Ñahendu Jesús Ñe’ẽ. Viernes 17ª Tiempo Durante el Año

Escucha el evangelio y la reflexión en: https://youtu.be/8I4zqQDeJys

Viernes 17º Durante el Año

Mateo 13, 54 – 58

Upérõ Jesús oguãhẽ upe ha’e oikove ypy haguépe. Upépe oñepyrũ ombo’e tupaópe, ha opavave ohecha ramoite chupe. He’i hikuái: — Moõgui piko oikuaa kóva hetaite mba’e. Ha mba’éicha rupi piko ojapo ko’ã milágro.

Oĩ katu he’íva: — Kóva piko ndaha’éi ku carpintéro José ra’y. Isy niko María, ha Santiágo, José ha Judas katu tyvýra kuéra. Heindykuéra niko oiko ñande apytépe.

Moõgui piko onohẽ ko’ã mba’e. Ha ndohecha porãi umi mba’e he’íva. Jesús katu osẽ he’i chupekuéra:— Opa rupi niko proféta kuéra oñemomba’e. Hógape ha ipuéblope katu nahániri. Ha ndojeroviáigui hese hikuái, Jesús ndojapói upépe heta milágro.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande vállepe ningo jajokuaápa. Nañakañýi ojuehegui. Ñañomboherapa, ñañomomarkánte hamba’e. Lo mitãko ojopillapa ha oikuaapa hapicha rapykuere ha ikasokue.

Umíva rapykuéri ndofaltái la tálla ha ñembojaru. Sapy’ánte umíva apytépe lo mitã oity ñe’ẽ pohýi ha omombo hapicha rováre ikasokue térã ihénte kuéra rapykuere ha mba’e.

Hesu niko ñandéicha avei heñói ha okakuaa va’ekue peteĩ óga pýpe, ha upéicha oĩ heta ivallegua oikua porãva chupe, ikakuaa irũngue ha ivesínokuéra ha mba’e. Ha umíva apytépe oĩ ndojeroviapái hese oikuaa porãgui mba’éichaguápa ha’e ha mamógui osẽ hamba’e.

Hesu niko peteĩ carpintero vaekue ha ihéntekuéra katu opaichaguávante ijapytépekuéra. Ndaha’éi vaekue karai guasu arandu imba’eretáva ha oñemomba’e guasúva. Pueblíto’i michĩmente ningo ha’e heñói ha okakuaa.

Ñahendu Hesu oho ramo guare ivállepe ha ndaikatúi ojapo mba’eve guasu ijapytépekuéra. Oñandu ha’e ndojeroviaiha hese umi ivallegua. Ñahendupa vaicha hína, ajépa, umi mba’e oje’éva hese: Mba’éiko he’íta chéve kóva ko chéicha guávante.

Mávaiko ndoikuaái kóvape ou haguã oñemoarandu gua’u ñandéve ko’ápe. Kóva niko itavýva chéichante ha piko mba’e gua’u ikatúta ojapo.

Ñande avei ko sapy’ánte jaipota vaicha Ñandejára omboveve voi ñane akã ári peteĩ ánhel mba’e, oguejýva ha ome’ẽva ñandéve ñande pópe upe jajerure ha ñaikotevẽva.

Jahechase voi umi mba’e omimbi ha ojajaipáva jajerovia haguã hese. Ha ápe katu Hesu ñanembo’e Ñandejára ojevaleha umi ñandeichaguáva rehe, ñande ykére guáva rehe, heta mba’e porã omoguahẽ haguã ñandéve.

Aníkena che reindy ha nde che irũ, ja’e haguére umi Hesu valleguáicha: “Mba’e piko che mbo’éta kóva”, jajavy ave umi Ñandejára grásia ñande rapicha ñandeichaguáva rupive oñeme’ẽva ñandéve.

Pa’i Alberto Luna.