Ñahendu Hesu. Jueves Santo

Escucha el evangelio y la reflexión en: https://youtu.be/Ym7BDR_Obyw

Jueves Santo

Juan 13, 1 – 15

Páskua arete mboyve, Jesús oñandu oguãhẽmaha ára ha’e ohejávo ko yvy oho haguã túva rendápe. Ohayhu va’ekue niko ha’e umi chupe omoirũ va’ekuépe ko yvy ári, ha ohayhu chupekuéra ipahaite peve.

Pyhare Jesús osena jave hína idisípulokuéra ndive, Aña omoinge Judas, Simón Iscariote ra’y, akãme omoñuhã haguã Jesúspe. Jesús oikuaa Túva omoĩ hague opa mba’e ipo guýpe. Oikuaa ha’e, ou hague Ñandejára rendágui ha Ñandejára rendápe jey ohotaha. Upévare, opu’ã meságui oipe’a ijahoja ha oñapytĩ iku’áre peteĩ toálla.

Upéi omoĩ y peteĩ ña’ẽme ha oñepyrũ ombojepyhéi idisípulokuérape. Upéi katu omokã pe
toálla iku’áre oĩvape.

Oñembojávo Pédrore ombojepyhéi haguã chupe, ha’e he’i Jesúspe: — Maéstro, nde piko che mbojepyhéita chéve.

Jesús he’i chupe: — Ko’ágã ndereikuaa porãi hína mba’épa ajapo. Ágã upe rire ae reikuaáne.

Pedro he’i chupe: — Ndaheja mo’ãi ndéve ejohéi chéve che py.

Jesús he’i chupe: — Ndajohéi ramo ndéve nde py, mba’evéma ndereguereko mo’ãi che ndive.

Simón Pedro he’i chupe upépe: — Péicharõna maéstro, ani che py añónte ejohéi chéve. Ejohéi ave chéve che po ha upéi che akã.

Jesús katu he’i chupe: — Ojahupa ramóva niko ipotĩ, ha ojepyhéinte oikotevẽ. Opa peẽ niko pene potĩ, oĩ ramo jepe peteĩ nahániriva.

Jesús niko he’i: “Oĩ ramo jepe peteĩ nahániriva”, oikuaágui mávapa hína pe oitýtava chupe ñuhãme.

Ha ombojepyheipa rire chupe kuéra, Jesús omoĩ jey ijapére ijahoja. Upéi katu oguapy jey mesápe, ha he’i chupekuéra: — Pehecha kuaáiko mba’épa he’ise pe ajapóva pende rehe. Peẽ niko peje chéve “Maéstro” ha “Ñandejára”, ha péicha pejérõ, añeteguánte peje.

Che niko upéva hína. Upévare, che pene Maéstro ha pende Jára, ajohéi ramo peẽme pende py, peẽ péicha avei pejapo vaerã ojupe. Che ahechauka hína peẽme mba’épa pejapo vaerã, peẽ pejapo haguã che ajapo haguéicha pende rehe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ niko umi tembiapo ndajajaposéiva, jajohéi tembiporu ha ólla, ao ky’a, jaitypei, ñamopotĩ óga váño ha mba’e. Oĩ voi niko he’íva: “Che ndaha’éi pokyra umíva ajapo haguã”. Jahecha Hesu ojayvy ha oñesũ pehẽ ijapóstol kuéra renondépe, peteĩ teĩme ojohéi ipy ha omokã. Oñemoĩ tembiguáicha omopotĩ hapykuere ky’a.

Ikatúko ñande avei che reindy ha nde che irũ ñande rari imi Pédroicha, ha ndajahejái Hesu ñanemopotĩ, ñanembopiro’y ha ñañembovevúi ñanerembiapo vaikuetágui. Ha péicha ikatu avei hína ohasa reiete ñande hegui ko Semana Santa.

Pa’i Alberto Luna.