Ñahendu Hesu. Jesús, María ha Jesús, familia marangatu

Escucha el evangelio y la reflexión en: https://youtu.be/LBg7UsmsvK8

Jesús, María ha Jesús, familia marangatu Ciclo B

Lucas 2, 22 – 40

Ha ohasávo 40 ára Jesús onase hague, ogueraha hikuái pe mitã Jerusalénpe, ha omoĩ Ñandejára renondépe. Péicha ojapo hikuái Ñandejára mandamiénto he’ígui: “Opa mitã kuimba’e ypykue oñemboyke vaerã Ñandejárape guarã”. Ñandejára mandamiénto he’i ave, ogueraha vaerãha hikuái, ofrendarã, mokõi pykasu ỹrõ katu mokõi jeruti ra’y.

Umiha árape niko oiko vaekue Jerusalénpe Simeón, karai marangatu. Oha’arõva oikóvo Ñandejára osalva haguã Israélpe. Ha Espíritu Santo oĩ hendive, ha oikuaauka ra’e chupe nomano mo’ãiha ohecha mboyve pe Mesías, Ñandejára he’i va’ekue omboutaha. Ha Espíritu Santo ogueraha Simeónpe tupaópe.

Ha María ha José oikévo tupaópe pe mitã reheve, okumpli haguã Ñandejára mandamiénto, Simeón ohupi pe mitã ijyva ári ha omomba’e guasu Ñandejárape kóicha: Ko’ágã, Ñandejára, rejapóma ne ñe’ẽ. Ikatúma che reja amano py’a guapýpe.

Che resa teépe niko ahecha ko rejapóva ne retã resalva haguã. Ha opa tetã ohecháne avei. Ko mba’e rendy ohesapétava niko opa tetãme guarã, ha ombotuicháta ne retã Israel.

José ha María opyta ijurujái ohendúvo umi mba’e Simeón he’íva pe mitãre. Upéi Simeón ohovasa chupekuéra, ha he’i Maríape: — Peikuaáke kóva ko mitã ouha oity haguã heta Israelguápe.

Péicha ave, hetápe omopu’ã va»erã ágã. Ha’e niko peteĩ mba’e rechaukaháta hína, ha heta oĩta ojahéiva hese. Ha ndéve María, hasýta ku kysépe rejekutúrõ guáicha ne korasõme. Ko’ã mba’e ohechaukáta mba’e-mba’épa oĩ hína umi géntekuéra akãme.

Upe jave oĩ hína avei tupaópe peteĩ kuñakarai iguãiguĩmava, proféta ha’e. Héra niko Ana (…) Araka’eve nosẽiva Tupaógui, ha omomba’e guasúva Ñandejárape ára ha pyhare.

O’ajuna ha oñembo’e. Simeón oñe’ẽmba riremi, oguãhẽ sapy’a Ana. Ha oñepyrũ omomba’e guasu Ñandejárape. Oñe’ẽ pe mitã Jesús rehe opa umi oha’arõvape Jerusalén osẽ jejopy vaígui.

José ha María okumplipa rire Ñandejára mandamiénto, ojevy hikuái Nazarétpe, opytáva Galiléape. Pe mitã katu okakuaa ohóvo, henyhẽ arandúgui ha Tupã ohovasa chupe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Jahecha Tupãsy ha San José oho tupaópe imemby Hesu ndive omoĩvo Ñandejára renondépe ojehovasa haguã. Ou upe jave karai Simeón ha kuñakarai Ana, oñemoñe’ẽmba María ha José-pe, oguerohory pe mitã ipy’aite guive. Ikatu nde ave che reindy ha nde che irũ, pe pesebre renondépe eguapy, emoñe’ẽ ha eguerohory pe Níñope, eñe’ẽ Tupãsy ndive, eñe’ẽ San José ndive. Ejerure nde rogagua rehe, emombe’u ichupe kuéra ne remiandu.

ÑAÑEMBO’E OÑONDIVE

Ñandejára Hesukrísto nereñói ha ekakuaa va’ekue peteĩ família ryepýpe. Ehovasamína opavave ápe oñondive roikóva ko ógape. Taoreresãi, toromba’apo ha torojerovia. Amén.

Pa’i Jasy.