Ñahendu Jesús Ñe’ẽ. Domingo Semana 18a TO

Escucha el evangelio y la reflexión en: https://youtu.be/l7C6O8FsNKs

Domingo 18^a TO Ciclo A                                                                Mateo 14, 13 – 21

Upe ramo oikuaávo Jesús upe Juánpe ojehu va’ekue, ojupi peteĩ kanóape ha oho upégui peteĩ ha’eñoháme. Opavave oikuaávo upéva, osẽ umi oikohágui ha oho ha’e oĩháme yvy rupi. Oguejývo Jesús pe kanóagui, ha ohechávo hetaha umi ijatýva, oiporiahuvereko ichupe kuéra, ha omonguera umi hasýva ogueru va’ekue hikuái. Pytũma ramo hína, hemimbo’e kuéra ou hendápe, ha he’i ichupe:

Ka’aru etéma niko, ha ko’arupi ndaipóri avave oikóva. Emondómana opavavépe toho umi táva rupi, tojogua hembi’urã.

Jesús katu he’i ichupekuéra: – Natekotevẽi oho. Peẽ voi pemongaru ichupekuéra.

Ha’e kuéra he’i ichupe: – Roguereko niko 5 mbujape ha mokõi pira.

Jesús he’i ichupekuéra: – Peru chéve ko’ápe.

Ha omboguapy opavavépe kapi’ipépe. Upéi katu ohupi ipópe umi 5 mbujape ha mokõi pira ha oma’ẽvo yvága gotyo ojerure Tupã Ñandejára ohovasa haguã. Upéi oipehe’ã umi mbujape ha ome’ẽ hemimbo’e kuérape, ha ha’e kuéra ome’ẽ opavavépe. Opavave ho’u hyvatã meve. Ha umi hembývagui omono’õ hikuái 12 ajaka renyhẽ. Umi okarúva niko hína 5.000 kuimba’e rupi, ojepapa’ỹre kuña ha mitã nguéra.

 Ñandejára Jesucristo ñe’ẽ

ÑAMBOGUEJY ÑANDE REKOVÉPE

Upérõ che irũ ha che reindy:

“Polka ha lókro mante ñande rupytypa” he’i ningo peteĩ ñe’ẽnga. Oiméne upéva naimandu’ái raka’e Hesu apóstol kuéra oiméramo guare umi hente mboriahu eta apytépe, ha ohecha hikuái sa’iha la iprovísta kuéra omongaru haguã opavavépe. Upémaramo omombyky la trómpo sã ha oho voi hikuái he’i Hesúpe ha’e omondopa haguã umi hénte kuérape ojeheka haguã hikuái ijehegui upérupi. Tojecha ha’e kuéra.

Ha Hesu katu, ohechakuaáramo jepe sa’iha la ijavío kuéra, ha hetápe oipohano ha oñembo’e rire ijapytepekuéra, ndaipy’ái he’i haguã ichupe kuéra osẽ haguã oho. Ha’eteku Hesu he’íva ijapóstol kuérape, ha ñandéve avei che reindy ha nde che irũ: Ñañeha’ãna lo mitã ñamoĩmi ñande jehegui ha ñamboja’o jarekomíva, marãve ndoikói michĩramo.

Mba’éicha piko aipo ñañembo’e ha tuicha jahovasa rire ichupekuéra,  jahecha pype iñembyahýi ha isogueha, ñasẽta ja’e ichupekuéra, tapehóntema pejeheka upérupi. Ñañeha’ãmievéna lo mitã. Ha upépe apóstolkuéra, ha’ete ku opáyva ha onohẽ la orekomíva. Ha oiméneko péva ohechávo, oime avei la oñanimáva umi hénte kuéra apytépe ha ogueru avei la orekóva. Ojapo hikuái peteĩ ólla popular upépe. Ha upéva Ñandejára ohovasa, ha opavavépe ohupyty, he’i háicha ñe’ẽ, ha hemby avei.

ÑAÑEMBO’E OÑONDIVE

Ñandejára Hesukrísto embo’e vaekue ne irũ nguérape ohechakuaa haguã hapicha mboriahu remikotevẽ. Rojerure ndéve ehupytyka haguã oréve tembi’u ore ánga ha ore retépe guarã, ikatu haguãicha avei romboja’o ore rapicha oikotevẽva ndive. Amén.

Pa’i Alberto Luna.