Ñahendu Hesu. Domingo Semana X TO

Escucha el evangelio y la reflexión en: https://youtu.be/0Jcsr_kt754

Domingo Trinidad Marangatu Ciclo A                    

                                                                    Juan 3, 16 – 18.           

            Uperõ Jesús he’i Nicodémope: – Tupã ohayhu etereígui opa yvypórape, ome’ẽ vaekue Ta’ýra peteĩete, ani haguã omano umi hese ojeroviáva, oikove haguã uvei opa ára.

            Tupã niko nomboúi Ta’ýra yvy ári ohundi haguã yvypórape. Ombou chupe, ha’e rupi osalva haguã yvypóra kuérape. Pe ojeroviáva Tupã ra’ýre noñehundíri. Pe ojerovia’ỹva katu oñehundíma, ojerovia’ỹ haguére Tupã ra’ýre.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            Tuicha mba’e pe mborayhu. Umi jahayhúva ha ñande rayhúva ndive niko ñaimese ha jaheka, jahechaga’u ha jaikuaase ichugui kuéra mba’éichapa oiko. Umi jahayhúvape jaheja reínte hembiapo vaikue, nañapenái oje’éramo ñandéve ivaiha. Oiko asýramo jajepy’apy hese kuéra ha jajapo ikatumíva ñaipytyvõ haguã. Pe oporohayhúva niko ijehegui omýi ohuguaitĩ haguã ohayhúva. Natekotevẽi ete oje’e ichupe oho haguã. Heta mba’e ojapouka ñandéve upe mborayhu ndajajapo mo’ãiva ndajaporohayhúi ramo.

            He’i niko Hesu Nicodémope Tupã ñande rayhu etereiha ha ñande rayhu raságui oimese eterei ñane ndive. Ku omendátava oimese háicha hembirekorã ndive, ha upévare ombou Ta’ýrape ñane rendápe, oguejy haguã ñande apytépe. Hesu ou  oñanduka haguã ñandéve upe Tupã mborayhu tuichaitéva.

            Tupã nomboúi Hesúpe ohundi haguã yvypórape, ombou ichupe ñande salva haguã. Péva ndoikói ñande ñanemba’e porãgui térã ñande raẽ jahayhúgui ichupe. Ha’e ñande rayhúguinte ome’ẽ ñandéve ita’ýra Hessu, jaiko haguã imborayhúpe. Jajerovia hese jaiko Ñandejára mborayhúpe, upépe ikatu japytu’u, ñañeme’ẽ, jaheja ichupe tañanesãmbyhy Espíritu Santo pu’aka rupive. 

            Pe Trinida marangatu jaguerohorýva ko árape niko ohechauka ñandéve Ñandejára ndoikoiha ha’eño. Pe Trinidad niko peteĩ jotopa mborayhúpe, Túva Ñandejára, ñande ru guasuete, oiméva ita’ýra Hesu ndive, ha Espíritu Santo ndive, oñondive oma’ẽva ñande rehe ha ñanemoirũva. Upégui ningo ñande ñasẽ, pe jotopa marangatúgui ñane reñói. Ha upévare ningo ñande ave jajotopase, ha ñaimese oñondive, ha ndajavy’ái ñane ño. Jajoheka ha ñanepeteĩse. Ñandejára niko ñande apo ijoguaha py.

            Ha upévare ningo, che irũ ha che reindy, opaichagua mba’e ñanemopeteĩva, ñamba’apo oñondive, aty tembiapora, mínga, organización ohekáva jaguata py’a peteĩme, familia, opaichagua grúpo, aty kuéra ñepytyvõrã; omoañete ñande rekovépe pe Ñandejára Trinidágui oúva, mbohapy ipeteĩva mborayhúpe. Ha umi ñande pe’áva ojuehegui, juavy, chentese, umi jeapo’i ha ñembo’yke ñande rapichápe, umi ñanemoingovai ha ñanemoñorairõva, hamba’e. Opa umíva ou Añágui, ha ñanembyai.

ÑAÑEMBO’E OÑONDIVE

Tupã Ñandejára reñotỹ vaekue ore korasõme mborayhu, roñandu haguã roikotevẽha ore rapicháre. Ore pytyvõmi kena roñeha’ã haguã roguata oñondive py’a peteĩme. Nde reiko háicha py’a peteĩme nde ra’y Hesukrísto ha Espíritu Santo ndive. Amén.

Pa’i Alberto Luna.