Ñahendu Hesu. Domingo IV Durante el Año

Escucha el evangelio y la reflexión en: https://youtu.be/uyCBxzf6tp0

Domingo 4. Durante el Año Ciclo B.

Marcos 1, 21 – 28

Oguahẽ hikuái Cafarnaúmpe. Sábado árape Jesús oike tupaópe, ha oñepyrũ oporombo’e. Opavave ohecháramo joaite mba’éichapa ha’e ombo’e chupekuéra. Jesús niko nombo’éi umi Moisés léi ombo’e háicha.

Ha’e oporombo’e ku noikotevẽíramo guáicha avavére oporombo’e haguã. Ha upe judíokuéra tupaópe, oĩ peteĩ kuimba’e demóño poguýpe, ha upéva osapukái: Mba’ére piko reñemoĩ ore rehe, Jesús Nazaretgua.

Reju piko ore rundívo. Che roikuaa. Ndehína pe imarangatúva, Tupã omboúva. Jesús oja’o pe espíritu añáme ha he’i chupe: Ekirirĩ ha esẽ pe kuimba’égui!

Pe aña oityvyro mbarete pe kuimba’épe, ha osapukái hatãvo osẽ chugui. Opavave oñemondýi ha he’i joa ojupe: Mba’eichagua ñe’ẽ piko ãva. Oikuaa porãhápe ha mbaretépe ko kuimba’e he’i umi añáme osẽ haguã, ha ha’ekuéra ojapo ha’e he’íva!

Pya’e voi herakuã Jesús opa rupi Galiléa jerekuévo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Kóva ningo peteĩ ñe’ẽ rei.” He’i lo mitã oiméramo ñande rapicha he’íva peteĩ mba’e ha upéi ndojapói upe he’íva. Ha’e voi oñembojapu. Péicha guáre ndajajeroviáiete voi. Ágã upéi oúramo oñe’ẽ jevy, ndaiporivéima ojapysakáva hese.

Hesu oñe’ẽ vove katu umi ohendúva ichupe oñandu ikarai guasu ha imarangatuha.
Oñandu hikuái añetehápe Hesu oñembo’e, ohendu Ñandejárape ha ombo’e upe oúva
yvágagui.

Ndaha’éi onohẽva iñakãguinte umi he’íva. Ha upéi ave, ha’e ojapo umi mba’e he’íva. Ha omoañete ombo’éva tembiapópe. Noñe’ẽ reíri. Ha upévare oime heta ojapysaka ha ohendúva ichupe oñe’ẽ ha opredikáramo. Ojerovia voi hese hikuái.

Ha oime avei ningo ndogustáiva upe añeteguáva. Aña rymba osapukái ha ipochýva Hesu ndive. Oñandu omosẽtaha ikuáragui py ha ojetyvyro voi.

Oiméne nde avei repilla ha reñandu che irũ ha che reindy, mba’éichapa ejapose ramo upe Hesu ñanembo’éva nde rekovépe, opu’ãtaha osapukái nerenondépe heta Aña rymba’i ojeréva upérupi ha ndohejaséiva umi orekóva ipoguýpe.

Hesúpe katu nomondýiri hikuái. Nopenái voi hesekuéra, nohendúi umi ojokoséva rehe Ñandejára rembiapo. Omokirirĩ, omosẽ ha ohasa tenonde.

ÑAÑEMBO’E OÑONDIVE

Ñandejára Hesukrísto nde reju yvy ári ejapóvo nde Ru yvága pegua oipotáva. Emoañete
tembiapópe ne ñe’ẽ. Oremoirũ Espíritu Santo pu’akápe ore avei rombojoaju haguã ore ñe’ẽ
ore rembiapóre, romosẽvo nde rérape Aña ha hymba kuéra, ore róga, ore komunida ha ore
vállegui. Amén.

Pa’i Jasy.