Ñahendu Jesús Ñe’ẽ. Domingo Semana 18a TO

Escucha el evangelio y la reflexión en: https://youtu.be/4g7lQsL2d-o

UpérõJesús he’i idisípulokuérape pya’ete ojupi haguã kanóape ha ohasa haguã hikuái henonderã lágo mboypýri. Upe aja ha’e opytáta omondopa haguã opavavépe hógape.

Ohopa rire hikuái, Jesús ojupi peteĩ sérro ru’ãme oñembo’e haguã ha’eño. Pyhare oguãhẽvo, Jesús oĩ gueteri hína upépe ha’eño. Upe aja katu, pe kanóa oguãhẽma pe y mbyte rupi. Ohuvãitĩ ohóvo hikuái yvytu, ha pe y pochy oñenupã pe kanóa tĩre. Ko’ẽmbotávoma, oñemboja sapy’a Jesús hendápe kuéra, oguata oúvo y apére ra’e hína.

Idisípulokuéra katu ohechávo oguatáva oúvo hína y apére, tuicha oñemondýi. Ha okyhyjégui osapukái: — Cháke póra.

Jesús katu oñe’ẽ chupe kuéra, ha he’i: — Chénteko hína. Ani pekyhyje.

Upérõ Pedro osẽ he’i:

— Mbo’ehára, nde ramo añete, eheja chéve taha ne rendápe y apére.

Jesús he’i chupe: — Eju.

Upépe, Pedro oguejy pe kanóagui ha oñepyrũ oguata pe y apére ohóvo Jesús rendápe.  Oñandúvo pe yvytu hatã oipeju katu okyhyje sapy’a, ha oñepyrũ oñapymi. Upépe osapukái: — Mbo’ehára, cháke ajahogátako.

Upévo Jesús ombohasa ichupe ipo, ha he’i chupe: — Rejerovia’iete piko ra’e che rehe. Mba’éreiko reduda ha rekyhyje.

Ha ojupívo mokõivéva pe kanóape, opi sapy’a pe yvytu. Umi kanóape opyta vaekue katu oñesũmba Jesús renondépe, ha he’i chupe: — Nde niko añete Ñandejára Ra’y ra’e.

                     Ñandejára Jesucristo ñe’ẽ

ÑAMBOGUEJY ÑANDE REKOVÉPE…

Hesu omongaru rire heta mboriahúpe, 5 mil rupi. Ipojaise mo’ã hikuái heseirréirã, ohechámaramo omongaru porãhague ichupe kuéra. Péicha ningo ojapo jepi polítiko oraháva vívere mboriahúpe, ovota haguã hese. Apóstol  kuérama katu iñakãraku. Ojupíta avei ha’ekuéra omanda guasu py. Hesu katu irari chugui kuéra ha he’i apóstol kuérape pya’e ojupi haguã pe kanóape ha ogue haguã upégui.

Pe kanóa ningo ñande iglésia hína, jaikóva ko múndo y apére javevúi. Ñande pojaiséva sapy’ánte mburuvicháre, omandáva ha ipláta hetáva rehe, ha ñande voi jaikose karai guasúramo. Upérupi jaháramo la ñande kanóa oñapymíta ñande hegui.

Natekotevẽi ñande Iglesia imbarete, itupao tuicha tuichave, ijao verapa. Hesu ndaupéichai vaekue. Ha’e opytasevéntevaekue mboriahúicha omoirũvo hapicha mboriahúpe, omoguahẽ haguã chupekuéra Ñandejára mborayhu. He’i ningo ñande Papa Francisco: “Aipotaite ñande Iglesia imboriahu ha omoirũ mboriahu kuérape.” Ha upérupi avei, che reindy ha nde che irũ, ñane konvida Hesu jaha haguã hendive.

ÑAÑEMBO’E OÑONDIVE

Ñandejára Hesukrísto, nde
niko nderejúi vaekue ehekávo nerembiguairã,
upéva rangue reñemoĩ opavave rembiguáiramo.
Aníkena eheja nde Iglésia oñapymi mba’eta potápe, ore pytyvõ romoirũ haguã mborayhu ha jeroviápe, ore rapicha
mboriahu kuérape. Amén

Pa’i Alberto Luna.