Ñahendu Hesu. Jueves Semana 20º TO

Escucha el evangelio y la reflexión en: https://youtu.be/7UZJKBWjbQc

Jueves 20a TO

                                                                                 Mateo 22, 1 – 14.

            Upérõ Jesús omombe’u opavavépe kóva ko káso:Ñandejára Rréino niko ojogua ku mburuvicha peteĩme ojapo vaekue karu guasu ita’ýra omendáta haguére. Omondo ndaje umi hembiguáipe ohenói haguã opa umi oñekonvida vaekuépe ou haguã.

Ipahápe, avave ndouséi. Upémarõ omondo jey voi ambue hembiguái he’ikávo chupekuéra: “Tembi’u niko oĩmbáma. Umi che rymba ikyra-kyravéva niko ajuka.

Pejúntema javy’a.” Amo ipahápe, avave ndoúi. Avave nopenái hese. Oĩ ndaje ohóva ohecha ijyvy, ambue katu oho oñemu. Oĩ voi katu osẽva umi tembiguáipe ha heta oinupã rire ojukapa. Péva ombopochy pe mburuvichápe.

Omondo upémarõ isoldádokuéra ojuka haguã umi hembiguái jukaharépe, ha ohapypa hógakuéra. Upéi katu he’i hembiguáikuérape, “Oĩmbáma niko ko che ra’y menda rehegua karu guasu. Umi aconvidaypy vaekuépe niko iporãve voi ndoúi che rógape. Tapeho opárupi ha opa pejuhúvape peje chupe tou.”

Umi hembiguái osẽ ha ogueru opa ojuhúva. Oĩ heko porãva ha oĩ nahániriva. Ha peteĩcha ohopa joa hikuái. Omyenyhẽ hikuái pe óga.

Upéi katu pe mburuvicha oho ohecha máva-mávapa umi ou vaekue. Ijapytépe kuéra ohecha sapy’a peteĩ oñemonde porã’ỹ va’ekue mendahápe guarãicha.He’i chupe, “Che irũ, mba’éicha rupi piko reike che rógape. Ne reñemondéi niko mendahápe guarãicha.” Pe kuimba’e katu okirirĩnte chugui. Upérõ pe mburuvicha he’i hembiguái kuérape, “Peipykua ha peipokua, ha pemombo okápe, iñypytũháme. Upépe tahasẽ ha hãi tomopururũ.”

Upéi he’i Jesús chupe kuéra: — Heta niko hína umi oñeconvidáva, ha mbovy umi ojeporavóva.

Ñandejára Hesukrísto ñe’ë.

HA ÑAMBOGUEJY ÑANDE REKOVÉPE…

Oĩ peteĩ konvíte iporãva he’i Hesu. Oiko ndaje peteĩ ñemenda ha ijaty lo mitã ovy’a haguã karu guasu hápe. Ñandejára ombou ita’ýra Hesu oñemopeteĩ haguã ñanendive, ku omenda ramo guáicha ñande yvypóra rehe, tuicha ñande rayhúgui. Ha péva niko tuicha iterei mba’e tekotevẽva jahecha ramo.

Ha umi oñekonvidáva ha oñeha’arõvéva katu ndohoséi. Nomomba’éi ete voi. Ojuhu ikuentavéva, nointeresái ichupe kuéra Ñandejára konvíte. Oĩ voi katu ipochýva umi Ñandejára rembijokuái ndive oúva he’i aipo Ñandejára ndaje ohenóiha ichupe kuéra.

Ha upéma ramo Ñandejára osẽ okonvida opaichagua ouséva guivépe, henyhẽmeve hóga. Ha péva niko ñande Iglesia, ñanembyatýva opaichagua tapichápe. Ndaha’éiva katuete johéi pyre, arandu, terã imba’e porãva memete. Opa umi ohendúva Ñandejára ñehenói ija hógape ha oike hendive pe vy’a guasúpe. Oguahẽmapa ndéveche reindy, ha ndéve chirũ, pe Ñandejára konvíte. Eñembojátapa hína mesápe. Mba’épa rekarkula.

Pa’i Jasy.