Ñahendu Hesu. San Pablo ára.

Escucha el evangelio y la reflexión en: https://youtu.be/OEV5J8GajZA

25 de enero: San Pablo ára.

Marcos 16, 15 – 18

Upérõ Jesús ojechauka umi 11 apóstolkuérape, ha he’i chupe kuéra: “Tapeho opa rupi ko yvy
jerekuévo ha pemombe’u opavavépe upe marandu porã. Pe ogueroviáva ha oñemongaraikáva ojesalváta, pe oguerovia’ỹva katu oñehundíta.

Ha ko’ã techapyrã omoirũta umi ogueroviávape: che rérape omosẽta Aña, oñe’ẽta ñe’ẽ pyahu, ipópe oguerekóta mbói, ha ho’u ramo venéno ndojapo mo’ãi mba’eve hese kuéra, omoĩta ipo hasývare ha oporomongueráta.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ko árape ñanemandu’a hína apóstol San Páblo rehe. Ha’e ningo ndoikuaái ramo jepe Hesúpe ha ndaha’éi ramo jepe iñirũ nguéra ypy, upéi ou oñehenói avei apóstol ha oiko ichugui upe hatãve oiko va´ekue omyerakuãvo Hesu ñe’ẽ tuicha háicha oparupiete.

Tenonderã Pablo irari vaekue Hesu ñe’ẽ ha iñirũ nguéra gui. Ha’e niko peteĩ Moisés mandamiento ombo’éva rehegua ha hudío apytépe iñarandu ha ifanatikovéva ichugui ndaipóri vaekue. Pablo oiko va´ekue omuña ha oraha kárselpe umi Hesúre ojeroviáva ohechauka haguã ndaiporiha ambue religión añeteguáva. Ha oimo’ãgui upe Hesu ombo’e vaekue japu meme ha ombyaiha pe hudiokuéra religión.

Ha’e oimo’ã Ñandejára upéicha ojerureha ichupe. Upépe Hesu oñeñanduka ichupe, osẽ haperãme ha oikuaauka Pablo pe añeteha upe ha’e ombo’e vaekue ha iñe’ẽ ouha Ñandejáragui añetehápe. Hesu rupive Pablo oguerova iguata ha ndoikovéi mbaretépe omuña umi ha’éicha ndojeroviáiva.

Upéva rangue oñeha’ã ñembo’e, tembiapo ha ñemongeta rupi ohechauka hapichápe upe Hesu rape.

Ñande niko jahecha avei sapy’ánte oimeha oiko vaíva ojuavy haguére ijeroviápe, ndaha’éi rupi
ojueheguáva, oime haguére ambue Iglésiape. Oĩ katólico ha evanhéliko apytépe ifanátikova,
ndoikuaaséiva voi ojuehegui mba’eve.

Ombovaíva hapicha jerovia ha ombojapúva upe he’íva ha oñandúva, ndaikatúiva osẽ ojupe ñemongeta rupive oguata haguã oñondive.

Ko San Pablo árape iporã vaerã ñapensami che reindy ha nde che irũ, mba’éichapa ikatu ñande jajeroviáva Ñandejára Hesukrísto rehe jaguata oñondive. Anive ñande fanátiko ha jaiko vai oñondive katóliko, evanhéliko ha protestante kuéra, jajeroviáva Hesúre.

Upéva rangue jajotopa ha ñañemongeta porã, jaiko oñondive py’aguapýpe, ñañopytyvõ, ñañembo’e ha ñamba’apo oñondive. Mba’épa reñandu.

Pa’i Alberto Luna.