Ñahendu Hesu. Jueves I Durante el Año

Escucha el evangelio y la reflexión en: https://youtu.be/EWsotkIkWnY

Jueves I Tiempo Durante el Año

Marcos 1, 40 – 45

Peteĩ lepróso oñemboja Jesús rehe ha ñesũháme he’i chupe: Nde reipotárõ che
mongueráne che mba’asýgui.

Jesús oiporiahuvereko chupe. Opoko hese ha he’i chupe: Aipota. Ekuera!

Upe vove ojei chugui umi kuru vai, ha okuera. Jesús he’i chupe oho haguã ha he’i jevy
chupe: Aníke emombe’u avavépe. Terehónte ejechauka pa’ípe, ha eikuave’ẽ Ñandejárape
umi mba’e Moisés he’iva’ekue oñekuave’ẽva’erãha, ojehecha haguã rekueramaha.

Pe kuimba’e katu oho ha omombe’u opa rupi upe ojehuva’ekue. Upévare Jesús ndaikatu véima oike umi puéblope, umi okahárente opyta. Ha opa guio oime oúva hendápe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Opavave niko jareko umi mba’e jaipotáva, jarekoséva, térã katu umi mba’e ipohýiva ñandéve ha ñande reko asýva ha hi’ãva ojei ñande ape árigui. Ha umíva jahupyty haguã niko ñañeha’ã ha jaheka tape, jajeporeka ha jajerure avei ñepytyvõ nañandepu’akáiramo ñane ño.

Ñañeha’ã ñandejehegui ha ñañembo’e avei. “Eñeha’ã toroipytyvõ he’i Kirito”, he’i peteĩ ñe’ẽnga. Oime omyataindýva sánto kuéra, ojapóva promesa Tupãsýme. Oĩ ojeruréva ambuépe ñembo’e haguã hese. Oime avei oñembo’ekáva misa ha ojapóva sacrificio jahechápa péicha dohupytýi pe grásia ojeruréva.

Ñahendu kuri angete oguahẽha Hesu rendápe peteĩ lepróso okuerasetereíva.
Ñama’ẽvo ko ñande rapicháre ikatu ñanembo’e avei ñandéve mba’éichapa jajerure
va’erã. Tenonderã ko kuimba’e oguahẽ oñesũ Hesu renondépe. Upéva ñanembo’e mba’éichapa ñaguahẽ vaerã Ñandejára renondépe jajerure haguã jaipotáva. Jahechakuaa
vaerã mávapa ñande, ha mávapa Ñandejára.

Upéi katu he’i chupe: Nde reipotárõ che mongueráne. Ko kuimba’e ojerure asy ha okueraséramo jepe, oheja Ñandejára pópe, toiko upe ha’e oipota háicha. Ojerovia
ha’e peteĩ mitãicha Túva Ñandejára oikuaaha mba’épa añete ha’e oikotevẽ, ha mba’épa
iporãvéta chupe guarã.

Mba’épa reñandu che reindy ha nde che irũ ñañemoĩ ramo avei ñande mitãicha ñande ru renondépe. Ha’e tome’ẽ ñandéve pe jaipotáva, oiméramo upéva iporãvéta ñandéve guarã.

Pa’i Jasy.