Ñahendu Hesu. Jueves 27º Durante el Año

Escucha el evangelio y la reflexión en: https://youtu.be/7bRKlL2jT8c?si=8MZCHH80FSm5b6tV

Jueves 27 Durante el Año

Lucas 11, 5 – 13

Upérõ Jesús he’i: Ja’éntena pehoha peteĩ peikuaáva rógape pyhare pyte ha peje chupe, “Nde, ma’érã. Nereme’ẽséi piko chéve 3 pan mba’e. Oiméko oguãhẽva ógape mombyrygua ha ndarekói mba’evete ha’uka vaerã chupe.” Ha ja’éntena pe kotypy guive he’iha peẽme, “Nambre. Che rejápe. Ambotypáma niko che rokẽ ha roñenombáma roke haguã.

Ndaikatu mo’ãi apu’ã ha ame’ẽ ndéve mba’eve.” Che ha’e peẽme, pembota jevy jevy ramo, nopu’ãi ramo ome’ẽ pejeruréva pende kuaa haguére, opu’áne ome’ẽ peẽme opa mba’e peikotevẽva anive haguã pemyangekói chupe.

Upévare ha’e peẽme, “Pejerure, ha Ñandejára ome’ẽne peẽme. Peheka ha ha’e ojuhukáne peẽme. Pembota Ñandejára rokẽ ha ha’e oipe’áne peẽme.” Ojerurévape niko oñeme’ẽta, ohekáva katu ojuhúta, ha pe okẽ ombotávape ojepe’áta.

Máva peẽva piko, pende ra’y ojerure ramo peẽme pira, peme’ẽ chupe mbói. Térã ñandu kavaju, ojerure ramo peẽme ryguasu rupi’a. Peẽ, pene rembiapo vaíva voínte Ñandejára renondépe, peme’ẽ kuaa ramo iporãva pende ra’y kuérape, niko ko’yteve pende Ru yvágape oĩva ome’ẽne pe Espíritu Santo umi chupe ojerurévape.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…
Oiméramo jareko petei mba’e iporãva jaipota itereíva ha jahupytyséva ningo jareko mante ñande py’ápe japáy jave ha ñande képe ave. Jaiko hapykuéri ha ñaha’ã opáicha jareko haguã upéva.

Ñamombe’u upe jaipotáva ñane irũ nguérape ha jajeporeka umi ikatúvare ñane pytyvõ upéva jahupyty haguã. Jaipotáramo añete upe mba’e porã niko nañatĩri jaha haguã ñambota heta okẽ ha jajerure jevy jevy haguã ñepytyvõ. Ha upevaite he’i ñandéve Hesu jajapo haguã avei Ñandejára ndive. Ñambota haguã chupe hokẽ ñembo’e rupi. Ha ani ñanekane’õ jajerure haguã, ñamyangekói sántokuéra ha tupãsýme oñe’ẽ haguã avei ñande rehe Ñandejárape, jahechápa nome’ẽi ñandéve upe jaipotáva. Ha jajerure avei ñande rapichápe toñembo’e ñande rehe.

Ñandejára ome’ẽta ñandéve umi mba’e iporãva ñandéve guarã jaipota asýva, ku túva ha sy ome’ẽ háicha ita’ýrape umi mba’e porã oipota ha oikotevẽva. Ha mba’épa reñandu che irũ ha nde che reindy umi jaipota ha jajerure va’erãva.

Ndaha’éi chéne niko mba’e vai mba’e umi jaipota térã jajerure vaerãva, aje. Sapy’ánte ko ikatu jajerure omano jahayhu’ỹva mba’e. Umíva ningo naiporãi. Ikatúko avei jajerure ñagana haguã lotería, térã katu jakuera haguã mba’e. Ñandeko ñapensa upéva iporãvetaha.

Ñandejára katu ningo oikuaa mba’épa iporãve. Upévare Hesu he’i ñandéve jajerure haguã pe Espíritu Santo. Jaikuaa haguã mba’epa umi iporãva ha ñaikotevẽva añete, umíva jahayhu, jajerure ha jaiko haguã hapykuéri jahupyty peve. Ha ñande Ru ome’ẽne ñandéve.

Pa’i Jasy.