Ñahendu Jesús Ñe’e. Domingo 3º de Cuaresma

Escucha el evangelio y la reflexión en: https://youtu.be/IEhaphYMp3k

Domingo 3º Cuaresma Ciclo B

Juan 2, 13-25

Hi’aguĩma Páskua arete, ha upévare Jesús oho Jerusalénpe. Tupaópe ojuhu umi opa mba’ére oñemúva.

Oĩ ovendéva novíllo, ovecha ha pykasu hamba’e. Ojuhu avei upépe umi pláta okambiáva oguapy joáva hína imesakuérape. Ha Jesús ohechávo upéva, ipojái peteĩ tukumbóre ha omosẽmba chupekuéra tupaógui, hymbakuéra reheve.

Umi pláta okambiávagui katu, ojapetepa ipláta yvýre ha oitypa umi imesa kuéra. Umi pykasu ovendévape katu he’i:— Penohẽmba chéve ko’águi ko’ã mba’e. Che Ru rógagui anive pejapo merkádo.

Upépe idisípulokuéra imandu’a Ñandejára Ñe’ẽme he’iha: “Mborayhu arekóva nde rógare niko ikusugue che rejáta”.

Umi judío poguasukuéra oporandu chupe:— Mba’e milágro rejapóta rohecha haguã nde ikatuha reju rejapo ko’ã mba’e.

Jesús he’i chupekuéra: — Peitypa ko tupao, ha mbohapy árape amopu’ã jeýne.

Umi judío katu he’i chupe: — Kóva ko tupao niko 46 áñope oñemopu’ã vaekue, ha piko nde remopu’ã jeýta mbohapy árape.

Ha Jesús oñe’ẽvo tupaóre niko, hetére oñe’ẽ hína chupekuéra. Upévare, Jesús opu’ã jeývo omanóva apytégui, idisípulo kuéra imandu’a upe Jesús he’i va’ekuére.

Upépe oguerovia hikuái upe Ñandejára Ñe’ẽme he’íva ha upe Jesús he’i va’ekuére avei.

Jesús oĩ aja Jerusalénpe Páskua arete jave, heta oĩ ojeroviáva hese ohechágui umi milágro ha’e ojapóva. Jesús katu ndogueroviapái chupekuéra, oikuaágui mba’e-mba’épa oguereko hikuái hi’angapýpe. Noikotevẽi avave he’i chupe mba’eve avavére. Ijehegui voi oikuaapa yvypóra korasõme oĩva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande ruguy raku jave jasapukái, japoroja’o ha ñañorairõ. Ha hetave mba’e ñambojo’áta pochýpe ñañeme’ẽtaramo. Opavave ningo ñande pochýva voínte. Hesu avei niko ipochy.

Oinupã ha omuña voi katu mbaretépe umi tupaópe ojehekáva, ohechávo tupaógui ojapoha ñemuhã plátarã, merkádoicha.

Aipóramo piko pe pochy ndaivaíri, ajeve Hesu péicha oñandu ha oprosede. San Ignacio ningo he’i pe ñande rapicha hembiapo vaívape ñañeha’ã va’erã mborayhu pópe ñanohẽ tapépe ñemongeta porãme. Ndojehejái ramo jaha jey chupe ha ñamotĩma ichupe hembiapo vaikuére. Ha upéichavérõ ndojehejái ramo katu jaháma ñamongyhyje haguãicha, he’i.

Nda’ivaíri niko ñande pochy jahecháramo ojejapo hendape’ỹva. Nda’ivaíri ñahenonde’a tie’ỹ ha jahape joko ombyaíva ñande rapicha rekove. Ikatúnte ko avei ñande pochy vai ha jahasa la rrája. Upévare tekotevẽ ñamyesakã mba’éichagua pochýpa oĩ ñande py’ápe.

ÑAÑEMBO’EMÍNA OÑONDIVE

Ñandejára Hesukrísto nde pochy va’ekue ehechávo tupaógui ojejapo merkádo. Eme’ẽ oréve Espíritu Sánto pu’aka mbarete, ani rokyhyje roñemoĩ haguã ivaíva renondépe, ha ani avei eheja oike ore pype Aña pochy vai. Amén.

Pa’i Alberto Luna.