Ñahendu Hesu. Domingo Semana 22° TO

Escucha el evangelio y la reflexión en: https://youtu.be/etfjZYjH8aY

Domingo 22 a TO Ciclo A

Mateo 16, 21-27

Upérõ Jesús oñepyrũ omombe’u idisípulo kuérape oho mante va’erãha Jerusalénpe. Jesús
he’i chupekuéra upépe mburuvichakuéra, pa’i ruvicha ha umi Moisés ley ombo’éva heta
ombohasa asytaha chupe. He’i avei ojejukataha upépe, ha oikove jeytaha mbohapy ára
haguépe.

Upépe Pedro ogueraha chupe ha’eñoháme, ha he’i chupe anive hag̃ua péicha oñe’ẽ. He’i
chupe: — Mba’éichata piko péva. Tupã ndohejái chéne ojehu ndéve mba’eve.

Jesús katu ojere ha he’i Pédrope: — Na che reja Sataná. Nde che reityse hína.
Ndereikuaái pe Tupã oipotáva. Nde niko rejogua opavavépe.

Upéi Jesús he’i discípulo kuérape: — Peẽ che moirũsérõ, peñembyesarái umi mba’e peẽ
pejaposévagui. Pehupi pende kurusu pende apére, ha peju che moirũ. Umi hekovére
hakate’ỹva, omanóta. Ha umi omanóva katu, oikovéta. Mba’eve niko nañanohẽi jarekopárõ
opa mba’e, ha ipahápe ñañehundi. Mba’evéma niko ndaikatúi ñame’ẽ jaikove jey hag̃ua.

Ág̃a Che, kuimba’éicha aju va’ekue, aju jeývo, ajúta hína che Ru pu’aka reheve ha hi’ángelkuéra ndive. Ág̃a upévo Tupã omyengoviáta peteĩ-teĩme hembiapokue ojerureháicha.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…
Ho’a vove ñande ári pytũ sapy’ánte ñañemoĩ Ñandejára renondépe ha ja’e chupe ñande pe’a
haguã pe javoráigui. Marãpa péicha oheja oiko hamba’e. Jajetyvyro ha ñañemyrõ. Oime voi
oja’o’imíva Ñandejárape ha ipochýva voi hendive.

Jahecha Pedro ohenói Hesúpe ha oja’o chupe he’i haguére ohasa asytaha ha ojejukataha.
Aníchene Ñandejára oheja ojehu ndéve, he’i. Mba’eveichavérõ. Hesu katu oja’o tuichavéntema
Pédrope: Ejei che rapégui Satana –he’i chupe– nde che rape jokose hína, eguata che rapykuéri.

Hesu ombo’e Pédrope, ha ñandéve avei che irũ ha che reindy, jahasa asykuaa vaerãha
ijetu’u ha hendy vove ñanendive. Jahupi ñande kurusu ha jaguata heseve. Ani ñaimo’ã upévare Ñandejára hesarái hague mba’e ñande hegui, térã nañanemoirũiha. He’i niko San Ignacio, pe ñaime vaive jave niko ñane kangy, ha ñañandu váicha nañande pu’aka mo’ãiha upe ñande jopýva rehe.

Opaichavo -he’i- ndañanderetia’éi ha nañanekyre’ỹiramo jepe, ikatu hína jaha hese mbeguekatu, mbói jo’ópe, ha pasiénsia reheve. Ani jaheja py’aro ha plagéo ñanemokangy, ñande arhela ñandéve ha ñande rapicha kuérape. Jajerovia jahupyty jeytaha vy’a ha py’aguapy tenonderã, péva ha’e hína esperánsa.

ÑAÑEMBO’E OÑONDIVE
Ñandejára Hesukrísto, roma’ẽ niko nde rehe, nderehejái vaekue pochy nde aho’i, ehasa asýramo
guare ore rayhupápe. Orembo’emína ore avei roguatakuaa haguã nde rejapo haguéicha. Ani ore
reity mba’eveichagua vy’a’ỹ, mba’asy, tekotevẽ, kane’õ. Ha ore moirũmíkena upéicha jave. Amén.
Pa’i Jasy.