, kuarahy resẽ gotyo.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Pe tape vai rupi niko jaha asy. Ituju térã ikuapáramo, sánha soro rupi mba’e ijetu’u. Ñapa’ã,
jajetyvyro, ñanemokane’õ. Hasýpe ñaguahẽ. Tape porã rupi katu py’ae jaju ha jaha. Ñande yvytu ha jasyryry, igústo. Pejapo peteĩ tape porã Ñandejára peguarã. He’i niko ñandéve Juan Bautísta ko árape.

Ha ñama’ẽmína nde che reindy ha che irũ, ko Navida rapére, mba’éichapa oime pe ñande rape Ñandejára ou porãite haguã syryrýpe oguahẽ ñande visita. Jahechamína noiméipa ikua, oreko váche, ñamyenyhẽ va’erãva. Noiméipa ita jaipe’a va’erãva. Noiméipa opu’ã itereíva, ñamboguejy va’erãva.

Jajapo peteĩ tape porã Ñandejárape. Ha’e niko ouse ñane rendápe. Oguatase ñande ykére, ñanemoirũ, ñanepytyvõ, ñanderovasa ha ñanembovy’a haguã.

ÑAÑEMBO’E OÑONDIVE

Ñandejára Hesukrísto, nde ejúva voínte ore rendápe opa ára, orepytyvõmíkena roipe’a haguã ore rekovégui opa umi nde rape jokóva, eguahẽ, eike ha epyta haguã ore korasõme ha ore rógape. Amén.

Pa’i Jasy.