Ñahendu Hesu. Domingo Semana 14a TO

Escucha el evangelio y la reflexión en: https://youtu.be/n9YTcAa3k_8

Domingo 14^a TO Ciclo A                                              

                  Mateo 11, 25 – 30.

Upérõ Jesús he’i: Che Ru, nde pópe niko oĩ yvága ha yvy. Romomba’e guasu reñomi haguére ko’ã mba’e umi iñarandu ha imba’e kuaávagui, ha reikuaauka haguére umi iñarandu’ỹvape.  Upéicha che Ru, péichante voi reipota vaekue ojehu.

      Che Ru niko omoĩ opa mba’e che pópe. Avave ndoikuaái Ñandejára Ra’ýpe, Túva añónte. Ha avave ndoikuaái Túvape, Ñandejára Ra’y añónte, ha umi che  aikuaaukasévape.

“Peju che rendápe opa peẽ pene kane’õ ha pemba’apo pohýiva, ha che ndive pepytu’úta. Peheja tamoĩ pende apére che júgo, ha pejapo che ha’éva peẽme. Ha peikuaáta che py’a porãha ha ndajejapoiha, ha che ndive pejuhúta pytu’u. Pe júgo amoĩ tava pende apére niko ivevúita peẽme, ha ndaipohýi mo’ãi upe aipotáva peraha”.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Karai arandu oñe’ẽ kuaáva, título ita orekóva, oñemondéva ao porãme, mburuvicha guasú oguatáva mba’yru overapávape, umíva tuicha mba’e vaicha. Ñande rapicha itavymi, ndorekóiva estudio, isoguéva, katu niko oĩmi reínte vaicha, noñeha’arõ guasúi ichugui.

Ñahendu angete Hesu oguerohory Tupãme ndoiporavói haguére karai oñemomba’e guasúvape, ha oñeñanduka haguére umi iñarandu’ỹvape, umi ndojejapóivape, omoguahẽ ha oguerohory haguére pe Ñandejára ñe’ẽ. Péicha, he’i Hesu, Tupã oipota raka’e ojehu. Iguy guive oñepyrũ ombyaty ha ohekombo’e umi iñarandu’ỹva, mboriahu ha itavymívape, upégui ombyaty ha ohupyty haguã opavavetépe.

Ñandéve ñane kane’õ ha jajepy’apývape katu Hesu he’i jahupi haguã hendive pe ñande forsa ha ijetu’úva hína. Ñande niko jajerure jepi Ñandejárape oipe’a haguã ñande apégui umi ñandereity potáva hina, jajetyvyrose uvei umi ñanembohasývagui. Ha Hesu ou he’i ñandéve jahupi haguã hendive, ha’e ombovevuitaha ñandéve, ñanembo pytu’utaha pe jehasa asy pa’ũ rupi jahávo oñondive. Aipóramo, che reindy ha nde che irũ hendive nembaretevéta eropu’aka haguã umi ko’ãga nemokechẽ ha nembopy’a ropu potáva vaicha hína.

ÑAÑEMBO’E OÑONDIVE

Ñandejára Hesukrísto rehupi vaekue pe júgo pohýi ha’éva nde kurusu, ejahei’ỹre avavére, ha ndepy’aro’ỹre avave ndive. Mborayhu pópe eme’ẽ vaekue nde rekove ore rayhupápe. Rojerure ndéve orembo’emi haguã roime jave apañuái kuápe, rohupi haguã nendive ore kurusu, rojuhu haguã nde ykére py’aguapy ha piro’y. Amén.

Pa’i Alberto Luna.