Ñahendu Jesús Ñe’e. Sábado 17º Durante el Año

Escucha el evangelio y la reflexión en: https://youtu.be/D6LL2I31SBY

Sábado 17 TDA Mateo 14, 1 – 12

Umíva umi árape mburuvicha Herodes, ohendu umi mba’e Jesús ojapóva, ha he’i hembiguáikuérape: — Péva niko Juan Bautista, opu’ã jeýva omanóva apytégui. Upévare ojapo umi milágro.

Herodes upe o’apresauka va’ekue Juánpe, oipokua ha omondo chupe kárselpe. Herodes niko omenda vaekue Herodías rehe, tyvýra Filipo rembirekorére, ha Juan he’i va’ekue chupe: — Nde ndikatúi remenda Herodías rehe.

Upévare Herodes ojukase va’ekue Juánpe. Okyhyjénte opavavégui, oje’égui hese ha’e profetaha. Oguãhẽvo Herodes ára mboty, Herodías membykuña osẽ ojeroky opavave renondépe. Ha Herodes oguerohory pe mitakuña jeroky. Ha upérõ he’i pe mitakuñáme ome’ẽtaha chupe oimeraẽ mba’e oipotáva. Herodías, isy, ohendúvo upéva, he’i chupe ojerure haguã Heródespe Juan Bautista akãngue.

Péva oikuaávo, Herodes ombyasy he’i hague ome’ẽtaha pe mitakuñáme opa ojeruréva. Ha nopyrũséigui iñe’ẽre ome’ẽ vaekue opavave rovake, ome’ẽta mante pe mitakuñáme upe ojerure va’ekue chupe. Omondo iguárdiakuéra kárselpe, Juan oĩháme, ha oñakã’o.

Upéi ogueru hikuái iñakãngue ña’ẽmbe peteĩme ha ome’ẽ pe mitakuñáme. Ha’e ogueraha ha ome’ẽ isýpe. Juan disípulokuéra oho hetekue piári ha ogueraha oñotỹ. Upéi oho omombe’u hikuái Jesúspe upe ojehúva.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande niko jahechakuaa umi ñanembyaíva ha ojapo vaíva ñande rapicha rehe. Hasýnte ko ja’e pe hembiapo vaívape ojavyha ha ohoha tape karẽ rupi. Juan Bautísta niko he’i va’ekue hovaitépe mburuvicha Heródespe upe hembiapo vai, nokirirĩri vaekue kyhyjégui, ha upévare Herodes omoinge ichupe cárcelpe.

Juan niko profeta vaekue, Ñandejára rembijokuái he’íva umi mba’e ojejapo vaíva, hendape’ỹva, ikatu haguãicha oñemyatyrõ ha oñemohenda, ani haguã umi ohecháva ojapo avei oikuaa’ỹre ivaiha ha oñehundi.

Pe profeta rembiapo niko ipohýi, ombohováivo tembiapo vai ou ombokacha kavichu’i raity ojeitýtava hi’ári. Upéva oiko Juan Bautísta rehe ha heta tapicha cristiano ohenonde’áva Aña rembiapo. Herodes ojukauka haguéicha Juan Bautístape, heta ñande rapicha cristiano ojejuka oñeñembosarái rire hese, mburuvicha guasu kuéra poguýpe.

Ko’ãva nomomba’éi hapicha rekove ha oipe’ánte hapégui ha omombo yty ramo guáicha. Péva ivai, upe tapicha rekove niko Ñandejára remime’ẽ, ha’e jey mante ikatúva oipe’a hi’ára oguahẽ vove. Ndaijái avavépe oipe’a hapicha rekove.

Oiméne ndéve avei che irũ ha che reindy otoka sapy’a ere nde rapichápe umi noiporãiva, jahechápa nosẽi tapépe. Péva pe misión niko ijetu’u ha ndaha’éi ramo jepe igustopáva jajapo mante va’erã. Jajerurénte jajapo haguã mborayhu pópe.

Pa’i Alberto Luna.