Ñahendu Hesu. Domingo Semana 32ª TO

Escucha el evangelio y la reflexión en: https://youtu.be/k2Efk-Gb99Y

Domingo 32ª TO Ciclo A

Mateo 25, 1 – 13

Upe ramo Jesús he’i: Ñandejára Rréino niko ojogua ku menda rehegua káso. Oiko va’ekue ndaje raka’e 10 kuñataĩ. Ha peteĩ pyharépe, ilampĩu ipópe osẽ ohuvãitĩ pe menarãme. Umi kuñataĩ apytépe ndaje oĩ raka’e 5 iñakã tavýva ha 5 iñakã porãva.

Umi iñakã tavýva, ogueraha ramo jepe ilampĩu, ndoguerahái aséite peichahágui oikotevẽve ramo guarã. Umi iñakã porãva katu ogueraha ilampĩu ha aséite ryru ave. Pe menarã hi’arégui oguãhẽ haguã, umi kuñataĩ hopehyipa ha opyta oke. Pyhare pyte rupi katu oñehendu sapy’a peteĩ osapukáiva, “Na’ápe oúma pe menarã. Pesẽ pehuvãitĩ.” Umi 10 kuñataĩ opáy ha opu’ã, omyendy tuichave haguã ilampĩu.

Umi 5 iñakã tavýva he’i umi 5 iñakã porãvape, “Peiporukápy oréve pende aséite michĩmi. Ore lampĩu niko ogue potáma hína.” Umi iñakã porãva katu he’i chupe kuéra, “Nahániri. Na ñande rupytypa mo’ãi niko péicharõ. Tapeho pejogua peipotárõ.” Ha umi 5 iñakã tavýva oho aja aséite rekávo, oguãhẽ pe menarã. Ha umi kuñataĩ iñakã porãva oike hendive mendahápe, ha oñemboty pe okẽ.

Ojevy rire umi aséite joguávo oho vaekue, ojuhu ndikatuiha oike. Ha osapukái “Karai. Karai. Eipe’ána oréve ne rokẽ.” Ha’e katu he’i chupekuéra, “Mávaiko peẽ. Che ndapoikuaái.” Ha upéi osẽ he’i Jesús, “Pejesarekóke ha ani mo’ãke peke. Cháke ndapeikuaái hína araka’etépa ajúne.”

Ñandejára Hesukrísto ñe’ẽ

ÑAMBOGUEJY ÑANDE REKOVÉPE…

Jahátaramo ñamba’apo ñarambosa porã va’erã, ani ãga ñanekangypa ha ñande pila’i. Jahátaramo mombyry katu tekotevẽ ñamyenyhẽ ñanemba’yru tánke, ani ãga japyta tape ykére.

Péicha avei jaguatáramo Ñandejára ndive tekotevẽ ñañemoĩ jaha puku haguãicha. Ha ndajaikuáai ningo araka’etépa ñande ñamohu’ãta ñande rekove, araka’etépa oúta Ñandejára ñanerenói jaike haguã hendive vy’a guasúpe.

Ñande niko, nde che irũ ha che reindy, ñembo’e ha tembiapo porã rupive, ñañemosã rupive ñande Iglésia rehe, ñemombe’u, comunión rupive, ñane sánto kuéra ha Tupãsy ñepytyvõ rupive, jareko va’erã ñande pype upe jerovia hendýva ñane korasõme ára ha pyhare.

Ñandejára niko oúne ãga ouse vove ha ñande ñaime va’erã upépe jaikévo hendive vy’ápe. Ndaipóri mo’ãi upépe chera’arõmína Ñandejára, aháta aju Hesu. Ani ãga jajere jere etereígui jajavy pe yvága rokẽ ha japyta okápe. Jajerure Ñandejárape ani haguã upéicha oiko ñande rehe.

ÑAÑEMBO’E OÑONDIVE

Ñandejára Hesukrísto, opa araite reime va’ekue rejapóvo nde Ru rembipota, ore pytyvõ míkena roguata kyre’ỹ haguã ore rapicha kuéra ndive mborayhu pópe ñande Iglésia pe. Tahendy ore rekovépe esperánsa ha jerovia, nde eju peve ore reka roike haguã nendive vy’a apy’ra’ỹme. Amén.

Pa’i Jasy.