Ñahendu Jesús Ñe’ẽ. Sábado 13º Durante el Año

Escucha el evangelio y la reflexión en: https://youtu.be/GUcUi-71nAM

Sábado 13º Durante el Año Mateo 9, 14 – 17

Upérõ Juan Bautista disípulokuéra oñemboja Jesús rendápe. Ha oporandu chupe:— Umi fariséokuéra, ha ore ave niko, py’ỹi ro’ajuna. Nde disípulo kuéra katu niko nahániri. Mba’éreiko péva.

Jesús he’i chupekuéra:— Omenda ramóva irũ nguéra niko noñembyasýi pe ména pyahu oĩ aja hendivekuéra.

Nahániri. Jepe oguãhẽne ágã ára ojererahávo ha’e. Upépe ágã o’ajunáne hikuái. Nañambovyvýi niko ao pehẽngue pyahu ao tujáre. Pe ipyahúva ágã oñyñýine ha omondoro jey pe itujáva. Ha upekuévo osoro tuichavéne. Víno pyahu niko nañambohyrúi víno ryru tujápe.

Péicha jajapórõ, umi víno ryru osoróne ha oñehundi pe víno ha umi hyru ave. Pévare, víno ñambohyru vaerã víno ryru pyahúpe. Péicharõ,
mokõivéva oiko aréta oñembyai’ỹre.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande rekove niko ijehegui ogueru ára porã ha ára pohýi. Sapy’ánte ñarõko’ẽ vy’a ha sapy’a katu ñarõko’ẽ vy’a’ỹ. Natekotevẽi ñande ñamoĩ ñane akã ári jehasa asy. Péva oúta ñandéve ijehegui. Umi ára ñaime porã aja, ñañandu jave Ñandejára ñande rovasa, jahupi vaerã pytu ha ñañemombarete ñande pu’aka haguã upéi ou vove ñande aho’i ára ypytũ ha vy’a’y.

Jesús he’i avei jaguatáramo hendive ñambopyahu va’erãha ñande rekove. Jahejáma ñande guata ha ñande jepokuaaha yma guare, ko múndo reko. Mba’everã naiporãmo’ãi ñande jerovia ñañembojáramo Ñandejárare, jaha tupaópe, ñahendu iñe’ẽ, jakaru hendive comuniónpe, ñañembo’e puku; upéi ñañesambyhy jey ramo yma guaréicha.

Jaiko jeýnteramo ñande lája tujápe, ñande róga, ñande rapichakuéra ha ñande comunidápe, ndojekuaáiramo Jesús ombopyahuha añete ñande rekove. Ha upéva avei ikatu oiko ñane retãme. Ñandejára niko ñande jokuái avei ñambopyahu haguã ñande rekove, ñane retã, ñande rekoha. Ikatu haguãicha opavave ñandeja ha jaiko porãve. Ko’yteve umi oikotevẽvéva, mboriahu, indígena, campesino, añadogua.

Ha pevarã tekotevẽ ñambopyahu avei ñande política, ñande economía ha ñande léi kuéra. Jahasáma kuri dictadura rupi, jaike democracia pe. Ñatantea ambue partido ha movimiento, ndajapytái peteĩ partido político año poguýpe. Jaheka mba’éichapa oñembovalevéta ñande vóto hamba’e.

Ipuku gueteri ñande raperã hína. Ha upépe ñama’ẽ porã va’erã ani haguã jaguevi. Ani haguã umi rremiéndo oñemoĩva omondorove ñane retã ñanepytyvõ rangue. Japoíma politiquería mondágui ha jaheka añete ombopyahu vaerãva ñane retã. Mba’épa ere ichupe che reindy. Mba’éichapa ikatúne che irũ ñasẽ tape porãme.

Pa’i Alberto Luna.