Ñahendu Jesús Ñe’ẽ. Jueves 4° Tiempo Ordinario

Escucha el evangelio y la reflexión en: https://youtu.be/fMQBWs-ZReg

Jueves 4° Tiempo Ordinario

Marcos 6, 7 – 13

Upérõ Jesús ombyaty umi 12 disípulope omondo haguã mokõi-mokõi, ha ome’ẽ chupekuéra pu’aka omosẽ haguã demóñokuéra.

He’i chupekuéra: — Ani peraha mba’eve pe’u va’erã tapére. Pláta ave ani peraha. Yvyra pende pópe, peguata haguãnte peraha, ha sapatu pende pýre. Ao pembojopyru va’erã katu nahániri.

He’i chupekuéra: — Peguãhẽ ramo peteĩ ógape, upépente pepyta pesẽtaha ára peve. Ha na pene moguãhẽséi ramo térã na pene renduséi ramo katu, pesẽnte upégui. Ágã pesẽnguévo katu, peityvyro pende pýgui yvytĩmbo. Péicha oikuaáta hikuái Ñandejára okastigátaha chupekuéra.

Ha osẽ idisípulokuéra oñemoñe’ẽ opavavépe he’ívo chupekuéra ojevy haguã Ñandejára rendápe. Omosẽ hikuái heta demóño, ha omonguera heta hasývape omonávo hesekuéra aséite.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Umi oñemondóva oñe’ẽ haguã aty guasúpe, opredika haguã, oñe’ẽkuaa va’erã, iñarandu, ijagrasiádo va’erã, ojerovia va’erã ijehe, ikatu haguãicha ojecháramo.

Oguahẽramo mba’yrúpe, áuto porã, kamionétape katu oñemomba’e guasuvéta vaicha. Ijao porãro, itrahepa, hatã hyapúramo parlántepe, ipláta ibolsíllope, ojapokáramo peteĩ ásado kyra porã mba’e katu, orahapátama vaicha henonderã opavave.

Jesús katu he’i ijapóstolkuérape ani haguã ojerovia umíva rehe. Ani oimo’ã iñe’ẽkuaa rupi omoguahẽtaha Ñandejára grásia hapichápe. Ani ojepy’apy aóre, píntare, sapatu overapáva rehe, natekotevẽi ijavío heta, térã pira pire rehe ojerovia.

Pe Jesús rérape ohóva ndaha’éi iñe’ẽ oraháva. Ndaha’éi ijupe oñemoherakuãva.

Ñandejára ñe’ẽ oraha, Ñandejára py’aguapy ome’ẽ, Ñandejára grásia omoguahẽ ñande rógape. Taha’e iñarandúva térã itavymíva, taha’e ijao porãva térã irraidomíva, taha’e mitã térã karai, taha’e imba’e retáva térã mboriahu. Ñandejára rembijokuái hína péva, che reindy ha nde che irû. Oguerúva ñandéve Hesu pu’aka ha hérape oñe’ẽva ñandéve.

Ñamoguahẽ aipóramo oguapy haguã ñande rehe Ñandejára salvación. Jajetyvyróramo Jesús remimboúgui katu, oíma hína avíso ñande avei jajetyvyrótaha amo ipahápe.

Pa’i Alberto Luna.